မိုက်ကယ်ကျော်မြင့်အား တာမွေမြို့နယ် တရားရုံးတွင် နိုဝင်ဘာ ၂၀ ရက်က ရုံးထုတ်လာစဉ်
တာမွေမြို့နယ်တရားရုံးတွင် ရာဇသတ်ကြီးဥပဒေ ပုဒ်မ ၅၀၅ (ခ) ဖြင့် တရားစွဲခံထားရသည့် မိုက်ကယ်ကျော်မြင့်ကို နိုဝင်ဘာ ၂၀ ရက်က တာမွေမြို့နယ်တရားရုံး၌ ဆက်လက်ရုံးထုတ်ခဲ့ပြီး တရားလို ရန်ကုန်တိုင်းဒေသကြီးအစိုးရအဖွဲ့ အတွင်းရေးမှူး ဦးမိုးဟိန်းအား စတင်စစ်ဆေးခဲ့ကြောင်း သိရသည်။
ယခင်ရုံးချိန်းများက တရားလိုဖြစ်သူ ရန်ကုန်တိုင်းဒေသကြီးအစိုးရအဖွဲ့ ညွှန်ကြားရေးမှူး ဦးမိုးဟိန်းမှာ ခွင့်တိုင်ထားခြင်းကြောင့် အမှုကိုမစစ်ဆေးဖြစ်ခဲ့ဘဲ ယခုရုံးချိန်းမှ စတင်စစ်ဆေးခဲ့ခြင်းဖြစ်ကြောင်း သိရသည်။
ယင်းနေ့တွင်တရားစွဲခံရသူ မိုက်ကယ်ကျော်မြင့်က အာမခံလျှောက်ထားခဲ့သော်လည်း အမှုမှာ အာမခံပေး၍မရသည့် ပုဒ်မဖြစ်သဖြင့် တရားသူကြီးက အာမခံမပေးခဲ့ကြောင်း သိရသည်။
မိုက်ကယ်ကျော်မြင့်က ကျန်းမာရေးမကောင်းကြောင်း၊ အခြားတရားရုံးများ၌ တရားစွဲခံထားရကြောင်း၊ ထိုတရားစွဲခံခဲ့ရသည့် တရားရုံးများတွင် အာမခံရရှိခဲ့ကြောင်း စသည့်အကြောင်းအရာများဖြင့် အာမခံလျှောက်ထားခဲ့ခြင်းဖြစ်သည်။
ထို့ပြင် ယင်းနေ့တွင် အဆိုပါတရားရုံး၌ စွဲဆိုထားသည့် ငြိမ်းစုစီဥပဒေပုဒ်မ ၁၉ နှင့်ပတ်သက်လည်း ဆက်လက်စစ်ဆေးခဲ့ကြောင်း သိရသည်။
ဇွန် ၂ ရက်က တာမွေမြို့နယ်ရှိ ဟစ်တိုင်တွင်ပြုလုပ်ခဲ့သည့် သတင်းစာရှင်းလင်းပွဲ အကြောင်းအရာများသည် ရန်ကုန်တိုင်းဒေသကြီးအစိုးရအဖွဲ့ကို အများပြည်သူ၏ အကြည်ညိုပျက်စေရန်၊ ထိတ်လန့်ကြောက်ရွံ့စေရန် အကြံဖြင့် မမှန်မကန်ကောလာဟလဖြန့်ဝေပြီး ပြည်သူလူထုမှ အစိုးရအဖွဲ့အပေါ် ပြစ်မှုကျူးလွန်ချင်လာအောင် အများပြည်သူကို မဟုတ်မမှန် လုပ်ကြံကောလာဟလဖြန့်ဝေသည်ဟုဆိုကာ မိုက်ကယ်ကျော်မြင့်ကို နိုင်ငံတော်အကြည်ညိုပျက်စေမှု ပုဒ်မ ၅၀၅ ဖြင့် တရားစွဲဆိုခဲ့ခြင်းဖြစ်သည်။
ရန်ကုန်တိုင်းဒေသကြီးအစိုးရအဖွဲ့ ညွှန်ကြားရေးမှူး ဦးမိုးဟိန်း၏ တရားစွဲဆိုမှုအား တာမွေမြို့နယ် တရားသူကြီးကလက်ခံကာ မိုက်ကယ်ကျော်မြင့်အား ခံဝန်မဲ့ဖြင့် ဖမ်းဝရမ်းထုတ်ဆင့်ပေးခဲ့ရာ မိုက်ကယ်ကျော်မြင့်အား ရဲတပ်ဖွဲ့က ဖမ်းဆီးခဲ့သည်။
