ဆောက်လုပ်ရေးဝန်ကြီးဌာနနှင့် ပုဂ္ဂလိက ပူးပေါင်းဆောင်ရွက်နေသည့် ရတနာနှင်းဆီ အဆင့်မြင့်အိမ်ရာကို တွေ့ရစဉ်
တန်ဖိုးသင့်နှင့် တန်ဖိုးနည်းအိမ်ရာများ ပိုမိုပေါ်ထွက်လာစေရန်အတွက် နိုင်ငံတော်အစိုးရအနေဖြင့် ပုဂ္ဂလိလုပ်ငန်းရှင်များလုပ်ကိုင်ရန် အိမ်ရာစီမံကိန်း ၂၀ ကိုလုပ်ကိုင်ရန် ခွင့်ပြုပေးထားပြီး လက်ရှိအချိန်တွင် ဆက်လက်ဆောင်ရွက်နိုင်ခြင်းမရှိဘဲ ဆိုင်းငံ့ထားသောလုပ်ငန်းများကို ဖိအားပေးကာ အမြန်ဆုံးတည်ဆောက်ခိုင်းသွားမည်ဖြစ်ကြောင်း ရတနာနှင်းဆီ အဆင့်မြင့်အိမ်ရာ/အိမ်ခန်းသော့အပ်နှံပွဲတွင် ဆောက်လုပ်ရေးဝန်ကြီးဌာန၊ ပြည်ထောင်စုဝန်ကြီး ဦးဝင်းခိုင်က ပြောကြားသည်။
“ပုဂ္ဂလိကပိုင်းကလည်း ဆောက်နေတာပဲ။ အခုလည်း စီမံကိန်းကြီးတွေပေးထားတာ စီမံကိန်း ၂၀ လောက်ရှိတယ်။ ဒါတွေက တိုးလို့တန်းလန်းဖြစ်နေတာတွေ အများကြီးပဲ။ ဒါတွေကိုဖိအားပေးပြီး အမြန်ဆုံးပြန်ဆောက်ခိုင်းမယ်။ ရပ်နေတဲ့စီမံကိန်းတွေလည်း အများကြီးရှိတယ်။ အခုစပ်ကူးမပ်ကူးမှာ ရပ်သွားတဲ့ဟာတွေရှိတယ်။ ဒါတွေက နိုင်ငံတော်ဘက်ကတော့ ပေးပြီးသားတွေ။ လုပ်ငန်းရှင်တွေက မဆောက်နိုင်သေးတာ ဒါတွေကိုလည်း အမြန်ဆုံးပြန်ဆောက်နိုင်အောင် စီစဉ်မယ်” ဟု ဦးဝင်းခိုင်က ပြောကြားသည်။
အဆိုပါ ပုဂ္ဂလိကလုပ်ငန်းရှင်များ ဆောင်ရွက်နေသည့် စီမံကိန်း ၂၀ ကို တည်ဆောက်ပြီးစီးပါက နိုင်ငံတော်အတွက် တန်ဖိုးအလယ်အလတ်နှင့် တန်ဖိုးနည်းတိုက်ခန်းများ ပိုမိုတိုးလာမည်ဖြစ်ကြောင်း သိရသည်။
ထို့အပြင် နိုင်ငံတော်အစိုးရပိုင်းမှ လက်ရှိအချိန်အထိ အိမ်ရာအခန်းပေါင်း ၆၅၀၀၀ ခန့်ကို တည်ဆောက်ပေးထားပြီး လာမည့်နှစ်များ၌ တစ်နှစ်ကို အိမ်ရာအခန်းပေါင်း ၂၀၀၀ မှ ၃၀၀၀ အကြား ဆက်လက်တည်ဆောက်သွားရန် မျှော်မှန်းထားကြောင်း ဆောက်လုပ်ရေးဝန်ကြီးဌာနမှ သိရသည်။
“အခုကတော့ ၆၅၀၀၀ လောက်ဆောက်ထားပြီး ရှေ့လျှောက်တစ်နှစ်ကို ၂၀၀၀၊ ၃၀၀၀ တော့ဆောက်နေမှာပဲ။ ဒါက အစိုးရပိုင်းကစီစဉ်တာ” ဟု ဦးဝင်းခိုင်က ပြောကြားသည်။
ဆက်လက်ပြီး အငှားအိမ်ရာများကိုလည်း တည်ဆောက်သွားရန် စီစဉ်လျက်ရှိပြီး လက်ရှိအချိန်တွင် ဝန်ထမ်းအိမ်ရာများကိုလည်း ရန်ကုန်၊ မန္တလေးနှင့် နေပြည်တော်တို့တွင် တည်ဆောက်လျက်ရှိကြောင်း၊ ကျန်သည့် ပြည်နယ်နှင့် တိုင်းဒေသကြီးများတွင်လည်း ၎င်းတို့၏အစီအစဉ်များဖြင့် ဆောက်လုပ်ရန် စီစဉ်လျက်ရှိကြောင်း သိရသည်။
ဆောက်လုပ်ရေးဝန်ကြီးဌာနအနေဖြင့် လာမည့် ၂၀၃၀ ပြည့်နှစ်အရောက်တွင် အစိုးရနှင့် ပုဂ္ဂလိကကဏ္ဍပူးပေါင်းကာ အိမ်ရာတစ်သန်းအထိ ဖော်ထုတ်သွားနိုင်ရန် မျှော်မှန်းဆောင်ရွက်လျက်ရှိကြောင်း သိရသည်။
မြန်မာနိုင်ငံ၏ အိမ်ရာကဏ္ဍဖွံ့ဖြိုးတိုးတက်ရေးအတွက် ၂၀၁၆-၂၀၁၇ ဘဏ္ဍာနှစ်မှ ၂၀၂၀-၂၀၂၁ ခုနှစ်အတွင် အိမ်ရာဖွံ့ဖြိုးမှု ငါးနှစ်စီမံကိန်းရေးဆွဲထားရာ စုစုပေါင်းအိမ်ရာ ၁ ဒသမ ၈ သိန်းအထိ အကောင်အထည်ဖော် တည်ဆောက်မည်ဖြစ်ကြောင်း ဆောက်လုပ်ရေးဝန်ကြီးဌာန၊ ပြည်ထောင်စုဝန်ကြီး ဦးဝင်းခိုင်က ၂၀၁၇ ခုနှစ်နှစ်ဆန်းပိုင်းက ပြောကြားထားသည်။
