အသစ်ဖွင့်လှစ်လိုက်သည့် သာကေတတံတားသစ်နှင့် တံတားဟောင်းအား တွေ့ရစဉ် (ဓာတ်ပုံ- အောင်မျိုးသန့်)
သာကေတတံတားသစ် (ဒေါပုံ) ဖွင့်လှစ်ပြီးချိန်တွင် တံတားဟောင်းအားယာဉ်များ ဖြတ်သန်းသွားလာခွင့် မပြုတော့ဘဲ ပိတ်ထားမည်ဖြစ်ပြီး လာမည့်ဘဏ္ဍာနှစ်တွင် အပြီးသတ်ဖျက်သိမ်းသွားမည်ဖြစ်ကြောင်း ဆောက်လုပ်ရေးဝန်ကြီးဌာန၊ တံတားဦးစီးဌာနမှ သတင်းရရှိသည်။
ဂျပန်အစိုးရထောက်ပံ့ငွေဖြင့် တည်ဆောက်ခဲ့သည့် သာကေတတံတားသစ် (ဒေါပုံ) တည်ဆောက်ရေး လုပ်ငန်းများ ၉၅ ရာခိုင်နှုန်း ပြီးစီးပြီဖြစ်၍ ဇွန် ၁၀ရက်တွင် ယာဉ်များ ယာယီဖြတ်သန်းသွားလာခွင့်ပြုခဲ့သည်။ အဆို ပါတံတားအား လာမည့်သြဂုတ်လအတွင်း ဖွင့်လှစ်အသုံးပြုနိုင်မည် ဖြစ်သည်။
“လက်ရှိမှာ တံတားသစ်ဆောက်လုပ်ရေးက အကုန်လုံးမပြီးသေးဘဲ ကျန်နေတဲ့ လုပ်ငန်းစဉ်လေးတွေ ရှိနေသေးတယ်။ တံတားသစ်တည်ဆောက်ရေး လုပ်ငန်းတွေ အားလုံးပြီးလို့ ဖွင့်လှစ်ပြီးချိန်ကျရင်တော့ တံတားဟောင်းကို ပိတ်ထားမှာပါ။ ဖျက်သိမ်းဖို့အစီ အစဉ်ကတော့ ဂျပန်နိုင်ငံထောက်ပံ့ငွေထဲမှာ မပါဘဲ ဆောက်လုပ်ရေးဝန်ကြီးဌာနဘတ် ဂျက်နဲ့သာ လုပ်ရမှာဖြစ်လို့ လာမယ့်ဘဏ္ဍာနှစ်မှပဲ တံတားဟောင်း ဖျက်သိမ်းရေးလုပ်ငန်းတွေကို ဆောင်ရွက်သွားမှာပါ” ဟု ဆောက်လုပ်ရေးဝန်ကြီးဌာန တံတားဦးစီးဌာနမှ ဒုတိယညွှန်ကြားရေးမှူးချုပ် ဦးနေအောင်ရဲမြင့်က ဇွန် ၁၅ ရက်တွင် ပြောကြားသည်။
အဆိုပါသာကေတတံတားသစ်မှာ ရန်ကုန်တိုင်းဒေသကြီး ပုစွန်တောင်မြို့နယ်နှင့် ဒေါပုံမြို့နယ်သို့ ပုဇွန်တောင်ချောင်းကိုဖြတ်သန်းကာ တည်ဆောက်ထားခြင်း ဖြစ်သည်။ သာကေတတံတားသစ်အား ဂျပန်နိုင်ငံ၏ ကူညီထောက်ပံ့မှုဖြင့် ဂျပန်ယန်းငွေ ယန်း ၄၂၁၆ သန်း အကုန်ကျခံတည်ဆောက်ထားခြင်း ဖြစ်သည်။ တံတားအရှည်မှာ ပေ ၈၃၀ (၂၅၃ မီတာ) ရှည်ပြီး ၂၁ ဒသမ ၅ မီတာကျယ်ကာ ကြိုတင်အား ဖြည့်သံကူကွန်ကရစ်ကြိုးဆိုင်း တံတားအမျိုးအစား ဖြစ်သည်။ ယာဉ်သွားလမ်းဘေးတွင် တစ်ဖက်လျှင် နှစ်မီတာအကျယ်အဝန်းရှိ လူသွားလမ်းပလက်ဖောင်း အသွားအပြန်အား ထည့်သွင်းတည်ဆောက်ထားခြင်း ဖြစ်သည်။