မိုက်ကယ်ကျော်မြင့်မှာ အဖမ်းမခံရမီက အောက်တိုဘာ ၂၄ ရက်၌ တာမွေမြို့နယ်၊ ကျိုက္ကဆံကွင်းအတွင်းရှိ ဟစ်တိုင်တွင် အင်အား ၅၀၀ခန့်ဖြင့် ရန်ကုန်တိုင်းဒေသကြီး ဝန်ကြီးချုပ်အား ဆန္ဒထုတ်ဖော်ရန်စီစဉ်ခဲ့ပြီး ယင်းသို့ ဆန္ဒထုတ်ဖော်မှုမပြုလုပ်မီ တစ်ရက်အလိုတွင် ဖမ်းဆီးခံရခြင်းဖြစ်သည်။
မိုက်ကယ်ကျော်မြင့်သည် ဇွန်၂ ရက်ကလည်း တာမွေမြို့နယ် ကျိုက္ကဆံအားကစားကွင်းအတွင်းရှိ ဟစ်တိုင်အနီးတွင် ဗိုလ်ဗထူး တန်ဖိုးမျှတအိမ်ရာစီမံကိန်းအပိုင်း (၂) အကောင်အထည်ဖော်နေသည့် မြေယာကိစ္စများနှင့်ပတ်သက်၍ ရန်ကုန်တိုင်းဝန်ကြီးချုပ်၏ ကိုယ်ရေးအရာရှိ ဦးတင်ထွန်းဆိုသူက ငွေကြေးများ လာဘ်ယူခဲ့သည်ဟုဆိုကာ ၎င်း၏လူမှုကွန်ရက်စာမျက်နှာမှတစ်ဆင့် သတင်းစာရှင်းလင်းပွဲပြုလုပ်မည်ဟု ကြေညာခဲ့သည်။
ထို့နောက် သတင်းစာရှင်းလင်းပွဲကို ဗဟန်းမြို့နယ်ရှိ တော်ဝင်နှင်းဆီခန်းမတွင် ရှင်းလင်းမည်ဟု ကြေညာထားသော်လည်း ရှင်းလင်းခွင့်မရရှိခဲ့ကြောင်း၊ ထို့ကြောင့် ယုဇနဟိုတယ်သို့ပြောင်းရွှေ့၍ သတင်းစာရှင်းလင်းရန် စီစဉ်ခဲ့သော်လည်း အဆင်မပြေသဖြင့် တာမွေမြို့နယ် ကျိုက္ကဆံကွင်းအတွင်းရှိ ဟစ်တိုင်တွင် သတင်းစာရှင်းလင်းခဲ့ကြောင်း သိရသည်။
ထိုသို့ သတင်းစာရှင်းလင်းမှုနှင့် ပတ်သက်ပြီး တာမွေမြို့မရဲစခန်းတွင် ငြိမ်း၊ စု၊ စီ ပုဒ်မ ၁၉ ဖြင့်အမှုဖွင့်ခံရကာ လက်ရှိတွင် တရားရင်ဆိုင်ရလျက်ရှိသည်။
ထို့ပြင် ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်းအား အသရေပျက်စေရန် ပြီးခဲ့သည့်မေအတွင်းက မိုက်ကယ်ကျော်မြင့်သည် ၎င်းဖေ့ဘွတ်စ်တွင် ရေးသားခြင်း၊ မမှန်စွပ်စွဲခြင်းများ ပြုလုပ်သည်ဟုဆိုကာ ရန်ကုန်တိုင်းဒေသကြီး အစိုးရအဖွဲ့မှ ညွန်ကြားရေးမှူး ဦးမိုးဟိန်းက ဒဂုံမြို့နယ်တရားရုံးတွင် ဆက်သွယ်ရေးဥပဒေပုဒ်မ ၆၆ (ဃ)၊ ရာဇသတ်ကြီး ဥပဒေပုဒ်မ၂၁၁ တို့ဖြင့် ဇွန်လအတွင်းက တရားစွဲဆိုခဲ့ကြောင်း သိရသည်။
ထို့ပြင် မြောက်ဒဂုံမြို့နယ် အထွေထွေအုပ်ချုပ်ရေးမှူးရုံးကလည်း မိုက်ကယ်ကျော်မြင့်အား ခြေချုပ်နှင့် ခံဝန်အက်ဥပဒေပုဒ်မ ၅ (၁)(စ)(ဆ) ဖြင့်အရေးယူပေးရန် မြောက်ဒဂုံမြို့မရဲစခန်းသို့ တိုင်တန်းခဲ့သဖြင့် မြောက်ဒဂုံမြို့မရဲစခန်းမှ ဖမ်းဆီးခဲ့ပြီး အမှုရင်ဆိုင်ခဲ့ရကြောင်း သိရသည်။
