နိုဝင်ဘာ ၁၅ ရက်က နပိုလီယံသရဖူမှ ဖြုတ်ယူခဲ့သော ရွှေသစ်ရွက်အား ရိုက်ကူးထားစဉ် (Photo: AFP)

နပိုလီယာဘိုနာပတ် နန်းတက်ပွဲအတွင်းက ဝတ်စဉ်ခဲ့သည့် သရဖူမှဖြတ်ထုတ်ထားသော ရွှေသစ်ရွက်တစ်ခုကို ယူရို ၆၂၅၀၀၀ (ဒေါ်လာ ၇၃၅၀၀၀) ဖြင့် ပါရီတွင် နိုဝင်ဘာ ၁၉ ရက်က လေလံတင်ရောင်းချခဲ့ကြောင်း သိရသည်။ ထိုရောင်းချလိုက်သည့် ဈေးနှုန်းသည် မူလက ယူရို ၁၀၀,၀၀၀၊ ၁၅၀,၀၀၀ ရှိနိုင်သည်ဟု ခန့်မှန်းချက်ထက် အဆပေါင်းများစွာ ပိုမိုများပြားနေသည်ဟု Osenat လေလံလုပ်ငန်းက ထုတ်ပြန်ခဲ့သည်။

ယင်းရွှေသစ်ရွက်သည် ၁၈၀၄ ခုနှစ် နန်းတက်ပွဲမတိုင်မီက နပိုလီယံဘုရင်သည် ၎င်း၏သရဖူမှာ လေးလွန်းသည်ဟုထင်သဖြင့် သရဖူမှဖြတ်ထုတ်ခဲ့သည့် သစ်ရွက်ခြောက်ခုထဲမှ တစ်ခုဖြစ်သည်။ ရွှေပန်းထိမ်ဆရာ Martin Guillaume Biennais က ထိုရွှေသစ်ရွက်အပိုများကို ၎င်း၏သမီးများအား တစ်ယောက်တစ်ခုစီပြန်ပေးခဲ့သည်။ ယခုရောင်းချသည့် ရွှေသစ်ရွက်မှာ မျိုးရိုးစဉ်ဆက် လက်ဆင့်ကမ်းလာခဲ့ခြင်းဖြစ်သည်။

နပိုလီယံ နန်းတက်ပွဲအတွင်းမှ သရဖူတွင်ပါခဲ့သော်လည်း နောင်မှဖြုတ်ခဲ့သည့် ရွှေသစ်ရွက်တစ်ရွက်ကို ၁၉၈၀ ပြည့်နှစ်က ဖရန့် ၈၀၀၀၀ ဖြင့် ရောင်းချခဲ့ကြောင်း သိရသည်။ နိုဝင်ဘာ ၁၉ ရက်ကလေလံပွဲတွင် ပြင်သစ်ဧကရာဇ် နပိုလီယံနှင့် ဆက်စပ်သည့်ပစ္စည်း ၄၀၀ ဝန်းကျင်ပါဝင်ခဲ့သည်။ ယင်းတို့တွင် နပိုလီယံ၏ဇနီးဖြစ်သော မိဖုရားဂျိုဇက်ဖင်းပိုင်ဆိုင်သည့် ရွှေသစ်ရွက်များဖြင့် ထွင်းထုထားသော အလှဆင်သေတ္တာတစ်ခုလည်း ပါဝင်သည်။ ပန်းထိမ်ဆရာ Biennais ၏လက်ရာပင်ဖြစ်သည့် ယင်းသေတ္တာသည် မျှော်လင့်ထားသည်ထက် သုံးဆပို၍ဈေးရကာ ယူရို ၁၅၀၀၀၀ ဖြင့် ရောင်းနိုင်ခဲ့ကြောင်း သိရသည်။