လက်ရှိတွင် လျှပ်စစ်မီးတိုင်စိုက်ခြင်းနှင့် သွယ်တန်းခြင်းလုပ်ငန်းများ၊ လူသွားလမ်းကြောင်းအတွက် လမ်းခင်းခြင်းလုပ်ငန်းများ နှင့် ချဉ်းကပ်လမ်းဆက်ခြင်းလုပ်ငန်းများ ဆောင်ရွက်လျက်ရှိပြီး မိုးရာသီကာလတွင် တံတားမှ စီးကျလာမည့် ရေများအတွက် ရေမြောင်းစနစ်လုပ်ငန်းများသာ ဆောင်ရွက်ရန် ကျန်ရှိတော့ကြောင်း သိရသည်။ လာမည့် ဇူလိုင်လတွင် တံတားစီမံကိန်းတစ်ခုလုံး ရာနှုန်းပြည့်ပြီးစီးမည်ဖြစ်ပြီး သြဂုတ်လဆန်းပိုင်းတွင် တံတားအား ဖွင့်လှစ်နိုင်မည်ဟု သတင်းရရှိပါသည်။
သာကေတတံတားသစ်အား ပြန်လည်ပေးဆပ်စရာမလိုသည့် ဂျပန်နိုင်ငံ၏ ထောက်ပံ့ငွေဖြင့် တည်ဆောက်ခဲ့ခြင်းဖြစ်ပြီး တည်ဆောက်ရေးလုပ်ငန်းများကို ဂျပန်အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီ (JICA) နှင့် မြန်မာနိုင်ငံဆောက်လုပ်ရေး ဝန်ကြီးဌာနတို့ ပူးပေါင်းကာ လုပ်ဆောင်ခဲ့ခြင်း ဖြစ်သည်။
လက်ရှိ အသုံးပြုနေသော သာကေတတံတားသည် ၁၉၆၇ ခုနှစ်တွင် စတင် တည်ဆောက်ခဲ့ခြင်းဖြစ်ပြီး နှစ်ပေါင်း ၅၀ သက် တမ်းရှိပြီ ဖြစ်သည်။ ၂၀၁၃ ခုနှစ်တွင် ပြုလုပ်ခဲ့သော စစ်တမ်းများအရ တစ်ရက်လျှင် ကားအစီးရေ ၂၀၀၀၀ ကျော် ဖြတ်သန်းနေပြီး၊ လာမည့် ၂၀၂၁ ခုနှစ်တွင် ကားအစီးရေ ၅၀၀၀၀ ကျော်ဖြတ်သန်းမည်ဟု ခန့်မှန်းထားရာ တံတားဟောင်း၏ ခံနိုင်ဝန်အား ကျဆင်းလာခြင်းကြောင့် တံတားသစ်ထပ်မံ တည်ဆောက်ခြင်းဖြစ်ကြောင်း ဆောက်လုပ်ရေးဝန်ကြီးဌာန တံတားဦးစီးဌာနမှ သတင်းရရှိသည်။
သာကေတတံတားသစ်အား ဂျပန်နိုင်ငံ Nippon Koei ကုမ္ပဏီမှ Consultant အဖြစ်တာဝန်ယူပြီးThe Consortium of Tokyu – Toyo – IIK (Tokyu Construction Co.ltd . Toyo Construction Co.ltd and IHI Construction Co,ltd တို့မှ ၂၀၁၅ ခုနှစ် ဧပြီလပိုင်းက စတင်တည်ဆောက်ခဲ့ခြင်းဖြစ်ပြီး ဂျပန်ယန်းသန်းပေါင်း ၄၂၁၆ သန်းကုန်ကျကြောင်း သိရသည်။
