Photo: Reuters

အာဆင်နယ်အသင်းသည် ယခုလအစောပိုင်းက ဘာစီလိုနာအသင်းနှင့် လမ်းခွဲထားသည့် အပြောင်းအရွှေ့ဒါရိုက်တာ ရာအူးလ်ဆန်လီဟီကို ခေါ်ယူရန် သဘောတူညီမှု ရရှိခဲ့ပြီဖြစ်ကြောင်း စပိန်သတင်းစာ Sport ၏ ဖော်ပြမှုကို ကိုးကား၍ ဗြိတိန်မီဒီယာများက ဖော်ပြလျက်ရှိသည်။

ဆန်လီဟီသည် ဘာစီလိုနာအသင်းတွင် ရာထူးတာဝန်အမျိုးမျိုးဖြင့် (၁၅)နှစ်ခန့် ဖြတ်သန်းခဲ့သူဖြစ်ပြီး အားကစားဒါရိုက်တာအဖြစ်လည်း ဆောင်ရွက်ခဲ့ဖူးသူဖြစ်သည်။

ထင်ရှားခဲ့သည်မှာ အပြောင်းအရွှေ့လှုပ်ရှားမှုများကို တာဝန်ယူရသည့် ဒါရိုက်တာတစ်ဦးအနေဖြင့်ဖြစ်ပြီး နေမာ၊ အလက်ဆစ်ဆန်းချက်ဇ်နှင့် လူးဝစ်ဆွာရက်ဇ်တို့ကို ဘာစီလိုနာအသင်းထံ ခေါ်ယူပေးနိုင်ခဲ့သူဖြစ်သည်။

သို့သော် လက်ရှိအသင်းဥက္ကဋ္ဌ ဘာတိုမူ၏ ပြုပြင်ပြောင်းလဲရေးအစီအစဉ်များနှင့် အံဝင်ခွင်ကျမရှိတော့ဟု ယူဆသည့်အတွက် ရာထူးမှ နုတ်ထွက်ခဲ့ခြင်းဖြစ်ကြောင်း သိရှိရသည်။

ဆန်လီဟီကို အာဆင်နယ်အသင်းနှင့်အတူ မန်စီးတီးအသင်းကလည်း ခေါ်ယူရန် စိတ်ဝင်စားခဲ့ပြီး အာဆင်နယ်အသင်းက လက်ဦးမှုရယူနိုင်ခဲ့ခြင်းဖြစ်ကြောင်း သိရှိရသည်။

အာဆင်နယ်အသင်း၏ အမှုဆောင်ချုပ် ဂါဇီဒစ်သည် ဆန်လီဟီနှင့် အလွန်ရင်းနှီးသူဖြစ်ခြင်းကြောင့် သဘောတူညီမှုရယူနိုင်ခဲ့ခြင်းဖြစ်ပြီး ဆန်လီဟီကို အပြောင်းအရွှေ့လှုပ်ရှားမှုကို အဓိကကြီးကြပ်ရမည့် အားကစားဒါရိုက်တာအဖြစ် တာဝန်ပေးဖွယ်ရှိကြောင်း သိရှိရသည်။

ယခင်က အာဆင်နယ်အသင်း၏ အပြောင်းအရွှေ့လှုပ်ရှားမှုများကို ဦးဆောင်ခဲ့သည့် ဒစ်ခ်လောမှာလည်း နွေရာသီအပြောင်းအရွှေ့ကာလတွင် ပစ်မှတ်ကစားသမားများကို ခေါ်ယူနိုင်ခြင်းမရှိသည့်အတွက် ပြီးခဲ့သည့်လက ရာထူးမှ နုတ်ထွက်သွားခဲ့ကြောင်း သိရှိရသည်။