ဂျနီဖာလိုပက်ဇ်၊ ၎င်း၏လက်ရှိချစ်သူ ဘေ့စ်ဘောကစားသမား အဲလက်ရိုဒရီဂွက်ဇ်နှင့် ၎င်း၏ခင်ပွန်းဟောင်း မက်အန်တိုနီတို့သည် ဟာရီကိန်း ဒဏ်ခံခဲ့ရသည့် ပွာတိုရီကိုအတွက် ရန်ပုံငွေ ဒေါ်လာ ၃၅ သန်း ရှာဖွေပေးခဲ့သည်ဟု ပြောခွင့်ရပုဂ္ဂိုလ် တစ်ဦးက အောက်တိုဘာ ၁၇ ရက်တွင် ထုတ်ပြန်ခဲ့သည်။
ဂျနီဖာလိုပက်ဇ်၊ ရိုဒရီဂွက်ဇ်နှင့် မက်အန်တိုနီတို့က ရန်ပုံငွေ ကောက်ခံပေးခဲ့သည့်အပြင် သီးသန့်စီလည်း လှူဒါန်းခဲ့သည်ဟု သိရသည်။ ၎င်းတို့သုံးဦးက အစီအစဉ် တင်ဆက်သူများအဖြစ် ဆောင်ရွက်ခဲ့သည့် One Voice: Somos Live! ရန်ပုံငွေဖျော်ဖြေပွဲမှ ဒေါ်လာ ကိုးသန်းရရှိခဲ့ပြီး ကျန်ရှိသည့်ငွေများကို အဖွဲ့အစည်း လှူဒါန်းမှုများမှ ရရှိခဲ့သည်ဟု သိရသည်။ အောက်တိုဘာ ၁၄ ရက်က ပြုလုပ်ခဲ့သည့် ယင်းဖျော်ဖြေပွဲတွင် ရစ်ကီမာတင်၊ ဒီမီလိုဗာတို၊ ဂွမ်စတက်ဖနီ၊ စတိဗ်ဝမ်ဒါ၊ ဂျင်မီဖောက်စ်၊ Coldplay အဖွဲ့ခေါင်းဆောင် ခရစ်မာတင်နှင့် Maroon 5 အဖွဲ့တို့ ပါဝင်ဖျော်ဖြေခဲ့သည်။
ဂျနီဖာလိုပက်ဇ်နှင့် အန်တိုနီတို့၏ မိဘများသည် ပွာတိုရီကိုမှ အမေရိကန်သို့ ပြောင်းရွှေ့အခြေချခဲ့ခြင်းဖြစ်သည်။ ရိုဒရီဂွက်ဇ်၏ မိဘများသည် ဒိုမီနီကန်မှဖြစ်သည်။ အသက် ၄၈ နှစ်အရွယ်ရှိ လိုပက်ဇ်သည် စက်တင်ဘာ နှောင်းပိုင်းတွင် လပ်စ်ဗီးဂတ်ဖျော်ဖြေပွဲမှ ရရှိသည့် ဒေါ်လာတစ်သန်းကို ဟာရီကိန်းဒဏ်ခံခဲ့ရသည့် ပွာတိုရီကိုနှင့် ကာရစ်ဘီယံတွင် ပြန်လည်ထူထောင်ရေးများအတွက် လှူဒါန်းခဲ့သည်။
“နယူးယောက်မှာ နေထိုင်တဲ့ ကျွန်မနဲ့ အဲလက်ရိုဒရီဂွက်ဇ်က ပွာတိုရီကိုနဲ့ ကာရစ်ဘီယံမှာ ကယ်ဆယ်ရေးနဲ့ ပြန်လည်ထူထောင်ရေးတွေ လုပ်ဆောင်ရာမှာ ကူညီဖို့ အနုပညာ၊ အားကစားနဲ့ စီးပွားရေးနယ်ပယ်က ကျွန်မတို့ရဲ့ရင်းမြစ်တွေနဲ့ မိတ်ဆွေတွေကို တိုက်တွန်းခဲ့တယ်” ဟု လိုပက်ဇ်က ပြောကြားခဲ့သည်။
၂၀၀၄ ခုနှစ်တွင် လက်ထပ်ခဲ့ပြီး ၂၀၁၄ ခုနှစ်၌ မက်အန်တိုနီနှင့် ကွာရှင်းခဲ့သည်။ လိုပက်ဇ်သည် ယခုနှစ်အစောပိုင်းတွင် ရိုဒရီဂွက်ဇ်နှင့် တွဲခဲ့သည်။
