ပုသိမ်-ရန်ကုန် ကားလမ်းနံဘေး၌ ရေဘေးတိမ်းရှောင်နေသည့် ယာယီနေအိမ်များကို တွေ့ရစဉ် (ဓာတ်ပုံ-မင်းသူဝင်းထွဋ်)
ညောင်တုန်းမြို့တွင် ဧရာဝတီမြစ်ရေမှာ ဇူလိုင် ၂၉ ရက် တိုင်းတာချက်များအရ ၂၂ ဒသမ ၈ ပေအထိ ကျဆင်းနေပြီ ဖြစ်သော်လည်း ဧရာဝတီတိုင်းဒေသကြီးရှိ အနိမ့်ပိုင်း မြို့များဖြစ်သည့် ကျောင်းကုန်း၊ ကန်ကြီးထောင့်၊ သာပေါင်း၊ ပုသိမ်မြို့များတွင် ရေများ စတင်ဝင်ရောက်နေကာ မိုးသည်းထန်စွာ ရွာသွန်းပါက ရေကြီးနစ်မြုပ်မည်ကို စိုးရိမ်နေကြောင်း ဒေသခံများထံမှ သတင်းရရှိသည်။
ညောင်တုန်းမြို့တွင် ဧရာဝတီမြစ်ရေမှာ မြို့၏ စိုးရိမ်ရေအမှတ်ဖြစ်သော ၂၂ ဒသမ ၅ ပေအထက် ဆက်လက်ရှိနေသေးသော်လည်း မြို့ရှိတာများ လုံခြုံမှုကြောင့် စိုးရိမ်ဖွယ်ရာ မရှိတော့ကြောင်း၊ တပ်မတော်ကလည်း ခမရ (၄၃၅) မှ စစ်သည်အင်အား ၁၀၀ အား ညောင်တုန်းမြို့နယ်အတွင်းရှိ စိုးရိမ်ဖွယ်ရှိသည့် ကျေးရွာများတွင် နေ့ညကင်းများ စောင့်ဆိုင်းပေးနေကြောင်း သိရသည်။
“ညောင်တုန်းမြို့က အခုဆို ရေပြန်ကျနေပြီ။ ကွင်းရေ တိုးမလားလို့ စိုးရိမ်နေပေမယ့် ရာသီဥတုက ကောင်းနေတာကြောင့် ကွင်းရေကလည်း အခုဆို နှစ်ပေလောက်အထိပဲ တက်တယ်။ ကျွန်တော်တို့က အခု ရေကိုတော့ မကြောက်ဘူး။ နောက်တစ် ရေထပ်တက်မှာကိုတော့ စိုးရိမ်နေတယ်” ဟု ညောင်တုန်းမြို့နယ် မီးသတ်ဦးစီးမှူး ဦးသန်းဇော်ဝင်းက ပြောကြားသည်။
ပန်းတနော်မြို့တွင်လည်း မြစ်ရေများ ပြန်လည်ကျဆင်းနေပြီး မြစ်ရေတိုက်စားမှုကြောင့် ကမ်းပြိုသည့် အန္တရာယ်ကို ရင်ဆိုင်နေရသည့် ကျေးရွာလေးရွာရှိ ရေဘေးရှောင် ပြည်သူ ၄၃၀ ကိုသာ ကူညီစောင့်ရှောက်မှုများ ပေးနေရကြောင်း၊ ရေဘေးရှောင်ပြည်သူများအား အစိုးရပိုင်းမှ ကူညီထောက်ပံ့မှုများ လုပ်ဆောင်နေကြောင်း သိရသည်။
ကျောင်းကုန်းမြို့တွင်မူ ဒါးကမြစ်ရေမှာ ဆက်လက်မြင့်တက်ခြင်း မရှိသော်လည်း မြို့၏ စိုးရိမ်ရေမှတ်ဖြစ်သော ၁၇ ပေအထက် တစ်ပေအထိ ပိုမိုကျော်လွန်နေပြီး စာသင်ကျောင်း ၂၀ ခန့်မှာ ပိတ်ထားရကြောင်း၊ အနီးဝန်းကျင်ရှိ ကျေးရွာပေါင်း ၄၀ ခန့်မှာ ရေဝင်ရောက်နေသောကြောင့် ရေဘေးလွတ်ရာသို့ ရွှေ့ပြောင်းနေရသည့် ပြည်သူများရှိကြောင်း သိရသည်။
ပုသိမ်-ရန်ကုန်ကားလမ်းမကြီး တစ်လျှောက်တွင်လည်း ကွင်းရေများ ရေကျော်ဝင်ရောက်မှုများ မရှိစေရန် သဲအိတ်များချထားမှု လုပ်ဆောင်နေပြီး ကျေးရွာအချို့မှ ရေဘေးရှောင်ပြည်သူများမှာ ပုသိမ်-ရန်ကုန် ကားလမ်းတစ်လျှောက်နှင့် မီးရထားလမ်းများပေါ်သို့ ယာယီနေအိမ်များ ဆောက်လုပ်ကာ ပြောင်းရွှေ့နေထိုင်ရကြောင်း သိရသည်။
ကန်ကြီးထောင့်မြို့နယ်နှင့် သာပေါင်းမြို့နယ်များတွင်လည်း ကျေးရွာအချို့တွင် ရေများဝင်ရောက်နေပြီဖြစ်ပြီး စိုးရိမ်ဖွယ် အခြေအနေ မရှိသေးသော်လည်း ရေကြီးနစ်မြုပ်သည့် ရက်များ ကြာရှည်လာပါက ဒေသခံများအတွက် အကူအညီများ လိုအပ်လာမည်ဖြစ်ကြောင်း သိရသည်။
“သာပေါင်းမြို့က အခုထိတော့ အရမ်းစိုးရိမ်ရတယ်လို့ မရှိသေးဘူး။ ဒါပေမဲ့ ရေက ဘယ်လောက်ကြာကြာ တက်နေမလဲဆိုတာ မသိသေးဘူး။ အခုထိတော့ ရေက ပုံမှန်ကြီးတယ်လို့ပဲ ဆိုနိုင်ပါသေးတယ်” ဟု သာပေါင်းမြို့နယ် တိုင်းဒေသကြီးကိုယ်စားလှယ် ဦးအောင်အောင်ဦးက ပြောကြားသည်။
Writer: မင်းသူဝင်းထွဋ်
