မကြာသေးမီက သဘာဝဘေးအန္တရာယ်တို့နှင့် ဆက်တိုက်ကြုံထားခဲ့ရသော အင်ဒိုနီးရှားနိုင်ငံသို့ ဒေါ်လာ တစ်ဘီလျံငွေကြေး ထောက်ပံ့မည်ဟု ကမ္ဘာ့ဘဏ်က အောက်တိုဘာ ၁၄ ရက်တွင် ကြေညာခဲ့သည်။
ဘာလီကျွန်း၌ ကမ္ဘာ့ဘဏ်နှင့် အပြည်ပြည်ဆိုင်ရာ ငွေကြေးရန်ပုံငွေအဖွဲ့ (IMF) တို့၏ နှစ်ပတ်လည်အစည်းအဝေးများ ကျင်းပနေစဉ် ကမ္ဘာ့ဘဏ်ဥက္ကဋ္ဌ ခရစ္စတီလီနာဂျီ အိုဂျီဗာက ယခုထောက်ပံ့မှုအကြောင်းကို ထုတ်ဖော်ပြောကြားခဲ့ခြင်း ဖြစ်သည်။
စက်တင်ဘာ ၂၈ ရက်က ဆူလာဝေဆီ ကျွန်းပေါ်မှ ပါလူမြို့တွင် ပြင်းအား ၇ ဒသမ ၅ အဆင့်ရှိသည့် ငလျင်နှင့် နောက်ဆက်တွဲ ဆူနာမီလှိုင်း ဝင်ရောက်မှုကြောင့် လူ ၂၀၀၀ ကျော်သေဆုံးပြီး ပျောက်ဆုံးနေသူ ၅၀၀၀ ကျော်ကိုလည်း ဘယ်တော့မှ ပြန်လည်ရှာ တွေ့ဖွယ်မရှိတော့ပေ။ ရှာဖွေမှုများကို မရပ်လိုက်မီက ကယ်ဆယ်ရေးသမားများသည် အပျက်အစီးများကြားတွင် သေဆုံးသူများကို သီတင်းနှစ်ပတ်ကြာ ပိုက်စိပ်တိုက်ရှာဖွေခဲ့ကြသေးသည်။
ပြန်လည်တည်ဆောက်ရေးလုပ်ငန်းများတွင် အသုံးပြုနိုင်သော ယခုထောက်ပံ့ငွေကို ချေးငွေပုံစံဖြင့် ကမ္ဘာ့ဘဏ်ကပေးမည်ဖြစ်သည်ဟု ဂျီယိုဂျီဗာက ပြောကြားခဲ့သည်။ အဆိုပါထောက်ပံ့ငွေများကို အင်ဒိုနီးရှားနိုင်ငံ၏ သဘာဝဘေးဒဏ်များကို ကြံ့ကြံ့ခံနိုင်မှုအား တည်ဆောက်ရာတွင် ကူညီပေးရေးအတွက်လည်း ရည်ရွယ်သည်ဟု သိရသည်။ ထိုမှသာ အင်ဒိုနီးရှားသည် နောင်တွင်ဖြစ်ပေါ်လာမည့် သဘာဝဘေးဒဏ်များကိုရင် ဆိုင်ရာတွင် ပိုမိုကောင်းမွန်စွာ ပြင်ဆင်နိုင်လိမ့်မည်ဖြစ်သည်။ “ပိုမိုများပြားလာမည့် ရာသီဥတုပြောင်းလဲမှုဖြစ်စဉ်တွေနဲ့အတူ သဘာဝဘေးအန္တရာယ်တွေကတော့ ဆက်တိုက်ထိုး နှက်ဝင်ရောက်နေကြမှာဖြစ်ပါတယ်” ဟု ဂျီယိုဂျီဗာက ပြောကြားခဲ့သည်။ ၎င်းသည် ယခုသီတင်းပတ်အစောပိုင်းကပင် ပါလူမြို့သို့ လာရောက်ခဲ့သေးသည်။
“အသက်ဆုံးရှုံးခဲ့သူတွေအတွက် လုပ်ဆောင်ပေးနိုင်တဲ့ အကောင်းဆုံးအမှတ်တရကတော့ ပိုပြီးကောင်းအောင် တည်ဆောက်ပေးဖို့ပါ။ ဒါမှသာ နောက်တစ်ခါသဘာဝဘေး ကျရောက်ရင် ထိခိုက်သေဆုံးရမှုတွေ ပိုပြီးနည်းပါးမှာပါ” ဟု ၎င်းဆိုသည်။ ချေးငွေပေး ရေးအစီအစဉ်တွင် သဘာဝဘေးဒဏ်ခံခဲ့ရသည့် အဆင်းရဲဆုံးမိသားစု ၁၅၀၀၀၀ သို့ ခြောက်လမှ တစ်နှစ်အတွင်း ငွေကြေးပံ့ပိုးခြင်းလည်း ပါဝင်သည်။ ကမ္ဘာ့ဘဏ်၏ ယခုထောက်ပံ့မှုကို အင်ဒိုနီးရှား ဘဏ္ဍာရေးဝန်ကြီး သီရိမူယာနီအန်ဒရာဝတီက ကြိုဆိုကြောင်း ပြောကြားခဲ့သည်။ Ref ; AFP
