မကွေးတိုင်းဒေသကြီး အောင်လံမြို့မ ရဲစခန်းအချုပ်ထဲမှ ခိုးမှုနှင့်အချုပ်ကျနေသူနှစ်ဦး အချုပ်ဖောက်ထွက်ပြေးမှုတစ်ခု နိုဝင်ဘာ ၂၀ ရက် နံနက် ၄ နာရီဝန်းကျင်ခန့်က ဖြစ်ပွားခဲ့ကြောင်း သတင်းရရှိသည်။
ဖြစ်စဉ်မှာ အောင်လံမြို့မရဲစခန်းအချုပ် အမှတ် (၂) အတွင်း ဆိုင်ကယ်ခိုးမှုနှင့် အချုပ်ကျနေသူကျော်စိုး (ခ) ကျော်ဇေယျအောင်လံမြို့ စက်ရုံရပ်ကွက်နေထိုင်သူ သန်းဇော်ထွေး (ခ) ကြည်ခိုင် (ခ) ရခိုင်မြောက်ဦးမြို့ အောင်မင်္ဂလာရပ်ကွက် နေထိုင်သူနှစ်ဦးတို့သည် အချုပ်ခန်းမျက်နှာကြက် အမိုးသံဆန်ခါအား တွန်းလှန်ပြီး ထွက်ပြေးလွတ်မြောက်သွားကြကြောင်း သတင်းရရှိသည်။
“နှစ်ယောက်လုံးက ဆိုင်ကယ်ခိုးမှုတွေနဲ့ အချုပ်ကျနေတဲ့လူတွေပါ။ တစ်ယောက်က တရားရုံးစစ်ဆေးဆဲ၊ တစ်ယောက်က ရဲစစ်ဆေးဆဲပါ။ အချုပ်ဖောက်သွားတာက နံနက် ၄ နာရီ ၁၅ မိနစ်လောက်ကပါ။ အပေါ်မျက်နှာကြက်က သံဆန်ခါကိုတွန်းလှန်ပြီး ခေါင်းမိုးအတိုင်း ထွက်ပြေးသွားတယ်လို့ ယူဆရပါတယ်။ လက်ရှိကတော့ အမြန်ဆုံးဖမ်းဆီးနိုင်ဖို့ လိုက်လံစုံစမ်းစစ်ဆေးမှုတွေ လုပ်ဆောင်နေပါတယ်” ဟု အောင်လံမြို့နယ်ရဲတပ်ဖွဲ့မှူးက ပြောကြားသည်။
မကွေးတိုင်းဒေသကြီးအတွင်း ပြီးခဲ့သည်လပိုင်းကလည်း မကွေးမြို့မရဲစခန်းရှိ အချုပ်ထဲမှ အချုပ်သားခြောက်ဦး ထွက်ပြေးမှုဖြစ်ပွားခဲ့ပြီး ထွက်ပြေးသူအများစုကို ရဲတပ်ဖွဲ့မှ လိုက်လံဖမ်းဆီးနိုင်ခဲ့ကြောင်း သိရသည်။
