ဇူလိုင်၂၉ ရက်က တပ်မတော်ခန်းမတွင် ကျင်းပသည့် စံမညီ၊ တရားမဝင်ဆေးဝါး၊ ဆေးဝါးအတု လူထုပညာပေးပွဲတွင် ကြည့်ရှုနေသူတစ်ဦးအား တွေ့ရစဉ် (ဓာတ်ပုံ-အိသဉ္ဇာကျော်)
တစ်နိုင်ငံလုံး အတိုင်းအတာဖြင့် လိုင်စင်မရှိ ရောင်းချနေသည့် ဆေးဆိုင်ပေါင်း ၁၀၀ ကျော်ကို စစ်ဆေးတွေ့ရှိထားပြီး ဆိုင်ပိတ်သိမ်းခြင်းနှင့် တရားစွဲဆို အရေးယူခြင်းများ လုပ်ဆောင်ထားကြောင်း မြန်မာနိုင်ငံ အစားအသောက်နှင့် ဆေးဝါးကွပ်ကဲရေး ဦးစီးဌာနမှ ညွှန်ကြားရေးမှူးချုပ် ဒေါက်တာသန်းထွဋ်က ပြောကြားသည်။
“ဆေးဆိုင်စစ်လို့ လိုင်စင်မရှိဘူးဆိုတာ သိတာနဲ့ ချက်ချင်းပိတ်မယ်။ လုံးဝရောင်းခွင့်မရှိဘူး။ ဒီလိုပိတ်ပေမယ့် တချို့က မလိုက်နာဘူး။ ဒီနေ့ပိတ်သွားတယ်။ နောက်နေ့ ခိုးဖွင့်တယ်။ ပထမအဆင့်အနေနဲ့ ကျွန် တော်တို့က ပိတ်လိုက်တယ်။ သူ့ထဲ မှာပါတဲ့ တရားမဝင်ဆေးအားလုံး သိမ်းလိုက်တယ်။ တရားဝင်ဆေး တွေကိုတော့ သိမ်းလို့မရဘူး။ သူက ဝယ်ထားရတာကိုး။ လိုင်စင်လျှောက်ခိုင်းတယ်။ လိုင်စင်လျှောက်နေတဲ့ ကာလမှာ ဆေးတွေကိုတော့ ဘယ်မှ ရောင်းခွင့်မရှိဘူး။ နောက်ပြန်စစ်လို့ ထပ်ရောင်းနေသေးရင်တော့ တရား စွဲပါတယ်။ ပညာပေးခြင်း၊ ခံဝန်ထိုး ခြင်းဆိုတာ တစ်ခါပဲ။ နောက်ပိုင်းဆို ရင်တော့ တရားစွဲပါတယ်။ လိုင်စင်မရှိဘဲရောင်းတဲ့ ဆေးဆိုင်ပေါင်းတစ် နိုင်ငံလုံးမှာ ၁၀၀ မိထားတယ်။ အခုဆို ပိုများလာပါလိမ့်မယ်။ သူတို့ကို ဘယ်လိုအပြစ်ပေးသလဲ ဆိုတာတော့ တရားခွင်ရဲ့ ဆုံးဖြတ်ချက်ဖြစ်ပါတယ်” ဟု ဒေါက်တာသန်းထွဋ်က ပြောကြားသည်။
ရန်ကုန်မြို့တော် စည်ပင်သာယာ နယ်နိမိတ်ပြင်ပရှိ ဈေးများကို မြန်မာနိုင်ငံ အစားအသောက်နှင့် ဆေးဝါးကွပ်ကဲရေး ဦးစီးဌာန အပါအဝင် အစားအသောက်၊ ဆေးဝါးကြီးကြပ်ကွပ်ကဲသော ဌာနများ ပူးပေါင်း၍ စစ်ဆေးရာစပ်ဆေး၊ ထောက်ခံချက်မရှိ ဆေးဝါးများ ရောင်းချမှု အများဆုံးတွေ့ရှိခဲ့ပြီး ဆေးဆိုင်ပိုင်ရှင်များကို ဆက်လက်အရေးယူ လျက်ရှိကြောင်း သိရသည်။
