ရန်ကုန်တိုင်း စာရင်းစစ်ချုပ် အစီရင်ခံစာတွင် ပါရှိသည့် ပြည်သူလူထု နစ်နာဆုံးရှုံးမှု ထင်ထင်ရှားရှား ပေါ်လွင်နေသည့် အကြောင်းအရာ ငါးခုနှင့် ပတ်သက်ပြီး အဂတိလိုက်စားမှု တိုက်ဖျက်ရေးကော်မရှင်သို့ အောက်တိုဘာ ၁၂ရက် ညပိုင်းတွင် တိုင်ကြားခဲ့ကြောင်း ရန်ကုန်တိုင်းဒေသကြီး လွှတ်တော် ကိုယ်စားလှယ်ဟောင်းနှင့် ဥပဒေပညာရှင် ဒေါက်တာဒေါ်ညိုညိုသင်းက ပြောကြားသည်။
“မနေ့ညက အီးမေးလ်နဲ့ တိုင်လိုက်တယ်။ စာတိုက်ကတော့ တနင်္လာနေ့ဆိုရင် ကော်မရှင်က ရမှာပေါ့၊ အန်တီက တိုင်ရခြင်း အကြောင်းရင်းက လူတစ်ဦး တစ်ယောက်ကို တိုင်တာမဟုတ်ဘူး။ အစိုးရအဖွဲ့ကိုတိုင်တာ မဟုတ်ဘူး။ အဲဒီအစီရင်ခံစာမှာ ပါနေတဲ့ ပြည်သူလူထုရဲ့ နစ်နာဆုံးရှုံးမှု ထင်ထင်ရှားရှားပေါ်လွင်နေတဲ့ ငါးခုကို တိုင်တာဖြစ်တယ်” ဟု ဒေါက်တာဒေါ်ညိုညိုသင်းက ပြောကြားသည်။
တိုင်ကြားစာတွင် ရန်ကုန်တိုင်းစာရင်းစစ်ချုပ် အစီရင်ခံစာပါ နိုင်ငံတော်၏ နစ်နာမှုများကို အဂတိလိုက်စားမှု တိုက်ဖျက်ရေး ကော်မရှင်က စုံစမ်းစစ်ဆေးနိုင်ရန်၊ အဆိုပါ သတင်းသည် မြန်မာ့နိင်ငံရေး လေ့လာသူများနှင့် သတင်းမီဒီယာများကြား လူထုစိတ်ဝင်စားမှု အမြင့်ဆုံးသတင်း ဖြစ်နေကြောင်း၊ ၂၀၁၆ -၂၀၁၇ ဘဏ္ဍာ နှစ်အတွက် ရန်ကုန်တိုင်းဒေသကြီး စာရင်းစစ်ချုပ် အစီရင်ခံစာကို အခြေပြုပြီး နိုင်ငံတော်၏ ဆုံးရှုံးနစ်နာမှုများကို ထုတ်ဖော်တင်ပြ တိုင်တန်းခြင်းဖြစ်ကြောင်း ဖော်ပြထားသည်။
ယခုကဲ့သို့ နစ်နာမှု ဖြစ်ရစေခြင်းများသည် လုပ်ပိုင်ခွင့်ရှိသူများ၏ အဂတိမကင်းသော ဥပဒေချိုးဖောက်မှု များကြောင့် ဖြစ်ကြောင်း၊ အဂတိလိုက်စားမှု၏ အဓိပ္ပါယ်ဖွင့်ဆိုချက်တွင် မည်သူမဆို ပြည်သူ့ဘဏ္ဍာငွေကို စီမံကိုင်တွယ် ဆောင်ရွက်ရာတွင် တည်ဆဲဥပဒေ လုပ်ထုံးလုပ်နည်း စည်းမျဉ်းများကို ဖောက်ဖျက်ပြီး နိုင်ငံတော်၏ ငွေကြေးနဲ့ပိုင်ဆိုင်မှုကို ထိခိုက်နစ်နာစေပါက အဂတိလိုက်စားမှုဖြစ်ကြောင်း ပါရှိပြီး၊ အစီရင်ခံစာပါ ကြီးမားသည့် နစ်နာမှုတစ်ခုသည်၂၀၁၅-၂၀၁၆ ဘဏ္ဍာနှစ်အတွင်း လူပုဂ္ဂိုလ်တစ်ဦးထဲကို ပေ ၄၀ ပေ ၆၀ ရှိ မြေကွက် ၂၁ ကွက်စာ အကျယ်အဝန်းကို သက်သာသည့် နှုန်းထားများဖြင့် ရောင်းချထားခြင်း အပါအဝင် နာမည်ကျော် ပုဂ္ဂလိက လုပ်ငန်းရှင်အချို့ကို