ရှမ်းပြည်နယ်(မြောက်ပိုင်း) လားရှိုး-မူဆယ် ပြည်ထောင်စုကားလမ်းမကြီးပေါ်ရှိ သိန္နီမြို့အနီး ရေပူအမြဲတမ်းစစ်ဆေးရေးစခန်းမှ အဖွဲ့စုံဖြင့်လားရှိုးနှင့်သိန္နီမြို့ ပြည်ထောင်စုကားလမ်းမကြီး အနီးတစ်ဝိုက်တွင် အောက်တိုဘာ ၁၃ ရက်က ရှောင်တခင်စစ်ဆေးမှုများ ပြုလုပ်ခဲ့ရာ ရေပူအမြဲတမ်းစစ်ဆေးရေး စခန်းမရောက်မီ မိုင်းလီကျေးရွာ နှင့် ကောင်းဆာကျေးရွာအနီးတွင် တရားမဝင်သစ်များ တင်ဆောင်ကာ ရပ်တန့်ထားသော သစ်တင်ကား ၁၁ စီးအား ပိုင်ရှင်မဲ့ ဖမ်းဆီးရမိခဲ့ကြောင်း သိရသည်။
ရေပူအမြဲတမ်းစစ်ဆေးရေးစခန်းမှ ရှောင်တခင်ဖမ်းဆီးရေးအဖွဲ့သည် နံနက် ၁၀ နာရီအချိန်က လားရှိုးမြို့ နှင့် သိန္နီမြို့ကြား မိုင်တိုင်အမှတ် ၁၉၃ မိုင် ခြောက်ဖာလုံ အနီးရှိ မိုင်းလီရွာသစ်အနောက်ဖက် ကွင်းပြင်တွင် NISSAN DIESEL UD ခြောက်ဘီးယာဉ်ပေါ်မှ ပိတောက်ဓားရွေ ၁၆တုံး၊ TOYOTA WISH ခဲရောင်ပေါ်မှ ပိတောက်ဓားရွေ ၃၃တုံး၊ TOYOTA WISH ခဲရောင်ပေါ်မှ ပိတောက်ဓားရွေ ၆၄ တုံး၊ TOYOTA WISH ခဲရောင်ပေါ်မှ ပိတောက်ဓားရွေ ၅၈ တုံး၊ TOYOTA WISH အဖြူရောင်ပေါ်မှ ပိတောက်ဓားရွေ ၃ဝတုံး စုစုပေါင်းယာဉ် ခြောက်စီးပေါ်မှ ၂၃၁ တုံး ဖမ်းဆီးရမိခဲ့သည်။
ထပ်မံ၍ နံနက် ၁၁နာရီတွင် လားရှိုး မြို့နှင့် သိန္နီမြို့ကြား မိုင်တိုင်အမှတ် ၁၉၅ မိုင် ခြောက်ဖာလုံအနီးရှိ ကောင်းဆာကျေးရွာ အနောက်ဖက် ဘောလုံးကွင်းပြင်အတွင်းတွင် TOYOTA ALphard ယာဉ်ပေါ်မှ ပိတောက်ဓားရွေ ၃၄တုံး၊ FOTON ခြောက်ဘီးယာဉ်ပေါ်မှ ၂၃တုံး၊ NISSAN X – Trail ခဲရောင်ယာဉ်ပေါ်မှ ပိတောက်ဓားရွေ ၁၅ တုံး၊ TOYOTA WISH ယာဉ်ပေါ်မှ ပိတောက် ဓားရွေရှစ်တုံး၊ TOYOTA Hiace ယာဉ် ပေါ်မှ ပိတောက်ဓားရွေ ၁၁ တုံး စုစုပေါင်း ယာဉ်ငါးစီးပေါ်မှ ပိတောက်ဓားရွေ ၉၁ တုံး ဖမ်းဆီးရမိခဲ့ကြောင်း သိရသည်။
“လားရှိုးဘက်ကနေလာရင် ရေပူအမြဲ တမ်းစစ်ဆေးရေးစခန်း မရောက်ခင်မိုင်းလီ ကျေးရွာနဲ့ ကောင်းဆာကျေးရွာအနီးမှာ သစ်တွေတင်ထားတဲ့ သစ်တင်ကား ၁၁ စီး ဖမ်းဆီးရမိခဲ့ပါတယ်။ နံနက် ၁ဝနာရီလောက်မှာ မိုင်းလီကျေးရွာနားမှာ ခရီးသည်တင်ယာဉ်ငယ်ပုံစံ အိမ်စီးကားပုံစံ ကားငယ်လေး ခြောက်စီး၊ နံနက် ၁၁ နာရီလောက်မှာ ကောင်းဆာကျေးရွာနားမှာက ငါးစီးပူးပေါင်း အဖွဲ့နဲ့ ဖမ်းဆီးရမိခဲ့တာပါ။ ဖမ်းဆီးရမိတဲ့ အချိန်မှာတော့ သစ်တင်ကားတွေပေါ်မှာ မောင်းသူတွေ တစ်ယောက်မှ မရှိတော့ပါဘူး” ဟု သိန္နီမြို့ ရေပူအမြဲတမ်းစစ်ဆေးရေး စခန်းတွင် တာဝန်ကျနေသူ တောအုပ်တစ်ဦးက ပြောကြားသည်။
အဆိုပါ သစ်တင်ယာဉ် ၁၁ စီးပေါ်မှ ပိတောက်ဓားရွေ စုစုပေါင်း ၃၂၂ တုံး ၊ စုစုပေါင်းတန်ချိန် ၁၀ ဒသမ ၅၇၆၂ တန် ဖမ်းဆီးရမိခဲ့ပြီး ပြည်သူပိုင်ပစ္စည်း ကာကွယ်စောင့်ရှောက်ရေး ဥပဒေပုဒ်မ -၆-(၁)ဖြင့် သိန္နီမြို့မရဲစခန်းတွင် အမှုဖွင့်စစ်ဆေးအရေးယူထားကြောင်း သိရသည်။
