နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ဟောင်ကောင်အုပ်ချုပ်ရေးမှူးချုပ် Mrs. Carrie Lam ဦးဆောင်သည့် ကိုယ်စားလှယ်အဖွဲ့အား စက်တင်ဘာ ၁၅ ရက်က နေပြည်တော်ရှိ နိုင်ငံတော်သမ္မတအိမ်တော် သံတမန်ဆောင်ဧည့်ခန်းမ၌ လက်ခံတွေ့ဆုံစဉ် (Photo: Myanmar State Counsellor Office)

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ဟောင်ကောင်အုပ်ချုပ်ရေးမှူးချုပ် Mrs. Carrie Lam ဦးဆောင်သည့် ကိုယ်စားလှယ်အဖွဲ့အား စက်တင်ဘာ ၁၅ ရက် နံနက် ၁၀ နာရီတွင် နေပြည်တော်ရှိ နိုင်ငံတော်သမ္မတအိမ်တော် သံတမန်ဆောင်ဧည့်ခန်းမ၌ လက်ခံတွေ့ဆုံခဲ့သည်။

ထိုသို့ တွေ့ဆုံရာတွင် ပညာရေး၊ ကျန်းမာရေး၊ ကုန်သွယ်ရေး၊ ခရီးသွားလုပ်ငန်းနှင့် ရင်းနှီးမြှုပ်နှံမှုဆိုင်ရာ ကိစ္စရပ်များ၊ နယ်စပ်ရေးရာနှင့် တိုင်းရင်းသားလူမျိုးစု အခြေအနေများနှင့် မြန်မာနိုင်ငံ၏ ငြိမ်းချမ်းရေး ဆောင်ရွက်မှု အခြေအနေများကို ဆွေးနွေးခဲ့ကြကြောင်း နိုင်ငံတော်အတိုင်ပင်ခံရုံး၏ ထုတ်ပြန်ချက်အရ သိရသည်။

ထို့ပြင် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ဓာတ်ပုံအား ဟောင်ကောင်အုပ်ချုပ်ရေးမှူးချုပ်က ဒေါ်အောင်ဆန်းစုကြည်အား ပေးအပ်ခဲ့သည်။

တွေ့ဆုံပွဲသို့ ပြည်ထောင်စုဝန်ကြီးများ ဖြစ်ကြသည့် ဒေါက်တာသန်းမြင့်၊ ဦးကျော်ဝင်းနှင့် ဦးအုန်းမောင်၊ ဒုတိယဝန်ကြီး ဦးကျော်တင်နှင့် တာဝန်ရှိသူများ တက်ရောက်ခဲ့ကြသည်။

ဟောင်ကောင်အုပ်ချုပ်ရေးမှူးချုပ် Mrs. Carrie Lam ဦးဆောင်သည့် ကိုယ်စားလှယ်အဖွဲ့သည် မြန်မာနိုင်ငံသို့ စက်တင်ဘာ ၁၄ ရက် ညပိုင်းက နေပြည်တော်သို့ ရောက်ရှိလာခဲ့သည်။

ဟောင်ကောင်အုပ်ချုပ်ရေးမှူးချုပ် Mrs. Carrie Lam သည် ရန်ကုန်မြို့တွင် စက်တင်ဘာ ၁၆ ရက်တွင် ကျင်းပမည့် ၁၄ ကြိမ်မြောက် ကမ္ဘာ့တရုတ်စွန့်ဦးတီထွင် လုပ်ငန်းရှင်များ ညီလာခံ (WCEC) သို့ တက်ရောက် မိန့်ခွန်းပြောကြားမည်ဖြစ်ကြောင်း သိရသည်။

၁၉၉၁ ခုနှစ်ကစတင်ပြီး နှစ်နှစ်တစ်ကြိမ် မြို့အသီးသီးတွင် ကျင်းပလာခဲ့သည့် WCEC သည် ကမ္ဘာတစ်ဝန်းရှိ တရုတ်စွန့်ဦး တီထွင်လုပ်ငန်းရှင်များနှင့် စီးပွားရေးနှင့် စက်မှုကဏ္ဍများအတွက် စီးပွားရေးပူးပေါင်း ဆောင်ရွက်မှုနှင့် နားလည်မှု မြှင့်တင်ရေးအတွက် စင်မြင့်တစ်ခုဖြစ်သည်။