ပုသိမ်ခရိုင် ငပုတောမြို့နယ် ဟိုင်းကြီးကျွန်းမြို့ ဖောင်ဒိုးကျေးရွာအုပ်စု ဟက်လက်ကျေးရွာအနီး ပင်လယ်ကမ်းစပ်တွင် ဇူလိုင် ၂၉ ရက် နံနက် ၇ နာရီခန့်တွင် ပင်လယ်အတွင်းမှ မျောပါလာသော ကွန်တိန်နာတစ်လုံး လာရောက်သောင်တင်နေသည်ကို ဒေသခံများ တွေ့ရှိရသောကြောင့် စစ်ဆေးကြည့်ရာတွင် ဂက်စ်အိုးဟု ယူရသည့် အိုးငယ် ၄၅၀ အိုးအား တွေ့ရှိရကြောင်း သတင်းရရှိသည်။
ဖြစ်စဉ်မှာ အဆိုပါနေ့တွင် ဟက်လက်ကျေးရွာအနီး ပင်လယ်ကမ်းစပ် တစ်နေရာတွင် ကွန်တင်နာတစ်လုံး ကမ်းစပ်တွင် လာရောက်သောင်တင်နေသည်ကို ဒေသခံများ တွေ့ရှိရသောကြောင့် ဒေသဆိုင်ရာ တာဝန်ရှိသူများထံ အကြောင်းကြားခဲ့ကြောင်း ယင်းနောက် ကွန်တိန်နာအား စစ်ဆေးရာတွင် အတွင်းမှ ဂက်စ်အိုးဟု ယူဆရသည့် အိုးငယ် ၄၅၀ အိုးအား တွေ့ရှိရကြောင်း၊ ပင်လယ်ပြင် အတွင်းတွင်လည်း သောင်ပေါ်သို့ ရောက်ရှိနေသည့် ကွန်တိန်နာနှင့် ဆင်တူပုံးတစ်လုံးအား ရေပြင်အတွင်း မျောပါနေသည်ကို တွေ့ရှိနေရကြောင်း၊ ယင်းကွန်တိန်နာအား ဆယ်ယူရန် ကြိုးစားနေလျက်ရှိကြောင်း ဒေသခံများထံမှ သိရသည်။
“အခုတော့ ဖြစ်တဲ့နေရာကို သက်ဆိုင်ရာ တာဝန်ရှိသူတွေက ဆင်းသွားပြီ။ လမ်းက သွားလာရတာ ခက်ခဲတယ်ဆိုတော့ အသေးစိတ်တော့ မသိရသေးဘူး။ အခု ကွန်တင်နာက ကမ်းစပ်မှာ လာတင်နေပြီးတော့ ဒေသခံတွေက ကြည့်တာမှာ ဂက်စ်အိုးတွေ တွေ့ရတယ်လို့ သိရတယ်။ ပင်လယ်ထဲမှာလည်း ဂက်စ်အိုးတွေတွေ့တဲ့ ကွန်တင်နာနဲ့ ဆင်တူတစ်လုံးကို တွေ့သေးတယ်။ အဲ့ပုံးကတော့ ဆယ်လို့ မရသေးဘူး။ အသေးစိတ်ကတော့ တာဝန်ရှိသူတွေ စစ်ဆေးပြီး အတည်ပြုလို့ ရနိုင်ပါမယ်” ဟု ငပုတောမြို့နယ် တိုင်းဒေသကြီး လွှတ်တော်ကိုယ်စားလှယ် ဦးဖြိုးဇော်ရွှေက ပြောကြားသည်။
Writer: မင်းသူဝင်းထွဋ်