စီမံကိန်းအကြောင်းပြပြီး မြေဧကထောင်ချီ ပေးအပ်ခဲ့တဲ့ကိစ္စဖြစ်ကြောင်း၊ အဆိုပါ မြေများအတွက် မြေဂရန်ဝန်ဆောင်ခများ သတ်မှတ်ရာတွင် ဂရန်သစ် ဝန်ဆောင်ခနှုန်းဖြင့် မကောက်ခံသည့်အတွက် နိုင်ငံတော်ဝင်ငွေ အနည်းဆုံး ၄၁ ဒသမ ၉၇ ဘီလျံကျော် နစ်နာခဲ့သည်ကို အစီရင်ခံစာမှာ ဖော်ပြထားကြောင်း တိုင်ကြားစာတွင် ဖော်ပြထားသည်။
ထို့ပြင် ကျွန်မတို့၏ ပြည်သူ့ဘ၀ အခြေအနေကို တစေ့တစောင်း ကြည့်မည်ဆိုပါက ပြည်သူ့ဆေးရုံအများစုမှာ (တိုက်နယ်ဆေးရုံများ) အပါအဝင် ၂၄ နာရီ လျှပ်စစ်မီးရှိတာက ရှာမှရှားဖြစ်နေကြောင်း၊ လူနာနှင့် ဆရာဝန်အချိုးမမျှတမှုများအပြင် အချို့ဆေးရုံများ၌ ကုတင်အပါအဝင် ဆရာဝန်၊ သူနာပြုနှင့် လူနာရှင်တွေအတွက်နေရာထိုင်ခင်း မလုံလောက်ခြင်းများ၊ တစ်နိုင်ငံလုံးတွင် အရေးပေါ်ကုသမှုများအတွက် လိုအပ်သည့် ဆေးဝါးအပါအဝင် အခြေခံကျသော သွေးစစ်ဆေးရေး၊ နှလုံးနှင့် ကျောက်ကပ်ဆိုင်ရာ စက်ကိရိယာများ၊ ကင်ဆာ ဝေဒနာရှင်များအတွက် ဓာတ်ရောင်ခြည်ပေးသည့် စက်ကိရိယာများ အစရှိသဖြင့် အလုံအလောက် မရှိသဖြင့် အသက်မဆုံးရှုံးသင့်ပဲ ဆုံးရှုံးသွားသည့် ပြည်သူများစွာ ရှိနေကြဆဲဖြစ်ကြောင်း၊။ ယခုကျမတို့ ဆုံးရှုံးနေသည့် ၄၂ ဘီလျံ နီးပါးသည် ပြည်သူထောင်ပေါင်းများစွာ၏ အသက်ကို ကယ်တင်နိုင်သော ဆုံးရှုံးမှုပမာဏ ဖြစ်ကြောင်း အဂတိလိုက်စားမှု တိုက်ဖျက်ရေး ကော်မရှင်ထံ လေးစားစွာ တင်ပြအပ်သည်ဟု တိုင်ကြားစာတွင် ဖော်ပြထားသည်။
ယင်းအပြင် နောက်ထပ်ဆုံးရှုံးမှုဖြစ်စဉ် တစ်ခုသည် ရွှေတိဂုံစေတီတော်ကြီး၏ အနောက်ဖက်မုဒ် မျက်နှာချင်းဆိုင်ရှိ ပြည်သူ့ဥယျာဉ်အတွင်း ပုဂ္ဂလိကကုမ္ပဏီတစ်ခုကို ကာလပေါက်ဈေးထက် အများကြီးဈေးလျော့ပြီး ဌားရမ်းထားသည်ကို တွေ့ရကြောင်း၊ ယခုဖြစ်စဉ်သည် ပြည်သူလူထုရရန်ငွေသည် လစဉ် တစ်ဘီလျံ နစ်နာနေကြောင်း၊ ယခုငွေပမာဏသည် ရန်ကုန်တိုင်းအတွင်းရှိ ခိုကိုးရာမဲ့ပြည်သူ ၁၆၆၀၀ ကျော်ကို တစ်ထောင်ကျပ်တန် တန်ဖိုးသင့် ထမင်းနှင့် ဟင်းနေ့စဉ် ည/မနက် ကျွေးမွေးနိုင်တဲ့ပမာဏ ဖြစ်ကြောင်း၊ မဖြစ်မနေ တင်ပြချက် နောက်တစ်ခုသည် နိုင်ငံတော်၏ ဆုံးရှုံးမှုများထဲမှ တစ်ခုအပါအဝင်ဖြစ်သည့် ရန်ကုန်တိုင်း ဗိုလ်တထောင်မြို့နယ်ရှိ ၄၅ လမ်းမှ စီမံကိန်းတစ်ခုဖြစ်ကြောင်း၊ စီမံကိန်းတွင် နိုင်ငံတော်မှ နစ်နာငွေဟာ ၉ ဒသမ၂ ဘီလျံ ဖြစ်သည်ဟု အစီရင်ခံစာတွင် ထုတ်ဖော်ထားကြောင်း တိုင်ကြားစာတွင် ဖော်ပြထားသည်။
