ပခုက္ကူနည်းပညာတက္ကသိုလ်တွင် ဖဲကြိုးပြာလှုပ်ရှားမှု ပြုလုပ်နေသည့် ဆရာ ဆရာမများကို တွေ့ရစဉ် (ဓာတ်ပုံ - သက်ထိန်ဝင်း)

ဇူလိုင် ၃၁ ရက်မှ စတင်ကာ မြန်မာနိုင်ငံအနှံ့ရှိ နည်းပညာတက္ကသိုလ်နှင့် ကွန်ပျူတာတက္ကသိုလ်များရှိ ဆရာ ဆရာမများက ဖဲကြိုးပြာလှုပ်ရှားမှုအား စတင်ပြုလုပ်ကြသည်။ ပညာရေးဝန်ကြီးဌာန တစ်ခုတည်းအောက်တွင် ရှိသော်လည်း အဆိုပါ နည်းပညာတက္ကသိုလ်နှင့် ကွန်ပျူတာ တက္ကသိုလ်တို့တွင် ရာထူးတိုးခြင်းမှာ အခြားသော ဌာနများနှင့်မတူဘဲ ကွဲပြားလျက်ရှိသည်။

အခြားသောဌာနများတွင် သတ်မှတ်ထားသည့် လုပ်သက်ရှိပါက ရာထူးတိုးခြင်းများ ရှိသော်လည်း ယင်းတက္ကသိုလ်များတွင် တာဝန်ထမ်းဆောင်လျက်ရှိသည့် ဆရာ ဆရာမများမှာ ရာထူးတိုးခြင်းမရှိကြောင်း သိရသည်။

ထို့ကြောင့် မြန်မာနိုင်ငံအနှံ့ရှိ နည်းပညာတက္ကသိုလ်နှင့် ကွန်ပျူတာတက္ကသိုလ်တို့မှ ဆရာ ဆရာမများက အဆိုပါ လှုပ်ရှားမှုကို ပြုလုပ်ခဲ့ခြင်းဖြစ်ပြီး ထူးခြားမှုမရှိပါက ဆန္ဒထုတ်ဖော်မှုများ လုပ်ဆောင်သွားမည်ဖြစ်ကြောင်း သိရသည်။

ရာထူးတိုးမညီမျှခြင်းအပေါ် ဖဲကြိုးပြာလှုပ်ရှားမှု ပြုလုပ်ရခြင်းနှင့်ပတ်သက်၍ ရန်ကုန်တွင် သတင်းစာရှင်း

Blue Ribbon Campaign ပြုလုပ်ရခြင်းနှင့် ပတ်သက်၍ နည်းပညာတက္ကသိုလ်နှင့် ကွန်ပျူတာတက္ကသိုလ်တို့မှ တာဝန်ရှိသူများ ပူးပေါင်းပြီး စာနယ်ဇင်းရှင်းလင်းပွဲကို ရန်ကုန်မြို့၊ MJN ရုံးခန်း၌ ၂၀၁၇ ခုနှစ် ဇူလိုင် ၃၁ ရက်၌ ပြုလုပ်ခဲ့သည်။

“အဓိက,ကတော့ ပညာရေးဝန်ကြီးဌာန လက်အောက်ရှိ ဦးစီးဌာနအသီးသီးက ရာထူးတိုးမှုတွေ ညီညွတ်မျှတမှုမရှိခြင်းကို သက်ဆိုင်ရာတာဝန်ရှိသူတွေ သိရှိစေဖို့ ရည်ရွယ်ပါတယ်။ ပညာရေးဝန်ကြီးဌာန လက်အောက်ရှိ အဆင့်မြင့်ပညာဦးစီးဌာနရဲ့ နည်းပညာတက္ကသိုလ်နဲ့ ကွန်ပျူတာတက္ကသိုလ်တွေမှာ တာဝန်ထမ်းဆောင်လျက်ရှိတဲ့ ဆရာ ဆရာမတွေက ရာထူးတိုး လုပ်သက်ကျော်လွန်နေပြီ ဖြစ်ပေမယ့် အခုထိ ရာထူးတိုးခံစားခွင့် မရှိကြရပါဘူး။ ပညာရေးဝန်ကြီးဌာနတစ်ခုတည်းရဲ့ လက်အောက်မှာ ရှိပေမယ့်လည်း ဦးစီးဌာနအသီးသီးရဲ့ ချမှတ်ထားတဲ့ ရာထူးတိုးမူဝါဒတွေကလည်း မတူညီကြပါဘူး” ဟု နည်းပညာတက္ကသိုလ် (မှော်ဘီ) သုတနည်းပညာဌာန၊ လက်ထောက်ကထိက ဒေါ်သူသူအောင်က ပြောကြားသည်။

