Photo: AFP
ပြီးခဲ့သည့်စနေနေ့က ကစားခဲ့သော ဝက်စ် ဟမ်း (၁-၄) လီဗာပူးလ်ပွဲအပြီး၌ ဝက်စ်ဟမ်းအသင်းနည်းပြ ဘီလစ်က သူ၏အနာဂတ်အတွက် အသင်းပိုင်ရှင်များနှင့် ဆွေးနွေးရမည်ဖြစ်ကြောင်း ဝန်ခံပြောကြားခဲ့သည်။ ဝက်စ်ဟမ်းအသင်း ထိပ်တန်းတာဝန်ရှိသူများအနေဖြင့် မိမိ၏အနာဂတ်ကို အာမခံချက် ပေးမည်၊ မပေးမည်ဆိုသည်အား မသိရှိကြောင်းလည်း လီဗာပူးလ်အား ရှုံးနိမ့်ခဲ့သောပွဲအပြီး ဘီလစ်က ဝန်ခံပြောကြားခဲ့သည်။
ယင်းပွဲရှုံးနိမ့်မှုမှာ နောက်ဆုံးကစားခဲ့သော ပရီးမီးယားလိဂ်အိမ်ကွင်းပွဲစဉ် (၄)ပွဲတွင် (၃)ပွဲမြောက်ရှုံးနိမ့်မှုဖြစ်ပြီး နောက်ဆုံးကစားခဲ့သော အိမ်ကွင်းပွဲစဉ်(၂)ပွဲတွင် (၇)ဂိုးအထိ ပေးခဲ့ရခြင်းလည်းဖြစ်သည်။ အသင်းအနေဖြင့် အမှတ်ပေးဇယား အောက်ခြေပိုင်းသို့ ရောက်ရှိနေပြီး တန်းမဆင်းရရန် ရုန်းကန်ရမည့်အနေအထားသို့ ရောက်ရှိနေရာ ဘီလစ်မှာ ဝက်စ်ဟမ်းအသင်းနည်းပြရာထူးမှ ထုတ်ပယ်ခံရရန် ထိပ်ဆုံးမှ ရေပန်းစားလာကြောင်း သိရှိရသည်။
လက်ရှိ ဘောလုံးဘွတ်ကီဒိုင်များ၏ နောက်ထုတ်ပယ်ခံရမည့် ပရီးမီးယားလိဂ်နည်းပြအလေးပေးမှုတွင် ဘီလစ်မှာ (၂း၁)လေးဖြင့် ထိပ်ဆုံးမှ ဦးဆောင်နေကြောင်း သိရှိရသည်။ လီဗာပူးလ်နှင့်ပွဲအပြီးတွင် " ကျွန်တော် အသင်း ပိုင်ရှင်နဲ့ တွေ့ဆုံဖို့ရှိနေပါတယ်။ ဒီရှုံးပွဲအတွက် တွေ့ဆုံစကား ပြောရမှာပါ။ ဒါဟာ အိမ်ကွင်းမှာ (၂)ပွဲဆက် ရှုံးပွဲတွေ့တာပါ။ ကျွန်တော့်ရဲ့လက်ရှိအခြေအနေက အလွန်ခက်ခဲလွန်းပါတယ်" ဟု ဘီလစ်က ပြောကြားခဲ့သည်။
လက်ရှိအချိန်တွင် ဘီလစ်၏နေရာကို အဲဗာတန်နှင့် မန်ယူနည်းပြဟောင်း ဒေးဗစ်မွိုက်စ်နှင့် အစားထိုးတော့မည်ဟု ဗြိတိန်သတင်းစာများကလည်း ဖော်ပြလျက်ရှိ နေကြသည်။ ဝက်စ်ဟမ်းအသင်းပိုင်ရှင်များအနေဖြင့် ဘီလစ်အပေါ် စိတ်ရှည်သည်းခံမှု ကုန်ဆုံးသွားပြီဖြစ် ပြီး လာမည့်နိုင်ငံတကာရက်သတ္တပတ်အတွင်း နည်းပြ အပြောင်းအလဲ ပြုလုပ်လိမ့်မည်ဟု ဗြိတိန်သတင်းစာ Mirror က ဖော်ပြခဲ့သည်။
ဝက်စ်ဟမ်းအသင်းသည် ပရီးမီးယားလိဂ်ပွဲစဉ်(၁၁)ပွဲကစားထားရာ၌ နိုင်ပွဲ(၂)ပွဲသာရရှိပြီး (၃)ပွဲသရေကျကာ (၆)ပွဲအထိ ရှုံးနိမ့်ထားသည်။ ဘီလစ်နေရာ အစားထိုးမည်ဟု ရေပန်းစားနေသူ ဒေးဗစ်မွိုက်စ်မှာ ပရက်စတန်၊ အဲဗာတန်၊ မန်ယူ၊ ဆိုစီဒက်၊ ဆန်းဒါးလန်း အစရှိသော အသင်းများကို ကိုင်တွယ်ခဲ့ သူဖြစ်ပြီး အဲဗာတန်အသင်းကလည်း ၎င်းကို နည်းပြအဖြစ် ပြန် လည်ခန့်အပ်ရန် ပစ်မှတ်ထားနေကြောင်း သတင်းများ ထွက်ပေါ် နေ သည်။
