စက်တင်ဘာလအတွင်း စားသုံးသူ ဈေးဆနှုန်းတွက်ချက်ရာတွင် ကေက်ယူသည့် ကုန်ပစ္စည်းနှင့်ဝန် ဆောင်မှုအုပ်စုများ၏ ဈေးဆနှုန်းများ ယခင်နှစ်ကာလတူနှင့်နှိုင်းယှဉ်ပါက သိသိသာသာ မြင့်တက်ခဲ့ကြောင်း ဗဟိုစာရင်းအင်းအဖွဲ့က ၂၀၁၈ ခုနှစ် စက်တင်ဘာလအတွက် ထုတ်ပြန်သည့် စားသုံးသူဈေးဆနှုန်းနှင့် ငွေကြေးဖောင်းပွမှုနှုန်း အခြေအနေ ဖော်ပြထားချက်အရ သိရသည်။
၂၀၁၈ ခုနှစ် စက်တင်ဘာလတွင် စားသုံးသူဈေးဆနှုန်း (Consumer Price Index – CPI) ၁၄၅ ဒသမ ၉၇ ရှိခဲ့ပြီး ယခင်နှစ်ကာလတူထက် ၈ ဒသမ ၅၉ ရာခိုင်နှုန်းမြင့်တက်ခဲ့ကြောင်း သိရသည်။
တစ်နိုင်ငံလုံး၏ စားသုံးသူ ဈေးဆနှုန်းတွက်ချက်ရန်အတွက် အစားအစာအုပ်စု၊ ဆေးလိပ်နှင့်အဖျော် ယမကာအုပ်စု၊အဝတ်အထည်၊ အိမ်လခနှင့်အိမ်ပြင်ခအုပ်စု၊ အိမ်အသုံး အဆောင်ပစ္စည်းနှင့် ပြုပြင်ထိန်း သိမ်းစရိတ်အုပ်စု၊ ကျန်းမာရေးအုပ်စု၊ သယ်ယူပို့ဆောင်ရေးအုပ်စု၊ ဆက်သွယ်ရေးအုပ်စု၊ အပန်းဖြေခြင်းနှင့် ယဉ်ကျေးမှုအုပ်စု၊ ပညာရေးအုပ်စု၊ ပြင်ပအစားအသောက်အုပ်စု၊ အထွေထွေကုန်ပစ္စည်းအုပ်စု၊ အစားအစာ မဟုတ်သောအုပ်စု စသည်ဖြင့် အုပ်စုများခွဲကာ ကောက်ခံခဲ့ခြင်းဖြစ်ကြောင်း သိရသည်။
အစားအစာအုပ်စုဈေးဆနှုန်းသည် စက်တင်ဘာလ၌ ၁၅၈ ဒသမ ၆၉ ရှိပြီး ယခင်နှစ်ကာလတူ ဈေးဆ နှုန်းထက် ၈ ဒသမ ၅၅ ရာခိုင်နှုန်း မြင့်တက်ခဲ့ကြောင်း သိရသည်။ ဆေးလိပ်နှင့် အဖျော်ယမကာအုပ်စု ဈေးဆနှုန်းမှာ စက်တင်ဘာလ၌ ၁၃၉ ဒသမ ၂၂ ဖြစ်ပြီး ယခင်နှစ် ကာလတူထက် ၇ ဒသမ ၁၅ ရာခိုင်နှုန်းမြင့် တက်ခဲ့ကြောင်း သိရသည်။
အဝတ်အထည်အုပ်စု၏ ဈေးဆနှုန်းမှာလည်း စက်တင်ဘာလ၌ ၁၂၁ ဒသမ ၇၇ ရှိပြီး ယခင်နှစ်ကာလတူထက် ၃ ဒသမ ၅၄ ရာခိုင်နှုန်း မြင့်တက်ခဲ့ကြောင်း သိရသည်။ အိမ်လခနှင့် အိမ်ပြင်ခ အုပ်စုဈေးဆနှုန်း မှာစက်တင်ဘာလတွင် ၁၅၀ ဒသမ ၃၇ ရှိပြီး ယခင်နှစ်ကာလတူထက် ၉ ဒသမ ၀၃ ရာခိုင်နှုန်း မြင့်တက်ခဲ့ ကြောင်း သိရသည်။