ဆက်လက်ပြီး တိုင်ကြားစာတွင် ဗဟန်းမြို့နယ်ရှိ ငှားရမ်းထားတဲ့မြေ ၁၅ ဧကအတွက် နှစ်စဉ် ၃ ဒသမ ၈ ဘီလျံ ဆုံးရှုံးနေပြီး ကန်တော်ကြီး ကန်တော်မင်နှင့် မြိုင်ဟေဝန် ဥယျာဉ်များသည် နိုင်ငံတော်၏ ဆုံးရှုံးမှုသည် နှစ်စဉ် ၂ ဘီလျံ ရှိနေကြောင်း၊ ယခုဆုံးရှုံးမှုပမာဏသည် ရွှေ့ပြောင်းနေထိုင်မှု အများဆုံးဖြစ်ပြီး အိမ်ငှားခ မြင့်မားလွန်းသည့် ရန်ကုန်မြို့က သာမန်ပြည်သူများအတွက် သိန်း ၁၀၀ တန် တန်ဖိုးနည်း တိုက်ခန်းပေါင်း ၂၅၀၀ ခန့်ကို ကျန်ရှိသက်တမ်း ၃ နှစ်အတွင်း ဆောက်လုပ်ချထားပေးနိုင်သည့် ပမာဏဖြစ်ကြောင်း၊ ယခုတင်ပြခဲ့သည့် နစ်နာမှုများကို လေ့လာကြည့်ပါက တူညီချက် တစ်ခုသည် လုပ်ပိုင်ခွင့်ရှိသူ တစ်ယောက် သို့မဟုတ် တစ်ဖွဲ့က လူတစ်ဦးတစ်ယောက် ဒါမှမဟုတ် ပုဂ္ဂလိကကုမ္ပဏီများကို တည်ဆဲဥပဒေများကို ချိုးဖောက်ပြီး အခွင့်အရေး ပေးခဲ့မှုကြောင့်သာ နိုင်ငံတော်၌ ယခုကဲ့သို့ ကြီးမားသည့် နစ်နာမှုများ ဆက်တိုက်ပေါ်ပေါက်လာခြင်း ဖြစ်ကြောင်း တိုင်ကြားစာတွင် ဖော်ပြထားသည်။
နိုင်ငံရေး စောင့်ကြည့်သူများအကြား စိုးရိမ်နေသည့် အရာတစ်ခုသည် အဂတိလိုက်စားမှု တိုက်ဖျက်ရေး ကော်မရှင်က ရန်ကုန်တိုင်းဒေသကြီး စာရင်းစစ်ချုပ်၏ အစီရင်ခံစာပါ ကိစ္စများကို ကျော်စောသတင်းအဖြစ် မှတ်ယူပါ့မလား၊ ဥပဒေအရ ကျော်စောသတင်း ဆိုသည်မှာ အများပြည်သူအတွင်း ပျံ့နံှ့နေသော သတင်းတရပ်ရပ်တွင် တစ်ယောက်ယောက်သည် အဂတိလိုက်စားမှုနှင့် ပတ်သက်ပြီး ခိုင်လုံသည့် အထောက်အထား ရှိနိုင်သည်ဟု ကော်မရှင်က ယုံကြည်ရန် ပေါ်ပေါက်သော သတင်းဖြစ်ကြောင်း၊ အစီရင်ခံစာကိုယ်တိုင်က ခိုင်လုံသော အထောက်အထား ဖြစ်သည့်အတွက် ယခုကိစ္စသည် ကျော်စောသတင်း ဖြစ်ကြောင်း ထင်ရှားလှကြောင်း၊ ထို့အပြင် အဂတိလိုက်စားမှု တိုက်ဖျက်ရေး ဥပဒေပုဒ်မ ၃ (က) အပိုဒ် ၂ ပါ အဂတိလိုက်စားမှု၏ အဓိပ္ပါယ်ဖွင့်ဆိုချက်ဖြင့် ထင်ထင်ရှားရှား အကြုံးဝင်နေသည့် နိုင်ငံတော်ရဲ့ ဆုံးရှုံးမျာမှု ဖြစ်သဖြင့် ပြည်သူများကိုယ်စား တိုင်ကြားအပ်သည်ဟု တိုင်ကြားစာတွင် ဖော်ပြထားသည်။
