ပုသိမ်မြို့ရှိ ရှေးဟောင်းသမိုင်းဝင် စေတီတော်ကြီးဖြစ်သည့် ရွှေမုဋ္ဌောစေတီ တော်ကြီးမှာ ရွှေသင်္ကန်းများ လွင့်ပြယ်စပြုလာပြီ ဖြစ်သဖြင့် လုံးတော်ပြည့် ရွှေသင်္ကန်း ကပ်လှူနိုင်ရေးအတွက် ရွှေမှိုက်ထုတ်လုပ်နိုင်ရန် လေလံခေါ်ယူထားကြောင်း သတင်းရရှိသည်။
အသောကမင်းကြီး၊ အလောင်းစည်သူမင်းကြီးနှင့် ဘုရင်သမုဒ္ဒဃောသနှင့် မိဖုရား ဥမ္မာဒန္တီတို့ မင်းသုံးဆက်တိုင်တိုင် တည်ထားခဲ့သည်ဟု သမိုင်းရှိခဲ့သည့် ပုသိမ်မြို့ ကျက်သရေဆောင် ရွှေမုဋ္ဌော စေတီတော်ကြီးမှာ ယခင်ငါးနှစ်က ကပ်လှူထားသည့် ရွှေသင်္ကန်းများလွင့်ပြယ်စ ပြုလာပြီဖြစ်သဖြင့် လုံးတော်ပြည့် ရွှေသင်္ကန်းများ ပြန်လည်ကပ်လှူသွားနိုင်ရန် ပြင်ဆင်နေကြောင်း၊ ရွှေသင်္ကန်း ကပ်လှူနိုင်ရေး အတွက် လုံးတော်ပြည့် ရွှေသင်္ကန်း ကပ်လှူနိုင်ရေးအတွက် အလှူငွေများကို စတင်လက်ခံနေပြီး စေတီတော်ကြီးတွင် ယခင်က ကပ်လှူထားသော ရွှေသင်္ကန်း အဟောင်းများမှ ရွှေမိုက်များ ထုတ်ယူနိုင်ရန် လေလံခေါ်ယူထားကြောင်း သိရသည်။
“၂၀၁၂- ၂၀၁၃ ပေါ့ ရွှေမိုက်ထုတ်တာ ကတော့ ၂၀၁၂ နိုဝင်ဘာလမှ ထုတ်တာ၊ အဲဒီအချိန်တုန်းက ဒီစေတီတော်ကြီးကနေ ရွှေမိုက်ထုတ်တာ လေလံငွေက ၆၁၄ သိန်း လေလံရခဲ့တယ်။ ဦးတို့က သတင်းစာတွေမှာလည်း ရွှေမိုက်လေလံ တရားဝင် ကြေညာပြီးပြီ ရွှေမိုက်လေလံက ဒီမှာဆိုလို့ရှိရင် အောက်တိုဘာ ၁၆ ရက်ကနေ စပြီးတော့ လေလံဖောင်တွေကို ရောင်းတယ်၊ နောက်ဆုံးအနေနဲ့ကတော့ နိုဝင်ဘာ ၂ ရက်ကို လေလံဖောင်ပိတ်မယ်၊ နိုဝင်ဘာ ၃ ရက် နေ့လယ် ၁ နာရီမှာတော့ ရွှေမိုက်လေလံပွဲကို ကျင်းပမယ်၊ လေလံပွဲပြီးတဲ့ဟာနဲ့ ဆက်ပြီးတော့ တစ်ပတ်ပဲခြားမယ်။ ရွှေမိုက်လေလံရတဲ့ သူတွေက ရွှေမိုက်တွေထုတ်မယ်၊ ဒီရွှေအဟောင်းတွေက ထုတ်မယ် သူတို့ထုတ်ရင် ၁၅ ရက် ရက်၂၀ တော့ကြာမယ်။ အဲဒါပြီးရင် တစ်ပတ်လောက်နားပြီးရင် စေတီတော်ကြီးမှာရှိတဲ့ ရွှေမိုက်ထုတ်ပြီးသွားတဲ့ အခါမှာ ယခင်ကတည်းကရှိတဲ့ သရိုးတွေပေါ့နော်။ ဆစ်စီးတွေ သရိုးတွေ ပြန်ပြင်ရမယ်၊ ပြင်ပြီးရင် ဦးတို့ကရွှေချဖို့ လုပ်ငန်းကို ဒီဇင်ဘာလ လောက်ထဲမှာစမယ်၊ မတ်လလောက်ထိ လေးလဝန်းကျင်လောက်ဆို ရွှေချလို့ ပြီးမယ်လို့ မျှော်လင့်ပါတယ်” ဟု ရွှေမုဋ္ဌောစေတီတော်ကြီး ဂေါပကအဖွဲ့မှ ရုံးအဖွဲ့မှူး ဦးလှအောင်က ပြောကြားသည်။
ရွှေမုဋ္ဌော စေတီတော်ကြီးမှာ ဉာဏ်တော် ၁၅၃ ပေရှိပြီး မင်းသုံးပါး တည်ထားခြင်း ဖြစ်သောကြောင့် ထီးတော်သုံးဆင့် အထိရှိကာ ပထမအဆင့် ထီးတော်မှာ ရွှေသားအစစ် ထီးတော်ဖြစ်ပြီး ၁၄ ပေါင် နီးပါးရှိကြောင်း၊ ဒုတိယထီးတော်မှာ ငွေသားထီးတော်ဖြစ်ပြီး တတိယထီးတော်မှာ ကြေးထီးတော်ဖြစ်ကြောင်း၊ ထီးတော်ကြီးနှင့် ငှက်မြတ်နားတော်ကို ရွှေသားသင်္ကန်း ကပ်လှူပူဇော်ထားပြီး စုစုပေါင်းရွှေချိန် ၄၄ ပေါင်နီးပါးရှိကာ စိန်ဖူးတော် အပါအဝင် စိန်ပေါင်း ၈၂၉ လုံး၊ ပတ္တမြား ၈၄၃လုံး၊ အခြားကျောက်မျက်ရတနာများ ၁၅၈၈ လုံးဖြင့် စီချယ်ပူဇော်ထားကြောင်း သိရသည်။
