ဧရာဝတီတိုင်းဒေသကြီးအတွင်းရှိ ဌာနဆိုင်ရာများတွင် တာဝန်ထမ်းဆောင်နေသော အင်ဂျင်နီယာများအပြင် ပြင်ပလုပ်ငန်းများတွင် လုပ်ဆောင်နေသည့် အင်ဂျင်နီယာများ နည်းပညာတက္ကသိုလ်များမှ ကျောင်းသားကျောင်းသူများအတွက် လိုအပ်သည့် RE, RSE, AEC လက်မှတ်များအတွက် သင်တန်းများနှင့် စာမေးပွဲဖြေဆိုခြင်းအား မြန်မာနိုင်ငံ အင်ဂျင်နီယာအသင်း (ပုသိမ်) တွင် ပြုလုပ်ပေးနိုင်ရန် စီမံဆောင်ရွက်နေကြောင်း သတင်းရရှိသည်။
မြန်မာနိုင်ငံ အင်ဂျင်နီယာကောင်စီမှ အရည်အချင်း စိစစ်ပြီး ထုတ်ပေးနေသည့် RE, RSE, AEC လက်မှတ်များ ရရှိနိုင်ရေးအတွက် ယခင်က ရန်ကုန်မြို့ရှိ မြန်မာနိုင်ငံ အင်ဂျင်နီယာအသင်းရုံးချုပ်၌ စာမေးပွဲဖြေဆို၍ ထုတ်ပေးလျက်ရှိရာမှ ပုသိမ်မြို့ရှိ မြန်မာနိုင်ငံ အင်ဂျင်နီယာအသင်းရုံးတွင်လည်း သင်တန်းများပေးကာ စာမေးပွဲစစ်ဆေးခြင်း၊ လက်မှတ်များ ထုတ်ပေးခြင်းများကို ပြုလုပ်ပေးမည်ဖြစ်ကြောင်း၊ တိုင်းဒေသကြီးအတွင်းရှိ ဌာနဆိုင်ရာများမှ အင်ဂျင်နီယာများမှာ ယခုကဲ့သို့ တိုင်းဒေသကြီးတစ်ခုတည်းတွင် စာမေးပွဲဖြေဆိုရခြင်း၊ သင်တန်းများ တက်ရောက်ခွင့် ရရှိခြင်းများကြောင့် ယခင်ထက် ပိုမိုအဆင်ပြေလာမည်ဖြစ်ကြောင်း သိရသည်။
“RE, RSE ပေါ့။ PE ကတော့ ရန်ကုန်က ရုံးချုပ်မှာပဲ ဖြေရပါမယ်။ RE, RSE, AEC အတွက်ကိုတော့ နယ်တွေမှာလာပြီးတော့ စာစစ်ဌာန ဖွင့်လို့ရအောင်ဆိုပြီးတော့ MES ကနေပြီးတော့ နယ်အသင်းခွဲတွေကို အကုန်လုံးကို ပေးထားပါတယ်၊ ကျွန်တော်တို့ အသင်းခွဲက လုပ်နေတာက အသင်းခွဲမှာဖြေမယ့်သူဦးရေ အနည်းဆုံး ၅၀ ရှိရမယ်ပြောတော့ ၅၀ ပြည့်အောင်တော့ စောင့်နေတယ် ၅၀ မကျော်ပေမဲ့လည်း ကျွန်တော်တို့ တင်ပြထားတော့ ၃၀ ကျော်လို့ရှိရင် သူတို့ဆင်းလာမယ်လို့ နှုတ်စကား ရထားတယ်။ သူတို့တွေလည်း စာမေးပွဲဖြေနိုင်အောင်လို့ စာမေးပွဲ မဖြေခင်မှာလည်း ကျွန်တော်တို့ ဧရာဝတီတိုင်းထဲမှာရှိတဲ့ RE, PE တွေကနေ အသင်းနဲ့ချိတ်ဆက်ပြီး သင်တန်းလေးတွေ ဖွင့်ပေးဖို့ လုပ်နေတယ်၊ ဝန်ထမ်းတွေကျ နယ်ကျော်ပြီး သင်တန်းသွားဖို့က အဆင်မပြေတော့ အခုလို သင်တန်းဖွင့်ပေးတာ ဒီမှာတင်ဖြေရတာ အဆင်ပြေတာပေါ့” ဟု မြန်မာနိုင်ငံ အင်ဂျင်နီယာအသင်း (ပုသိမ်) ဥက္ကဋ္ဌ ကိုလင်းလင်းက ပြောကြားသည်။
တိုင်းဒေသကြီးအတွင်းရှိ ဌာနဆိုင်ရာများမှ အင်ဂျင်နီယာများနှင့် နည်းပညာတက္ကသိုလ်ကျောင်းသားများအတွက် အစိုးရပိုင်းက ကူညီဆောင်ရွက်မှု ပြုလုပ်နေသည်။
“အခုဆိုရင် ကျွန်တော်တို့မှာ အာဆီယံနိုင်ငံတွေနဲ့ ပေါင်းစပ်ပြီးတော့ RSE, PE စသည်အားဖြင့် Professional လက်မှတ်တွေပေးနေတဲ့အခါမှာ သင်တန်းအချိန် ကာလတွေ လိုတာပေါ့။ CPD တို့ PDP အချိန်တွေ နာရီတွေ လိုတယ်။ ဘယ်လောက်သင်တန်းတက်ခဲ့လဲဆိုတာကို မူတည်ပြီးတော့မှ စောစောကလိုမျိုး PE, RSE တွေ ဖြေရတာရှိတယ်။ အခုဆိုလို့ရှိရင် ရန်ကုန်မှာပဲ သွားဖြေစရာမလိုဘဲနဲ့ အင်ဂျင်နီယာအသင်း (ပုသိမ်) မှာပဲ ဖြေလို့ရအောင်၊ သင်တန်းတွေ ပေးလို့ရအောင် ကြိုးစားပြီး ဆောင်ရွက်နေတာ ရှိပါတယ်။ အစိုးရဘက်ကလည်း တစ်တိုင်းလုံးမှာရှိတဲ့ အင်ဂျင်နီယာတွေ ဌာနဆိုင်ရာတွေမှာရှိတဲ့ အင်ဂျင်နီယာတွေရော၊ နည်းပညာတက္ကသိုလ်သုံးခုက ကျောင်းသားတွေရောကို ဒီအသင်းထဲကိုဝင်နိုင်အောင် ဝင်ဖို့ကို ပံ့ပိုးမှုတွေ လုပ်သွားမှာပါ” ဟု မြန်မာနိုင်ငံ အင်ဂျင်နီယာအသင်း (ပုသိမ်) ၏ နာယကတစ်ဦးလည်းဖြစ်ပြီး ဧရာဝတီတိုင်းဒေသကြီးအစိုးရအဖွဲ့ဝင် လျှပ်စစ်၊ လမ်းပန်းနှင့် စက်မှုဝန်ကြီး ဦးဝင်းဌေးက ဆိုသည်။