ဥပဒေအရ ရာထူးတိုးရမည်ထက် နှစ်များစွာ ကျော်လွန်နေခြင်း၊ ဝန်ကြီးဌာနတစ်ခုတည်းဖြစ်သော်လည်း ရာထူးတိုးမူဝါဒမတူညီ၍ မျှော်လင့်ချက်မဲ့နေခြင်း၊ အလုပ်ခေါ်စဉ်ကတည်းက ရာထူးအတိုင်း နှစ်ကာလကြာမြင့်စွာ ရာထူးတိုးမပေးခြင်း (၁၆၅၀၀၀ နှင့် ၁၈၀၀၀၀ စကေးများ)၊ ရာထူးတိုးစာမေးပွဲကို မဖြေရဘဲ ရာထူးတိုးထားသူများ၊ ယခုအစိုးရလက်ထက်မှာပင် ရှိနေသော်လည်း ဦးစီးဌာနအတူတူချင်းမှာပင် ရာထူးတိုး စာမေးပွဲစစ်ရန် ကြိုးပမ်းနေခြင်းနှင့် နစ်နာသောဝန်ထမ်းများအတွက် တရားဝင် တောင်းပန်ခြင်း အပါအဝင် အခြားဖြေရှင်းမှုများ ပြုလုပ်ပေးရန် တောင်းဆိုထားကြောင်း သိရသည်။

နည်းပညာတက္ကသိုလ် (မန္တလေး) တွင် ဖဲကြိုးပြာ လှုပ်ရှားမှုစတင်

နည်းပညာတက္ကသိုလ် (မန္တလေး) တွင် တာဝန်ထမ်းဆောင်နေသည့် ဆရာ ဆရာမများ ရာထူးတိုးမျှတမှုများရှိစေရန်၊ နစ်နာမှုများ မရှိစေရန်အတွက် ဖဲကြိုးပြာလှုပ်ရှားမှုကို ဆရာများ သမဂ္ဂနည်းပညာတက္ကသိုလ် (မန္တလေး) မှ ဦးဆောင်ပြီး ၂၀၁၇ ခုနှစ် ဇူလိုင် ၃၁ ရက်မှစ၍ ဖဲကြိုးပြာလှုပ်ရှားမှု စတင်ပြုလုပ်ခဲ့သည်။

“နည်းပညာနဲ့ ပူးပေါင်းဆောင်ရွက်တဲ့ လေ့ကျင့်ရေးဌာနဘက်မှာက ပြီးတဲ့တဲ့လပိုင်း ရက်ပိုင်းအတွင်းက ရာထူးတိုးအမိန့်တွေ ထွက်သွားတယ်။ အဲဒီဘက်မှာ တာဝန်ထမ်းဆောင်နေတဲ့ ဆရာ ဆရာမတွေနဲ့ ကျွန်တော်တို့ နည်းပညာတက္ကသိုလ်၊ ကွန်ပျူတာတက္ကသိုလ်တွေမှာ တာဝန်ထမ်းဆောင်နေတဲ့ ဆရာ ဆရာမတွေက လုပ်သက်လည်းတူတယ်။ ဘွဲ့တွေလည်း တူတယ်။ တချို့ဆိုရင် ဒီမှာပိုပြီး လုပ်သက်နဲ့ ဘွဲ့တွေပိုများတယ်။ ဒါပေမဲ့ ဟိုဘက်မှာ ရာထူးတိုးတွေခေါ်ပြီး ဒီမှာက ရာထူးတိုး မထွက်ဘူး” ဟု ဆရာ ဆရာမများသမဂ္ဂမှ ဥက္ကဋ္ဌဦးကျော်ကျော်က ပြောကြားသည်။

