တောင်ငူမြို့ သဘာဝဘေးအန္တရာယ် ကယ်ဆယ်ရေးအဖွဲ့မှ တောင်ငူမြို့တွင်း၌ H1N1 ကာကွယ်ရေး Mask တပ်ဆင်ခြင်းနှင့် ပညာပေးလုပ်ငန်းများ ဆောင်ရွက်နေသည်ကို တွေ့ရစဉ် (ဓာတ်ပုံ - သဘာဝဘေးအန္တရာယ်ကယ်ဆယ်ရေးအဖွဲ့၊ DR)
ပဲခူးတိုင်းဒေသကြီး တောင်ငူမြို့ အ.ထ. က (၇) ကန်လမ်းကျောင်းမှ အသက် ၁၂ နှစ်အရွယ် သတ္တမတန်းကျောင်းသူတစ်ဦးတွင် H1N1 ကူးစက်ခံရကြောင်း သက်ဆိုင်ရာ တာဝန်ရှိသူများထံမှသိရပြီး ယင်းဖြစ်စဉ်နှင့် ပတ်သက်ပြီး ကျောင်းပိတ်မည်မဟုတ်ဘဲ ပုံမှန်အတိုင်း ဆက်ဖွင့်သွားမည်ဖြစ်ကြောင်း သိရသည်။
“ကျွန်တော် တိုင်းရုံးနဲ့အခုပဲ အဆက်အသွယ်ရတယ်။ ကလေးကတော့ ၁၂ နှစ်အရွယ် သတ္တမတန်းပေါ့။ ရပ်ကွက်ကတော့ (၁၂) ရပ်ကွက်ပေါ့။ ကျောင်းကတော့ကန်လမ်းကျောင်းပေါ့၊ အဲဒါကျွန်တော်တို့ အခုလောလောဆယ်တော့ သူတို့အိမ်နားမှာ ကျန်းမာရေးဂျူတီချပြီးတော့ တောက်လျှောက်စစ်နေတယ်။ သုံးသပ်ချက်ကတော့ နံပါတ်တစ်က သူကနဂိုက ကင်ဆာကလေးလေ၊ ကင်ဆာကလေးဆိုတော့ ကင်ဆာဆေးတောက်လျှောက် သွင်းနေရတော့ ကိုယ်ခံအားနည်းနေတယ်၊ နံပါတ် (၂) ကတော့ သူက ရန်ကုန်ကို တစ်လတစ်ခါ သွားနေရတော့ ရန်ကုန်ကနေ ကူးတဲ့ပုံစံမျိုး လောလောဆယ် ကျွန်တော်တို့ သုံးသပ်တယ်။ ဒါပေမဲ့ မသေချာသေးဘူး။ အဲဒီနားကလူတွေကိုလည်း ကျွန်တော်တို့ စစ်ရဦးမှာ၊ သုံးသပ်ချက်ကို ပြောပြတာပါ” ဟု တောင်ငူမြို့နယ် ပြည်သူ့ဆေးရုံမှ တာဝန်ရှိသူတစ်ဦးက ပြောကြားသည်။
အဆိုပါ ကလေးမှာ တောင်ငူမြို့ ၁၂ ရပ်ကွက်၊ တိရစ္ဆာန်ရုံးဟောင်းလမ်းနေထိုင်သူ မထက်ထက်အောင် (၁၂ နှစ်)၊ သတ္တမတန်း အ.ထ.က(၇) ကန်လမ်း၊ တောင်ငူမှ ကျောင်းသူဖြစ်ကြောင်း၊ ကင်ဆာရောဂါဝေဒနာကြောင့် တစ်လတစ်ကြိမ် ရန်ကုန်သို့ သွားရောက်ကာ ကင်ဆာဆေးသွင်းနေရသူဖြစ်ပြီး နဂိုကတည်းက အားနည်းနေသူဖြစ်ကြောင်း၊ ပြီးခဲ့သည့် ဇူလိုင် ၃၀ ရက်တွင် ရန်ကုန်ဆေးရုံကြီးသို့ သွားရောက်ပြသစဉ် H1N1 (Positive) ဖြစ်သည်ကို တွေ့ရှိခဲ့ရခြင်းဖြစ်ကြောင်း၊ အဆိုပါ H1N1 (Positive) ဖြစ်နေသော သတ္တမတန်းကျောင်းသူတွင် ညီမအရင်းတစ်ယောက်ရှိပြီး ၎င်းအားသူမ၏နေအိမ်မှ အခြားနေရာတွင်ရှိသော အဘွားအိမ်သို့ တာဝန်ရှိသူများက ပို့ဆောင်ပေးထားကြောင်း သိရသည်။