ဇွန်နှင့်ဇူလိုင်လအတွင်း ရန်ကုန်မြို့တော် စည်ပင်သာယာ နယ်နိမိတ်အတွင်းရှိ ဈေးများဖြစ်သည့် သံလျင်၊ ကျောက်တန်း၊ သုံးခွ၊ လှည်းကူး၊ ကော့မှူးမြို့နယ်များ အတွင်းရှိ ဈေးများကို ရှောင်တခင် ကွင်းဆင်းစစ်ဆေး ခဲ့ကြောင်းနှင့် စပ်ဆေး၊ ထောက်ခံချက်မရှိ ဆေးဝါးများ၊ တားမြစ်ထားသည့် အလှကုန်ပစ္စည်းများ ရောင်းချနေသည်ကို စစ်ဆေးတွေ့ရှိခဲ့ကြောင်း မြန်မာနိုင်ငံ အစားအသောက်နှင့် ဆေးဝါးကွပ်ကဲရေး ဦးစီးဌာန (ရန်ကုန်ရုံးခွဲ) မှ သိရသည်။
ဆေးဝါးတင်သွင်း ဖြန့်ဖြူးသည့် ကုမ္ပဏီ၊ ဆေးဝါးရောင်းချသည့် ဆေးဆိုင်များသည် မြန်မာနိုင်ငံတွင် မှတ်ပုံတင်ထားခြင်း မရှိသော ဆေးဝါးများ၊ ဆေးဝါးအတု၊ စံမညီဆေးဝါးများကို တင်သွင်းဖြန့်ဖြူး၊ ရောင်းချခြင်း (လက်လီ/လက်ကား) လုံး၀ မပြုလုပ်ကြရန်နှင့် လိုက်နာဆောင်ရွက်ခြင်း မရှိပါက သက်ဆိုင်ရာ အာဏာပိုင် အဖွဲ့အစည်းက အမျိုးသားဆေးဝါး ဥပဒေပုဒ်မ (၁၈) အရ တရားစွဲဆို အရေးယူသွားမည်ဖြစ်ကြောင်း ကျန်းမာရေးနှင့် အားကစားဝန်ကြီးဌာနမှ ထုတ်ပြန်ကြေညာထားပြီး ဖြစ်သည်။
အမျိုးသားဆေးဝါး ဥပဒေအရ မှတ်ပုံတင်ထားခြင်း မရှိသော ဆေးဝါး၊ မှတ်ပုံတင် ခေတ္တရုပ်သိမ်းခြင်း၊ ပယ်ဖျက်ခြင်း ပြုလုပ်ထားသော ဆေးဝါး၊ ဆေးဝါးအတု၊ စံမညီဆေးဝါး၊ ပျက်စီးဆေးဝါး၊ ရောနှောဆေးဝါးများ၊ ဘေးဥပဒ် ဖြစ်စေနိုင်သည့် ပစ္စည်းများဖြင့် ဖော်စပ်ထုတ်လုပ်ထားသော ဆေးဝါး၊ ကျန်းမာရေး ဝန်ကြီးဌာနက သုံးစွဲရန်မသင့်ဟု အမိန့်ကြော်ငြာစာ ထုတ်ပြန်၍ သတ်မှတ်ထားသော ဘေးအန္တရာယ်ရှိသည့် ဆေးဝါးများကို ထုတ်လုပ်ခြင်း၊ ပြည်တွင်းသို့ တင်သွင်းခြင်း၊ ပြည်ပသို့ တင်ပို့ခြင်း၊ သိုလှောင်ဖြန့်ဖြူး ရောင်းချခြင်းများ ပြုလုပ်ပါက ယင်းဥပဒေဖြင့် အရေးယူနိုင်ကြောင်းနှင့် ဥပဒေပါ ပြဋ္ဌာန်းချက်တစ်ရပ်ရပ်ကို ဖောက်ဖျက် ကျူးလွန်ကြောင်း ပြစ်မှုထင်ရှား စီရင်ခံရပါက ငွေဒဏ်အနည်းဆုံး ကျပ် ၅၀၀၀၀ မှ အများဆုံး ကျပ် ၅၀၀၀၀၀ အထိဖြစ်စေ၊ ထောင်ဒဏ် ခုနစ်နှစ်အထိဖြစ်စေ၊ ဒဏ်နှစ်ရပ်လုံးဖြစ်စေ ကျခံနိုင်ကြောင်း ဖော်ပြထားသည်။