နည်းပညာတက္ကသိုလ်၊ ကွန်ပျူတာတက္ကသိုလ်၊ ဆေးနှီးနွှယ်တက္ကသိုလ်များမှ ဆရာ ဆရာမများထံမှ ရာထူးတိုးနစ်နာမှုများကို စစ်တမ်းများ ကောက်ယူခဲ့ကြောင်း၊ တစ်ပတ်ကြာ ဖဲကြိုးပြာများ တပ်ဆင်သွားမည်ဖြစ်ကြောင်း၊ ထို့ပြင် ဆန္ဒပြုလက်မှတ်များဖြင့် ပေးပို့သွားမည်ဖြစ်ကြောင်း၊ မျှတမှုရှိသည့် ရာထူးတိုးမူဝါဒ လမ်းစဉ်ချမှတ်မပေးလျှင် နေပြည်တော်အထိ သွားရောက် ဆန္ဒပြမည်ဖြစ်ကြောင်း သိရသည်။

ဟင်္သာတနည်းပညာတက္ကသိုလ် ဆရာ ဆရာမများ ဖဲကြိုးပြာလှုပ်ရှားမှု ပြုလုပ်

ရာထူးတိုးမမျှတမှုအပေါ် မကျေနပ်သဖြင့် ဟင်္သာတနည်းပညာတက္ကသိုလ်ဆရာ၊ ဆရာမများက ဇူလိုင် ၃၁ ရက်တွင် ဖဲကြိုးပြာ လှုပ်ရှားမှုပြုလုပ်ခဲ့သည်။

အဆိုပါ ဖဲကြိုးပြာလှုပ်ရှားမှုကို ဟင်္သာတနည်းပညာတက္ကသိုလ်၌ ပြုလုပ်ခဲ့ခြင်းဖြစ်ပြီး ဆရာ ဆရာမ ၆၀ ကျော် ပါဝင်ခဲ့သည်။

“ရာထူးတိုးမူတွေကလည်း တိကျခိုင်မာမှု မရှိဘူး။ ဝန်ကြီးတစ်ယောက်လာရင် တစ်မျိုးပြောင်းတယ်။ အဲဒီလိုအခြေအနေတွေ မဖြစ်ချင်တော့တဲ့အတွက် တစ်နိုင်ငံလုံးမှာရှိတဲ့ နည်းပညာတက္ကသိုလ်တွေ၊ ကွန်ပျူတာတက္ကသိုလ်တွေ စုပေါင်းပြီး ဒီနေ့ကစပြီး ဖဲကြိုးပြာ လှုပ်ရှားမှုကို စပါတယ်” ဟု ဟင်္သာတနည်းပညာတက္ကသိုလ်၊ စက်မှုအင်ဂျင်နီယာဌာနမှ ကထိက ဦးသန့်ဇင်ဦးက ပြောကြားသည်။

“ကျွန်မဆိုရင် သရုပ်ပြရာထူးကို လုပ်သက် ရှစ်နှစ်တာဝန်ထမ်းဆောင်ခဲ့တယ်။ ဒီအချိန်ထိ သရုပ်ပြရာထူးပဲ ရှိပါသေးတယ်။ ကျွန်မတို့လိုမျိုး နစ်နာခဲ့တဲ့ ဆရာ ဆရာမတွေ အများစု လုပ်သက် ခုနစ်နှစ်၊ ရှစ်နှစ်၊ ၁၀ နှစ်ကျော်အထိ ဝန်ထမ်းတွေ အများကြီးရှိပါတယ်” ဟု ဟင်္သာတနည်းပညာတက္ကသိုလ် သင်္ချာဌာနမှ သရုပ်ပြဆရာမ ဒေါ်ခိုင်ကြည်ဇာဆွေက ပြောကြားသည်။