“အဲဒီကလေးအိမ်ကို ကျွန်မရောက်ပြီးသွားပြီ အဲဒီကလေးက နဂိုကတည်းက ကင်ဆာရောဂါ ခံစားနေရတာ၊ ကျွန်မတို့ကျောင်းက ဆရာ ဆရာမတွေ အကုန်လုံးပေါင်းပြီး စရိတ်ထောက်ပြီးတော့ ကုနေရတာလေ၊ ကျွန်မသုံးသပ်ကြည့်တာတော့ ရန်ကုန်ဆေးရုံမှာပဲ ဖြစ်သွားတာလို့ ထင်တာပေါ့၊ အဲဒီကလေးနဲ့ အတူတူထိုင်တဲ့ ကလေးတွေအိမ်ကိုလည်း ကျွန်မရောက်ပြီးသွားပြီ။ အတန်းထဲမှာ နဂိုသူ့ဟာသူဖျားတဲ့ကလေးတွေလည်း ရှိတာပေ့ါ၊ အဲဒါတွေအားလုံးကို သူတို့မိဘတွေနဲ့ ချိတ်ဆက်ပြီးတော့ လောလောဆယ် ဖျားနာတဲ့ ကလေးတွေကို ကျောင်းမလွှတ်ဘဲနဲ့ စောင့်ကြည့်ဖို့ H1N1 ရောဂါလက္ခဏာနဲ့ ပတ်သက်တဲ့လက္ခဏာတွေကို ပြောပြပြီးတော့မှ သူတို့ကိုတော့ ကျောင်းကိုမလွှတ်ဖု့ိ ပြောပြထားတယ်။ ကျောင်းပိတ်ဖို့အထိတော့ မလိုပါဘူး။ ကလေးတွေကို ကျွန်မတို့ စောင့်ကြည့်ဖို့ပဲလိုတယ်ဆိုတာ ပြောထားတယ်။ ဟိုကလေးကတော့ Confirm ဖြစ်တယ်” ဟု အ.ထ.က (၇) ကန်လမ်းကျောင်းမှ ကျောင်းအုပ်ဆရာမကြီး ဒေါ်မြင့်မြင့်ရီက ဆိုသည်။
ထို့ပြင် တောင်ငူပြည်သူ့ဆေးရုံကြီးတွင် ဆေးကုသမှုခံယူနေသူများအနက် အသက် (၁၈ နှစ်) အရွယ်ရှိပြီး နှလုံးရောဂါအခံရှိနေသော အမျိုးသားတစ်ဦးအား အခြားလူနာများနှင့် ရောနှောထားခြင်းမရှိဘဲ ၎င်း၏သွေးနှင့် လည်ချောင်းအတွင်းမှ အရည်များအား စစ်ဆေးမှုများ ပြုလုပ်ထားခဲ့ရာတွင် သွေးအဖြေမှာ Negative ရရှိထားကြောင်း၊ ၎င်း၏လည်ချောင်းအတွင်းမှ အရည်ကို ရန်ကုန်သို့ပေးပို့ စစ်ဆေးနေဆဲဖြစ်သဖြင့် H1N1 Positive ဖြစ် မဖြစ်အား အတည်မပြုနိုင်သေးကြောင်း၊ ကနဦးစစ်ဆေး၍ ရရှိသော သွေးအဖြေမှာ Negative ဖြစ်သောကြောင့် အဆိုပါ အမျိုးသားမှာ H1N1 ဖြစ်နိုင်ခြေ ၂၅ ရာခိုင်နှုန်းခန့်သာ ရှိတော့ပြီး စိုးရိမ်စရာမရှိသေးသော အနေအထားတွင် ရှိနေကြောင်း တောင်ငူမြို့ပြည်သူ့ဆေးရုံမှ တာဝန်ရှိသူတစ်ဦးက ပြောကြားသည်။
Writter: ဇော်ဝင်းချစ် (တောင်ငူ)