အိမ်အသုံးအဆောင်ပစ္စည်းနှင့် ပြုပြင်ထိန်းသိမ်းစရိတ်အုပ်စု ဈေးဆနှုန်းမှာ စက်တင်ဘာတွင် ၁၂၁ ဒသမ ၀၂ ရှိကာ ယခင်နှစ်ကာလတူထက် ၄ ဒသမ ၄၉ ရာခိုင်နှုန်း မြင့်တက်ခဲ့ပြီး ကျန်းမာရေးအုပ်စု ဈေးဆနှုန်းမှာ ၂၀၁၈ ခုနှစ်စက်တင် ဘာလတွင် ၁၄၃ ဒသမ ၇၁ ရှိပြီး ယခင်နှစ်ကာလတူထက် ၆ ဒသမ ၀၆ ရာခိုင်နှုန်း မြင့်တက်ခဲ့ကြောင်း ဗဟိုစာရင်းအင်းအဖွဲ့က ထုတ်ပြန်ထားသည်။
သယ်ယူပို့ဆောင်ရေးအုပ်စု ဈေးဆနှုန်းမှာ စက်တင်ဘာလ၌ ၁၁၅ ဒသမ ၁၉ ရှိပြီး ယခင်နှစ်ကာလတူနှင့် နှိုင်းယှဉ်ပါက ၁၅ ဒသမ ၆၈ ရာခိုင်နှုန်းမြင့်တက်ခဲ့ကြောင်း ဆက်သွယ်ရေးအုပ်စု ဈေးဆနှုန်းမှာလည်း စက်တင်ဘာလ၌ ၁၀၂ ဒသမ ၁၅ ရှိကာ ယခင်နှစ်ကာလတူ ဈေးဆနှုန်းထက် ၀ ဒသမ ၆၂ ရာခိုင်နှုန်းကျ ဆင်းခဲ့ကြောင်း သိရသည်။
အပန်းဖြေခြင်းနှင့် ယဉ်ကျေးမှုအုပ်စု ဈေးဆနှုန်းမှာ စက်တင်ဘာလတွင် ၁၀၈ ဒသမ ၉၃ ရှိပြီး ယခင်နှစ် ကာလတူထက် ၂ ဒသမ ၆၀ ရာခိုင်နှုန်းမြင့်တက်ကာ ပညာရေးအုပ်စု ဈေးဆနှုန်းမှာလည်း ယခင်နှစ်ကာ လတူထက် ၈ ဒသမ ၆၉ ရာခိုင်နှုန်း မြင့်တက်ခဲ့ကြောင်း သိရသည်။
ပြင်ပ အစားအသောက်အုပ်စု ဈေးဆနှုန်းမှာ ၁၂၃ ဒသမ ၅၆ ဖြစ် ပြီး ယခင်နှစ်ကာလတူထက် ၈ ဒသ မ ၅၆ ရာခိုင်နှုန်းမြင့်တက်ခဲ့ကြောင်း သိရသည်။ အထွေထွေကုန်ပစ္စည်းအုပ်စု ဈေးဆနှုန်းမှာလည်း ယခင် နှစ် ကာလတူထက် ၆ ဒသမ ၂၈ ရာ ခိုင်နှုန်းမြင့်တက်ခဲ့ပြီး အစားအစာ မဟုတ်သောအုပ်စု ဈေးဆနှုန်းမှာ ယခင်နှစ်ကာလတူထက် ၈ ဒသမ ၆၉ ရာခိုင်နှုန်းမြင့်တက်ခဲ့ကြောင်း ဗဟိုစာရင်းအင်းအဖွဲ့က တွက်ချက် ထုတ်ပြန်ထားသည်။