ပခုက္ကူနည်းပညာတက္ကသိုလ်မှ ဆရာ ဆရာမများ ဖဲကြိုးပြာလှုပ်ရှားမှု ပြုလုပ်

ပခုက္ကူနည်းပညာတက္ကသိုလ်မှ ဆရာ ဆရာမများ ဝန်ကြီးဌာနအတွင်း ရာထူးတိုးမမျှတမှုအပေါ် မကျေနပ်သဖြင့် ဖဲကြိုးပြာလှုပ်ရှားမှုအား ယခု ဇူလိုင် ၃၁ ရက် နံနက်က ပခုက္ကူ နည်းပညာတက္ကသိုလ်တွင် ပြုလုပ်ခဲ့ကြောင်း သိရသည်။

ပညာရေးဝန်ကြီးဌာန လက်အောက်တွင်ရှိသည့် ဦးစီးဌာန နှစ်ခုကြား ရာထူးတိုးမူဝါဒ မညီမျှခြင်း၊ ဝန်ကြီးဌာနတစ်ခုအတွင်း ရာထူးတိုး မူဝါဒ နှစ်မျိုးရှိနေခြင်းနှင့် ရာထူးတိုးမူဝါဒ တစ်မျိုးတည်းရှိရေးတို့အတွက် ဖဲကြိုးပြာလှုပ်ရှားမှု လုပ်ဆောင်ရခြင်းဖြစ်ကြောင်း ဦးဆောင် ဆရာ ဆရာများထံမှ သိရသည်။

“ရာထူးတိုးမျှတရေး၊ အပြောင်းအရွှေ့မူ ထိထိရောက်ရောက် ကိုင်တွယ်ရေး။ နောက်တစ်ချက်က သက်ဆိုင်ရာ ရာထူးအဆင့်အလိုက် အဆင့်မြင့်ပညာမှာဆိုရင် ဝိဇ္ဇာ၊ သိပ္ပံရှိနေတဲ့ Facility ကွန်ပြူတာနည်းပညာမှာ ရှိနေတဲ့ Facility မျှတရေး သက်ဆိုင်ရာ ရာထူးအလိုက် ခံစားခွင့်မျှတစွာရရှိရေး တောင်းဆိုတာဖြစ်ပါတယ်” ဟု ပခုက္ကူနည်းပညာ တက္ကသိုလ်မှ ဦးရဲလွင် (ကထိက၊ စက်မှုအင်ဂျင်နီယာဌာန) က ပြောကြားသည်။

ရာထူးတိုးမမျှတမှုနှင့် ပက်သက်သည့် ဖဲကြိုးပြာလှုပ်ရှားမှုအား နည်းပညာတက္ကသိုလ်၊ ကွန်ပျူတာတက္ကသိုလ်တို့တွင် ဇူလိုင် ၃၁ ရက်မှ သြဂုတ် ၄ ရက်အထိ ပြုလုပ်သွားမည်ဖြစ်ပြီး တောင်းဆိုချက်များအား ဆောင်ရွက်ပေးခြင်းမရှိပါက လှုပ်ရှားမှုအား ထပ်တိုးလုပ်ဆောင်သွားမည်ဖြစ်ကြောင်း ဦးဆောင်ဆရာ ဆရာမများထံမှ သိရသည်။

ဖဲကြိုးပြာလှုပ်ရှားမှု ပြည်နည်းပညာတက္ကသိုလ် ဆရာ ဆရာမများ ပြုလုပ်

ရာထူးတိုးမူဝါဒများမျှတရေး ဖဲကြိုးပြာလှုပ်ရှားမှုကို ပဲခူးတိုင်းဒေသကြီး (အနောက်ပိုင်း) ပြည်မြို့ နည်းပညာတက္ကသိုလ် ဆရာ ဆရာမများက ပြုလုပ်ခဲ့ကြကြောင်း သိရသည်။

