ပြီးခဲ့သည့် ၂၀၁၆-၂၀၁၇ ရာသီ ချန်ပီယံလိဂ်ပြိုင်ပွဲတွင် ဂျူဗင်တပ်စ်အသင်းက ဆုကြေးအများဆုံးရရှိခဲ့ပြီး လက်စတာကလည်း နှစ်ကြိမ်ဆက်ချန်ပီယံ ရီးယဲလ်အသင်းထက် ဆုကြေးပိုမိုရရှိခဲ့ကြောင်း သိရသည်။
ဥရောပဘောလုံးအဖွဲ့ချုပ် (UEFA)သည် အုပ်စုအဆင့်မှစ၍ အဆင့်အလိုက် ဆုကြေးများပေးအပ်ချီးမြှင့်ပြီး အင်္ဂလန်နှင့် အီတလီကလပ်များက ရုပ်သံဝင်ငွေခွဲတမ်း ပိုများသဖြင့် စုစုပေါင်းဆုကြေးရရှိမှုစာရင်းတွင် ချန်ပီယံရီးယဲလ်၏အထက် ရပ်တည်နိုင်ခြင်းဖြစ်သည်။
ဗိုလ်လုပွဲတွင် ရှုံးနိမ့်ခဲ့သည့် ဂျူဗင်တပ်စ်အသင်းသည် ယူရို ၁၁၀ ဒသမ ၄ သန်းဖြင့် ဆုကြေးအများဆုံးရရှိပြီး ပထမဆုံးအကြိမ် ဝင်ရောက်ယှဉ်ပြိုင်ကာ ကွာတားအဆင့်ရောက်ရှိခဲ့သည့် လက်စတာက ယူရို ၈၁ ဒသမ ၆ သန်း၊ ချန်ပီယံရီးယဲလ် က ယူရို ၈၁ သန်း၊ နာပိုလီက ယူရို ၆၆ သန်း၊ မိုနာကိုက ယူရို ၆၄ ဒသမ ၆ သန်းနှင့် အာဆင်နယ်က ယူရို ၆၄ ဒသမ ၅ သန်းရရှိခဲ့သည်။
Photo: City AM
လက်စတာအသင်းသည် ရုပ်သံလွှင့်ခွင့်အပါအဝင် ဈေးကွက်ဆိုင်ရာကဏ္ဍမှ ယူရို ၄၉ ဒသမ ၁ သန်းအထိရရှိခဲ့ပြီး အခြားအသင်းအားလုံးထက် အများဆုံးရရှိခဲ့ကြောင်း သိရသည်။ ယူရိုပါလိဂ်ပြိုင်ပွဲတွင် ချန်ပီယံမန်ယူ အသင်းက ဆုကြေး ယူရို ၄၄ ဒသမ ၅ သန်း ဖြင့် ပြိုင်ပွဲဝင်အသင်းများအနက် အများဆုံးအဖြစ် ရပ်တည်နိုင်ခဲ့သည်။
