Photo: AP
ဘာစီလိုနာအသင်းသည် နူးကမ့်ကွင်း၏အမည်ကို ဥရောပထိပ်တန်း ဆေးဝါးကုမ္ပဏီ Grifols ထံ နှစ်(၃၀)စာချုပ်ဖြင့် ရောင်းချရန် နီးစပ်နေပြီဖြစ်ကြောင်း စပိန်မီဒီယာများစွာက ဖော်ပြနေကြသော်လည်း Grifols ကုမ္ပဏီက ငြင်းဆန်ခဲ့ကြောင်း သိရှိရသည်။
Grifols ကုမ္ပဏီသည် စပိန်နိုင်ငံ၊ ဘာစီလိုနာမြို့တွင် အခြေစိုက်ထားသည့် ကုမ္ပဏီဖြစ်ပြီး ဘာစီလိုနာအသင်း၏ကွင်းအမည်ကို ဝယ်ယူရန် လွန်ခဲ့သည့်(၂)နှစ်ခန့်ကတည်းက စတင်ဆွေးနွေးခဲ့ခြင်းဖြစ်ကြောင်း သိရှိရသည်။
ယခုအခါ နှစ်(၃၀)သက်တမ်းအတွက် ယူရိုသန်း(၃၄၀)ဖြင့် သဘောတူညီမှုရရှိရန် နီးစပ်နေပြီဖြစ်ကြောင်း၊ ဘာစီလိုနာအသင်း၏ကွင်းအမည်ကို Nou Camp Grifols ဟု ပြောင်းလဲခေါ်တွင်သွားမည်ဖြစ်ကြောင်း၊ စပွန်ဆာစာချုပ်မှာ လာမည့်ရာသီတွင် စတင်ဖွယ်ရှိနေကြောင်း စပိန်မီဒီယာများက ဖော်ပြခဲ့ကြခြင်းဖြစ်သည်။
သို့သော် ယင်းသတင်းများ ထွက်ပေါ်နေစဉ်မှာပင် Grifols ကုမ္ပဏီက မိမိတို့အနေဖြင့် ယခုလိုပုံစံမျိုးဖြင့် စပွန်ဆာပေးရန် စိတ်ကူးထားခြင်းမရှိကြောင်း ငြင်းချက်ထုတ်လိုက်ခြင်းဖြစ်သည်။
