ပခုက္ကူ၊ မြိုင်နှင့် ရေစကြိုမြို့နယ်များ အတွင်းရှိ စစ်မှုထမ်းဟောင်း ၁၀၀ ကျော်ကတပ်မတော်အား ထောက်ခံကြောင်းနှင့် ပြင်ပစွက်ဖက်မှုများအား ဆန့်ကျင်ကြောင်း ဆန္ဒထုတ်ဖော်မှုကို အောက်တိုဘာ ၁၄ ရက်က ပခုက္ကူမြို့တွင် ပြုလုပ်ခဲ့ကြောင်း သိရသည်။

ဆန္ဒထုတ်ဖော်သူများသည် ‘တပ်မတော်စွမ်းမှ တိုင်းပြည်အေးချမ်းမည်’ ၊ ‘ဘက်လိုက်သောကုလသမဂ္ဂ အချက်အလက်ရှာဖွေရေးကော်မရှင်၏ မမျှမတ တစ်ဖက်သတ် အစီရင်ခံစာတို့ လုံးဝလက်မခံ’ ၊‘မဆီမဆိုင် နိုင်ငံရေးစွက်ဖက်သော Facebook ကို လုံးဝဆန့်ကျင်ရှုတ်ချသည်‘၊ ‘တပ်မတော်အင်အား ချိုးနှိမ်မှုမှန်သမျှတို့ လုံးဝလက်မခံ’၊ ‘APHR ၏ အောက်လုံးအစီရင်ခံစာ အလိုမရှိ အလိုမရှိ’ စသည့် စာသာများ ပါဝင်သည့် ဗီနိုင်းပိုစတာများ၊ နိုင်ငံတော်အလံများ၊ ကာကွယ်ရေးဦးစီးချုပ် ဓာတ်ပုံများကိုင်ဆောင်၍ ဆန္ဒထုတ်ဖော်မှု ပြုလုပ်ခဲ့ကြသည်။

ပခုက္ကူ၊ မြိုင်နှင့် ရေစကြိုမြို့နယ်များ အတွင်းရှိ စစ်မှုထမ်းဟောင်း ၁၀၀ ကျော်က ပခုက္ကူမြို့ ဗိုလ်ချုပ်ပန်းခြံရှေ့တွင် စုဝေးပြီး ‘အချုပ်အခြာ အာဏာတည့်တံ့ခိုင်မြဲရေးဒို့အရေး’ ၊ ‘ပြည်ထောင်စုမပြိုကွဲရေးဒို့အရေး’၊ ‘တိုင်းရင်းသားစည်းလုံးညီညွတ်မှု မပြိုကွဲရေး ဒို့အရေး’ စသည့် ကြွေးကြော်သံများဖြင့် ဆန္ဒထုတ်ဖော်ခဲ့ကြသည်။

“အမျိုးသားကာကွယ်ရေးနဲ့ လုံခြုံရေးလုပ်ငန်းများမှာ တပ်မတော်ရဲ့ အရန်အင်အားအဖြစ် တာဝန်သိသိနဲ့ ပါဝင်ဆောင်ရွက်ရေး ဖြစ်ပါတယ်။ မြန်မာနိုင်ငံစစ်မှုထမ်းဟောင်းအဖွဲ့ ပခုက္ကူမြို့နယ် မြိုင်မြို့နယ် ရေစကြိုမြို့နယ် စစ်မှုထမ်းဟောင်းများရဲ့ တပ်မတော်ကို ထောက်ခံခြင်းနှင့် ပြင်ပစွက်ဖက် လုပ်ဆောင်မှုများကိုဆန့်ကျင် ဆန္ဒဖော်ထုတ်ပွဲပဲ ဖြစ်ပါတယ်”ဟု ဆန္ဒထုတ်ဖော်ရာတွင် ပါဝင်သူတစ်ဦးက ဟောပြောသည်။

ရခိုင်အရေးနှင့် ပတ်သက်၍ မြန်မာ့တပ်မတော်မှ ထိပ်ပိုင်းခေါင်းဆောင်အား အရေးယူရန် ပြင်ဆင်လာပြီးနောက်တွင် ပြည်တွင်းရှိ စစ်မှုထမ်းဟောင်းများက တပ်မတော်အား ထောက်ခံကြောင်း ဆန္ဒထုတ်ဖော်မှု ဆက်တိုက်ပြုလုပ်လာခဲ့သည်။