၂၀၁၂ ခုနှစ် အခြေခံနှစ်ဖြင့် ၂၀၁၇ ခုနှစ် အောက်တိုဘာလမှ ၂၀၁၈ ခုနှစ် စက်တင်ဘာလအထိ တစ်နှစ်တာကာလအတွင်းဖြစ်ပေါ်ခဲ့သော တစ်နိုင်ငံလုံး၏စားသုံးသူ ဈေးဆနှုန်းကိုလေ့လာပါက ၂၀၁၇ ခုနှစ် အောက်တိုဘာလတွင် ၁၃၅ ဒသမ ၇၀ ရှိရာမှ စ၍တဖြည်းဖြည်း မြင့်တက်လာခဲ့ရာ ၂၀၁၈ ခုနှစ် ဖေ ဖော်ဝါရီလတွင် ၁၃၉ ဒသမ ၅၁ ဖြစ် ပေါ်ခဲ့ကာ ၂၀၁၈ ခုနှစ် မတ်လတွင် ၁၃၉ ဒသမ ၁၁ သို့ ကျဆင်းခဲ့သော် လည်း ၂၀၁၈ ခုနှစ်ဧပြီလမှစ၍ ပြန်လည်မြင့်တက်လာခဲ့ရာ စက်တင်ဘာလအထိ ဆက်လက်မြင့်တက်ခဲ့ ကြောင်း၊ ထိုသို့ ဖြစ်ပေါ်ခဲ့ခြင်းမှာ ဇွန်လမှစ၍ မိုးများစွာ ရွာသွန်းခဲ့ပြီး သဘာဝဘေးအန္တရာယ် ဖြစ်ပေါ်နေ သောကြောင့် လမ်းပန်းဆက်သွယ်ရေးခက်ခဲကာ ကုန်စည်ဈေးနှုန်းများ ဆက်လက်မြင့်တက်ခဲ့ခြင်းဖြစ် ကြောင်း ဗဟိုစာရင်းအင်းအဖွဲ့က သုံးသပ်တင်ပြထားသည်။
တစ်နိုင်ငံလုံးအတွက် စားသုံးသူဈေးဆနှုန်းနှင့် ငွေကြေးဖောင်းပွ မှုနှုန်းကို ပြောင်းလဲတွက်ချက်တင်ပြ နိုင်ရန် ၂၀၁၂ ခုနှစ် နိုဝင်ဘာတွင် ဗဟိုစာရင်းအင်းအဖွဲ့သည် အိမ်ထောင်စုဝင်ငွေနှင့် စားသုံးမှု စစ်တမ်းကို မြို့နယ်ပေါင်း ၈၂ မြို့နယ်တွင် နမူနာအိမ်ထောင်စုပေါင်း ၃၂၆၆၉ ကို စစ်တမ်းကောက်ယူခဲ့ကြောင်း သိရသည်။၂၀၁၂ ခုနှစ် အခြေခံနှစ်ဖြင့် စစ်တမ်းကောက် ယူရာတွင် ကုန်ပစ္စည်းအမျိုးအစားများမှာ အများသုံးစွဲသည့် ကုန်ပစ္စည်း နှင့်ဝန်ဆောင်မှုအမျိုးအစားပေါင်း ၄၃၈ မျိုးပါဝင်ကြောင်း သိရသည်။စားသုံးသူဈေးဆနှုန်းတွက်ချက်ရန်အတွက် အစားအစာအုပ်စုတွင် ကုန်ပစ္စည်း ၁၀၈ မျိုးနှင့် အစားအစာမဟုတ်သော အုပ်စုတွင် ကုန်ပစ္စည်း အမျိုးအစား ၁၆၆ မျိုးရွေးချယ်ခဲ့ပြီး စုစုပေါင်း ၂၇၄ မျိုးသို့ တိုးချဲ့ကောက်ယူတွက်ချက်ခဲ့ကြောင်း ဗဟိုစာရင်းအင်းအဖွဲ့၏ ထုတ်ပြန်ထားမှုအရ သိရသည်။
