တကောင်း ရှေးဟောင်းယဉ်ကျေးမှုနယ်မြေသို့ ပြည်တွင်းခရီးသွားလာမှု များပြားလာပြီး နိုင်ငံခြားသားခရီးသွား ဝင်ရောက်မှု နည်းပါးလာကြောင်း သိရသည်။
မန္တလေးတိုင်းဒေသကြီး ပြင်ဦးလွင်ခရိုင် သပိတ်ကျင်းမြို့နယ် တကောင်းမြို့ တကောင်းရှေးဟောင်း ယဉ်ကျေးမှုနယ်မြေသို့ ယခုနှစ်တွင် ပြည်တွင်းခရီးသွား ဝင်ရောက်မှု ပိုမိုးများပြားလာပြီး ပြည်ပခရီးသွား ဝင်ရောက်မှု နည်းပါးလာကြောင်း ရှေးဟောင်းသုတေသနနှင့် အမျိုးသားပြတိုက် ဦးစီးဌာန(တကောင်း)မှ သိရသည်။
တကောင်းယဉ်ကျေးမှု နယ်မြေသို့ ပြည်တွင်းခရီးသွားများသည် မန္တလေး၊ ထီးချိုင့်ဘက်မှ ကုန်းလမ်းခရီးဖြင့် တစ်လလျှင် ခရီးသွား ၄၀၀ မှ ၆၀၀ အကြား လာရောက်လည်ပတ်ပြီး နိုင်ငံခြားသား ခရီးသွားဧည့်သည် များသည် မန္တလေးမြို့မှ ရေလမ်းခရီးဖြင့် လာရောက် လည်ပတ်လေ့ရှိကြောင်း သိရသည်။
“တကောင်း ရှေးဟောင်းယဉ်ကျေးမှု နယ်မြေကို ပြည်တွင်းခရီးသွား လာရောက်မှုက ထီးချိုင့်က ဧရာဝတီမြစ်ကူးတံတား တည်ဆောက်ပြီးနောက်ပိုင်း များလာတယ်။ နောက်ပြီး ဗန်းမောက်မြို့နယ်က ဇလုံတောင်ကို ဘုရားဖူးသွားတဲ့ ခရီးသွားတွေက အပြန်မှာ တကောင်းပြတိုက်နဲ့ တကောင်းယဉ်ကျေးမှုနယ်မြေ ဝင်ရောက်လာမှု ဒီနှစ်ပိုင်း များလာတယ်။ နိုင်ငံခြားသား ခရီးသွားဧည့်သည် ဝင်ရောက်မှုကတော့ နည်းလာပါတယ်။ တစ်လအယောက်၂၀ ဝန်းကျင်လောက်ပဲ လာတော့တယ်။ နိုင်ငံခြားသား ခရီးသွားတွေက ရေလမ်းကပဲ လာတာများပါတယ်” ဟု ရှေးဟောင်း သုတေသနနှင့် အမျိုးသားပြတိုက် ဦးစီးဌာနမှ ဦးစီးအရာရှိ ဒေါ်ခင်ထွေးဝင်းက ဆိုသည်။
တကောင်းရှေးဟောင်းယဉ်ကျေးမှု ပြတိုက်တွင် ပျူခေတ်မှ ရတနာပုံခေတ် ရှေးဟောင်းပစ္စည်းများကို ပြခန်းသုံးနေရာခွဲ၍ ကျောက်၊ ကြေး၊ သံ၊ သစ်သားနှင့် ပြုလုပ်ထားသည့် ရှေးဟောင်းပစ္စည်းများအား ထိန်းသိမ်းပြသထားကြောင်း၊ ပြတိုက်တွင် ပြည်တွင်းပြည်ပ ခရီးသွားများ စိတ်အဝင်စားဆုံး ပြကွက်သည် လွန်ခဲ့သည့် နှစ်ပေါင်း ၂၀၀၀ ကျော်က သံခေတ်၏ ပြယုဂ်ဖြစ်သော သံချက်ဖိုဖြစ်ကြောင်း၊ ယခင်က တကောင်းယဉ် ကျေးမှုနယ်မြေ ပတ်ဝန်းကျင်တွင် သံချက်ဖို ၁၀၀ ကျော်ရှိခဲ့ကြောင်း၊ ယခုရှေးဟောင်း
သုတေသနနှင့် အမျိုးသားပြတိုက် ဦးစီးဌာနမှ သံချက်ဖို ၁၀ ဖိုကို ထိန်းသိမ်းထားကြောင်း ၎င်းက ဆက်လက်ပြောကြားသည်။
တကောင်းရှေးဟောင်း ယဉ်ကျေးမှုနယ်မြေတွင် တကောင်းရှေးဟောင်း ယဉ်ကျေးမှုပြတိုက်၊ စည်းခုံကြီးဘုရား မြေနေရာ၊ ၁၁ ရာစုက အနော်ရထာမင်းကောင်းမှု လေးမျက်နှာဘုရား၊ ရွှေဇာလီဘုရား၊ ခေါင်းတိုက်ဘုရား၊ ဇိနအောင်မြေဘုရား၊ မြောက်ယဉ်စွန်းတန်း ဖြတ်သန်းသွားသည့်နေရာ၊ တကောင်းမြို့ရိုးစသည့် ရှေးဟောင်း နေရာများသို့ လေ့လာလည်ပတ်နိုင်ကြောင်း သိရသည်။
တကောင်းယဉ်ကျေးမှု နယ်မြေသည် မန္တလေးမြို့မှ ဧရာဝတီမြစ်အတိုင်း ၁၂၇ မိုင်ဝေး၍ မြစ်အရှေ့ဘက်ကမ်း မြေပြန့်ဒေသတွင် တည်ရှိပြီး “မြန်မာအစ၊ တကောင်းက” ဟု ဆိုရိုးရှိပြီး မြန်မာနိုင်ငံတွင် တကောင်းမင်းဆက် စတင်တည်ထောင်သည့်ခေတ်သည် မြန်မာသမိုင်း၏ အစဖြစ်သည်ဟု သမိုင်းဆရာတို့က ယူဆကြ၏။ မြန်မာနိုင်ငံ ပထဝီနှင့် သမိုင်း မဟာရာဇဝင်၌ တကောင်းသည် ဂေါတမမြတ်စွာဘုရား လက်ထက်ကပင်လျှင် တကောင်းဟု ခေါ်တွင်ကြောင်း ဖော်ပြသည်။ မဇ္ဈိမဒေသ သာကီအနွယ်ဖြစ်သော အဘိရာဇာမင်းက စတင်တည်ထောင်ပြီး မင်း ၃၃ ဆက်မြောက် ဘိန္နကမင်း လက်ထက်တွင် ပထမတကောင်း ပျက်စီးခဲ့ကြောင်း၊ ဒုတိယအကြိမ် ဓဇရာဇာမင်းက ပြန်လည်ထူထောင်ကာ မင်းပေါင်း ၁၇ ဆက် စိုးစံခဲ့ကြောင်း၊ ထို့ကြောင့် တကောင်းတွင် မင်းပေါင်း ၅၀ စိုးစံခဲ့ဖူးကြောင်း သမိုင်းမှတ်တမ်းများအရ သိရသည်။
