ဂျာမနီဝန်ကြီးချုပ် အင်ဂျလာမာကယ်၏ ကွန်ဆာဗေးတစ် CSU မဟာမိတ်ပါတီသည် အောက်တိုဘာ ၁၄ ရက်တွင် ကျင်းပခဲ့သော ဘာဗေးရီးယားပြည်နယ် ရွေးကောက်ပွဲများ၌ သမိုင်းဝင်ရှုံးနိမ့်မှု ကြုံတွေ့ခဲ့ရာ မာကယ်၏ ယိုင်နဲ့နေသော သုံးပါတီညွန့်ပေါင်း အစိုးရကို ထိုးနှက်ချက်ဖြစ်ခဲ့သည်။ 

ချမ်းသာကြွယ်ဝသော တောင်ပေါ်ဒေသတွင် ၁၉၆၀ ပြည့်လွန်နှစ်များ နောက်ပိုင်းကတည်းက တစ်ပါတီတည်း အုပ်ချုပ်လာခဲ့သော ခရစ်ယာန်ဆိုရှယ်ယူနီယံ (CSU) ပါတီသည် ပြီးခဲ့သော လေးနှစ်ခန့်က ရရှိခဲ့သော ထောက်ခံမဲထက် ၁၀ ရာခိုင်နှုန်း လျော့နည်းပြီး ၃၇ ရာခိုင်နှုန်းသာ ရရှိခဲ့သည်။ ယင်းအတွက်ကြောင့် ထိုပါတီသည် ပြည်နယ်ပါလီမန်၌ အမတ်နေရာအများစု ရရှိထားမှုကို ဆုံးရှုံးခဲ့ရပြီး ထောက်ခံမဲ ၁၁ ရာခိုင်နှုန်း ရရှိခဲ့သည့် ကွန်ဆာဗေးတစ် Free Voters ပါတီနှင့် ညွန့်ပေါင်းဖွဲ့နိုင်ရန် အပူတပြင်း ကြိုးပမ်းရဖွယ် ရှိသည်။ 

မာကယ်၏ အခြားညွန့်ပေါင်းမိတ်ဖက် ပါတီဖြစ်သော သက်တမ်းနှစ်ပေါင်း ၁၅၀ ကျော် ရှိပြီဖြစ်သည့် ဆိုရှယ်ဒီမိုကရက် (SPD) ပါတီသည်လည်း ထောက်ခံမဲရရှိမှုသည် ထက်ဝက်ကျဆင်းပြီး ၉.၆ ရာခိုင်နှုန်းသာ ရရှိခဲ့ရာ ပြည်နယ်ပါလီမန်၌ ဒုတိယအကြီးဆုံး ပါတီနေရာကို ဂရင်းပါတီထံ လွှဲပေးခဲ့ရသည်။ 

ပြည်နယ်ဝန်ကြီးချုပ်ဖြစ်သော အသက် ၅၁ နှစ်ရှိ Markus Soeder က ထိုရလဒ်များသည် နာကျင်စရာကောင်းကြောင်း လက်ခံခဲ့ပြီး CSU ပါတီခေါင်းဆောင်နှင့် ပြည်ထဲရေးဝန်ကြီးဖြစ်သူ Horst Seehofer ကလည်း ယင်းသည် ၎င်းတို့အတွက် ကျေနပ်စရာ နေ့ရက်တစ်ရက်မဟုတ်ကြောင်း ပြောကြားခဲ့သည်။ 

မွတ်စလင်များအား ဆန့်ကျင်ပြီး မာကယ်အား ရာထူးမှ နုတ်ထွက်ရန် တောင်းဆိုခဲ့သည့် ရွှေ့ပြောင်းအခြေချ ဆန့်ကျင်သော Alternative for Germany (AfD) ပါတီက ထောက်ခံမဲ ၁၁ ရာခိုင်နှုန်း ရရှိခဲ့ရာ ဂျာမနီ၏ ပြည်နယ်လွှတ်တော် ၁၆ ခုအနက် ၁၅ ခု မြောက်ကို ဝင်ရောက်နိုင်ခဲ့ခြင်းဖြစ်သည်။ အီတလီ၏ လက်ယာစွန်းပါတီ League ခေါင်းဆောင်နှင့် ဒုတိယဝန်ကြီးချုပ်ဖြစ်သူ မက်တီ ယိုဆယ်ဗီနီက သက်တမ်းရင့်နှင့် အင်အားကြီး ပါတီများကိုကျော်၍ AfD ပါတီ အင်အားကောင်းလာမှုကို ဂုဏ်ပြုခဲ့ပြီး ဘာဗေးရီးယားတွင် အပြောင်းအလဲက အနိုင်ရခဲ့ပြီး မာကယ်အတွက် လက်ပြနှုတ်ဆက်မှုတစ်ခုဖြစ်ကြောင်း ပြောကြားခဲ့သည်။ 

အာဏာရရှိမှု ၁၃ နှစ် ကြာလာပြီဖြစ်သော မာကယ်သည် CSU နှင့် SPD ပါတီတို့နှင့် ယိုင်နဲ့သော ညွန့်ပေါင်းအစိုးရ ဖွဲ့စည်းနိုင်ရန် ကြိုးပမ်းခဲ့ပြီးနောက် နှစ်ဝက်သာ ရှိသေးချိန်တွင် ဘာဗေးရီးယား ပြည်နယ်ရွေးကောက်ပွဲများ၌ ၎င်း၏မဟာမိတ်ပါတီများ ရှုံးနိမ့်ခဲ့မှုက နောက်ထပ် ခေါင်းကိုက်စရာ ဖြစ်လာခဲ့သည်။ မာကယ်၏ အစိုးရသည် ဧရာမညွန့်ပေါင်း အစိုးရမဟုတ်ဘဲ မီနီညွန့်ပေါင်းအဆင့်သာရှိကြောင်း AfD ပါတီခေါင်းဆောင် Alice Weidel က ဂုဏ်ယူစွာ ကြေညာခဲ့ပြီး မာကယ်ကို ရွေးကောက်ပွဲသစ်များ ကျင်းပရန်အတွက် တောင်းဆိုခဲ့သည်။

အစိုးရရုပ်သံ ARD က ကောက်ယူခဲ့သော စစ်တမ်းတစ်ခုတွင် CSU ပါတီ၏ ရလဒ် ဆိုးရွားမှုအတွက် မဲဆန္ဒရှင်အများစုက ဘာလင်အခြေစိုက် နိုင်ငံရေးသမားများကို အပြစ်တင်ခဲ့ကြကြောင်း ဖော်ပြခဲ့သည်။