“မျှတတဲ့ မူဝါဒတွေရအောင်ဆိုပြီး ဒီဖဲကြိုးပြာ လှုပ်ရှားမှုကိုလုပ်တာ ဖြစ်ပါတယ်” ဟု ပြည်နည်းပညာတက္ကသိုလ် (IT) ဌာန လက်ထောက်ကတိက ဦးရဲမင်းသိန်းက ဆိုသည်။

“ကျွန်မတို့တွေက နစ်နာနေတာက နည်းနည်းကြာပြီ။ သတ်မှတ်ထားတဲ့အတိုင်း အရင်တုန်းက စိတ်ရှည်လက်ရှည် စောင့်နေခဲ့တာပါ။ ဒါလေးကို သိစေချင်တယ်။ ရာထူးတိုးဖို့ပေါ့။ ရာထူးတိုးချင်တာတော့ မဟုတ်ဘူးပေါ့။ စောင့်နေရင်းနဲ့ ကြာခဲ့တယ်။ ဒါပေမဲ့ ရာထူးတိုးဖို့ တစ်ခုတည်းနဲ့ အလုပ်လုပ်ခဲ့တာ မဟုတ်ဘူး။ တခြားသော အရေးကြီးတဲ့ ကိစ္စတွေနိုင်ငံတော်မှာရှိတယ် ဆိုတာလည်း နားလည်ပါတယ်။ ကိုယ့်ရဲ့ ပုဂ္ဂလိကကိစ္စကိုပဲ ဦးတည်နေတာ မဟုတ်ပါဘူး။ ဒါပေမဲ့လည်း အားလုံးလည်းသိကြမှာပါ နည်းနည်းမမျှတတာလေးတွေရှိတယ်။ သည်းမခံနိုင်တော့ဘူး။ ကျွန်မတို့နစ်နာနေတဲ့ အပိုင်းလေးတွေကို သိစေချင်တာပါ” ဟု ပြည်နည်း ပညာတက္ကသိုလ် (IT) ဌာနလက်ထောက် ကထိက ဒေါက်တာနေခြည်ထွန်းက ပြောကြားသည်။

အဆိုပါ လှုပ်ရှားမှုများကို အခြားမြို့ကြီးများရှိ နည်းပညာတက္ကသိုလ်များ ကွန်ပျူတာ တက္ကသိုလ်များတွင်လည်း တစ်ပြိုင်နက်တည်း ပြုလုပ်ခဲ့ကြကြောင်း သိရသည်။

တောင်ကြီးမြို့နယ် အေးသာယာ နည်းပညာတက္ကသိုလ်မှ ဆရာ ဆရာမများ ဖဲကြိုးပြာကမ်ပိန်း ပြုလုပ်

ရာထူးတိုးမှု တရားမျှတရန် တောင်ကြီးမြို့နယ် အေးသာယာမြို့ နည်းပညာတက္ကသိုလ်မှ ဆရာ ဆရာမများအားလုံး စုပေါင်းပြီး အပြာရောင်ဖဲကြိုးကမ်ပိန်းလှုပ်ရှားမှုကို ဇူလိုင် ၃၁ ရက်တွင် ပြုလုပ်ခဲ့ကြောင်း သတင်းရရှိသည်။

