ပဲခူးတိုင်းဒေသကြီး (အနောက်ပိုင်း)၊ ပြည်မြို့၊ တော်ဝင်ရတနာ ခန်းမတွင် နိုဝင်ဘာ ၂၁ ရက်နေ့ (ယနေ့) နံနက်ပိုင်းက အပြည်ပြည်ဆိုင်ရာ ကလေးများနေ့ အခမ်းအနားအား ပြုလုပ်ခဲ့ပြီး အုပ်ချုပ်ရေး၊ လူမှုဝန်ထမ်း ဦးစီးဌာန၊ နိုင်ငံရေးပါတီများ၊ နိုင်ငံရေးအင်အားစုများ အရပ်ဘက်အဖွဲ့များ၊ အခြေခံပညာအထက်တန်းကျောင်း ဆရာ/ဆရာမ၊ ကျောင်းသူ/ကျောင်းသားများ၊ မိဘမဲ့ကလေးများ ပရဟိတကျောင်း နှင့် လမ်းပျော်ကလေးများလည်း တက်ရောက်ခဲ့ကြကြောင်း သိရသည်။
“ဒီ အခမ်းအနား အဓိက ရည်ရွယ်တာကတော့ ကျွန်တော်တို့ နှစ်စဉ်နှစ်တိုင်းမှာ ၂၀ ရက်နေ့တိုင်းမှာ အပြည်ပြည်ဆိုင်ရာ ကလေးသူငယ်များနေ့ အထိမ်းအမှတ် အပြည်ပြည်ဆိုင်ရာ ကလေးသူငယ် အခွင့်အရေး စာချုပ်အနေနဲ့ အထိမ်းအမှတ်ကျင်းပတယ် ဒီ အခမ်းအနားက ပုံမှန်အားဖြင့် ကလေးသူငယ် အခွင့်အရေးတွေကို ပြည်သူလူထုကြားမှာ ပိုပြီး သိကြဖို့ ကလေးသူငယ် အရေးလုပ်ဆောင်နေတဲ့ အရပ်ဘက် အဖွဲ့အစည်း အစိုးရအဖွဲ့အစည်းကြားမှာ ဆက်သွယ်ဆောင်ရွက်မှု မပျက် ကောင်းမွန်လာဖို့ အဓိက ရည်ရွယ်လုပ်ဆောင်ပါတယ်” ဟု Equality Myanmar စီမံကိန်းအရာရှိ ကိုမျိုးသက်ဦးက ပြောသည်။
ဆက်လက်၍ ကလေးသူငယ် အခွင့်အရေးလှုပ်ရှားမှုများနှင့် ပတ်သက်၍ “ကလေးသူငယ်အခွင့်အရေးက ကြိုးစားဆဲ ကာလမှာလို့ပဲ ကျွန်တော်တစ်ဦးတစ်ယောက်တည်းရဲ့အမြင်နဲ့ သုံးသပ်ပါတယ် ကလေးသူငယ် အခွင့်အရေးအတွက်လုပ်ဆောင်နေတဲ့ အဖွဲ့အစည်းတွေ အားကောင်းလာကြတယ်။ ကလေးသူငယ်အခွင့်အရေးအတွက် လုပ်ဆောင်နေကြတဲ့ အစိုးရ အရပ်ဘက်အဖွဲ့အစည်းတွေ ပိုပြီးအားကောင်းလာကြတယ်။ သို့သော်လည်း ကျွန်တော်တို့ လက်လှမ်းမမှီတဲ့ နေရာဒေသတွေရှိနေတုန်းပဲ ကျွန်တော်တို့ လက်လှမ်းမီတာသည် ဖြစ်နေတဲ့ အကုန်လုံးရဲ့အချို့အဝက်ကိုပဲ သိနေတာဆိုတော့ ကြိုးစားဖို့ လိုကောင်း လိုအုံးမယ်။ ဒီလို အခမ်းအနားတွေ လုပ်ခြင်းအားဖြင့် ကျွန်တော်တို့ လူနည်းနည်းခြင်းကပဲ အများကြီးကို စုရမှာဆိုတော့ ဒီလိုအခမ်းအနားတွေက လိုအပ်နေပါတယ်။ ဒါကြောင့် လုပ်ဖြစ်တာပါ” ဆက်လက် ပြောသည်။