“အရင်က သိပ္ပံနဲ့ နည်းပညာဦးစီးဌာနမှ အတူတူပဲဆိုတော့ဘက်တူတွေ အကုန်တူတူ တိုးခဲ့တယ်။ ၂၀၁၆ ခုနှစ်မှာ ပညာရေးဦးစီးဌာနအောက်ကို ဦးစီးဌာနချင်းပေါင်းလိုက်ပြီး နည်းပညာဦးစီးဌာနက ပညာရေးဦးစီးဌာန လက်အောက်ကို ရောက်သွားပြီးဖြစ်တယ်။ ဒါပေမဲ့ ရာထူးတိုးထွက်တော့ ပညာရေးက သူ့မူအတိုင်းထွက်ပြီးတော့ ကျွန်တော်တို့က နည်းပညာဆိုပြီး ကိုယ်တွေကျန်ခဲ့တော့ နောက်မှတိုးပေးမယ်ထင်ပြီး နည်းပညာလက်အောက်ရှိတဲ့လူတွေ ရာထူးတိုးသွားတယ်။ ဟိုဘက်လည်းမပါ ဒီဘက်လည်းမပါဘူး ဖြစ်နေတယ်။ ရာထူးတိုးချင်တာ မဟုတ်ဘူး။ ဘက်တူသူများ တူတူကိုယ်တွေရချင်တာကို ရစေချင်တာ” ဟု သရုပ်ပြဆရာမ ဒေါ်ဇင်မာမင်း ဆိုသည်။

“သရုပ်ပြ ဆရာမလေးဆိုရင် သုံးဘာသာလောက်တော့ ပေးရတယ်။ ဘာသာလည်း အများကြီး သင်ရတယ်။ အလုပ်ကလည်း အရမ်းလုပ်ရတယ်။ သတ်မှတ်လုပ်သက်လည်း ပြည့်ပြီ။ ရာထူးလည်း မတိုးဘူးဆိုတော့ ဆရာမကလေးတွေ စိတ်ထဲဘယ်လိုခံစားမလဲပေါ့။ မိသားစုလို သဘောထားတော့ ဒီလို မဖြစ်စေချင်ဘူးပေါ့။ ဟိုမှာဆိုရင် နှစ်သုတ်၊ သုံးသုတ်လောက် ခေါ်သွားချိန်မှာ ဒီဘက်က ဘာမှကိုမရသေးတာ မဖြစ်စေချင်ဘူးပေါ့” ဟု Ph.D Mechanical ဌာနမှ ပါမောက္ခဒေါက်တာ နန်းဝိုးစောက ပြောကြားသည်။

နည်းပညာတက္ကသိုလ် (ပုသိမ်) တွင် ရာထူးတိုးမျှတရေး အပြာရောင်ဖဲပြား လှုပ်ရှားမှုပြုလုပ်

ဧရာဝတီတိုင်းဒေသကြီး ပုသိမ်မြို့ရှိ နည်းပညာတက္ကသိုလ် (ပုသိမ်) မှ ဆရာ ဆရာမများမှ ရာထူးတိုးမျှတရေး အပြာရောင်ဖဲပြား လှုပ်ရှားမှုတစ်ရပ် ဇူလိုင် ၃၁ ရက်က ပြုလုပ်ခဲ့ကြောင်း သိရသည်။

“ရာထူးတိုး တရားမျှတရေးမရှိခဲ့လို့ ရာထူးတိုးတရားမျှတအောင် ဒီ Campaign လုပ်ရတာပါ။ ဆက်လက်ပြီးတော့ နည်းပညာတက္ကသိုလ် (ပုသိမ်) တစ်ခုတည်းမဟုတ်ဘဲ တစ်နိုင်ငံလုံးမှာရှိတဲ့ ကျောင်း ၃၃ ကျောင်းမှ ဆရာ ဆရာမတွေ ညှိနှိုင်းပြီးတော့မှ ကျွန်တော်ရဲ့ခံစားခွင့်တွေရရှိဖို့ ခိုင်မာတဲ့မူဝါဒတွေထွက်ဖို့ အကုန်လုံးညှိနှိုင်းပြီး ဆောင်ရွက်ရမှာပါ” ဟု နည်းပညာတက္ကသိုလ် (ပုသိမ်) တွင်မှ မော်ကွန်းထိန်း ကထိက ဒေါက်တာကျော်မျိုးဝင်းက ဆိုသည်။

နည်ပညာ တက္ကသိုလ် (ပုသိမ်) တွင် သရုပ်ပြ ဆရာ ဆရာမ ၅၈ ဦးနှင့် လက်ထောက် ကထိက ၃၂ ဦး ရှိကြောင်း သိရသည်။

Writter: သတင်းအဖွဲ့