မန္တလေးတိုင်းဒေသကြီး၊ ကျောက်ဆည်မြို့တွင် နှစ်စဉ် သီတင်းကျွတ်လဆန်း ၁၄ ရက်၌ ကျင်းပပြုလုပ်သည့် ရွှေသာလျောင်းဘုရား ဆင်လှူပွဲတော်နှင့် (၄၁) ကြိမ်မြောက် ရိုးရာဆင်အကအလှပြိုင်ပွဲတွင် ပြိုင်ပွဲဝင်ဆင်အဖွဲ့ ၂၀ ဝင်ရောက် ယှဉ်ပြိုင်ခဲ့ကြောင်း သိရသည်။
ကျောက်ဆည်မြို့ရှိ ရွှေသာလျောင်းဘုရား ဆင်လှူပွဲတော်နှင့်(၄၁)ကြိမ်မြောက် ရိုးရာဆင်အကအလှပြိုင်ပွဲကို အောက်တိုဘာ ၂၃ ရက် နံနက် ၈ နာရီအချိန်က အခမ်းအနားဖြင့် စတင်ဖွင့်လှစ်ခဲ့ပြီး ဖွင့်ပွဲအခမ်းအနားသို့ မန္တလေးတိုင်းဒေသကြီး ဝန်ကြီးချုပ် ဒေါက်တာဇော်မြင့်မောင်နှင့် အစိုးရအဖွဲ့၊ မန္တလေးတိုင်းဒေသကြီး လွှတ်တော် ဥက္ကဋ္ဌနှင့် အဖွဲ့တို့က တက်ရောက် ဖွင့်လှစ်ပေးခဲ့ကြပြီး ဆင်အကအလှ ပြိုင်ပွဲဝင်မည့်ဆင်များ၊ ရိုးရာဂုဏ်ထူး ဆောင်ဆင်အဖွဲ့များနှင့် မြို့ခံဆင်အဖွဲ့များက ဆင်အကအလှများဖြင့် ကပြဖျော်ဖြေ ပေးခဲ့ကြသည်။
ယခုနှစ်တွင် ပြုလုပ်သည့် (၄၁)ကြိမ်မြောက် ရိုးရာဆင်အကအလှပြိုင်ပွဲကို ယခင်နှစ်များကဲ့သို့ မဟုတ်ဘဲ အမှတ်ပေးဒိုင်အဖွဲ့များကို အပြောင်းအလဲပြုလုပ်ခဲ့ပြီး ပွဲတော်ကျင်းပရေး ကော်မတီဝင်များကိုပါ အပြောင်းအလဲ ပြုလုပ်ထားကြောင်း သိရသည်။ ရိုးရာဆင်အကအလှ ယှဉ်ပြိုင်မည့် အဖွဲ့များကို အမှတ်ပေးမည့် ဒိုင်အဖွဲ့များက ခုံအမှတ်(၁) ဗဟိုခုံ၊ ရွှေသာလျောင်းတောင်ခြေ ဆင်ပြိုင်ကွင်း၊ ခုံအမှတ်(၂) မြို့လယ်မီးပွိုင့် ရန်ကုန်-မန္တလေး ကားလမ်း၊ ခုံအမှတ်(၃) လေးမျက်နှာဘုရား တောင်ဘက် တောင်ခြေပတ်လမ်း အစရှိသဖြင့် နေရာသုံးနေရာ ခွဲကာ အမှတ်ပေးသွားမည်ဖြစ်ကြောင်း သိရသည်။
“ဒီနှစ် ရိုးရာဆင်ပြိုင်ပွဲမှာတော့ အပြောင်းအလဲတွေ လုပ်ဆောင်ထားပါတယ်။ အမှတ်ပေးတဲ့ဒိုင်တွေကအစ မျှမျှတတ ဖြစ်စေဖို့အတွက် အပြောင်းအလဲတွေ အကုန်လုံး လုပ်ဆောင်ထားပါတယ်။ နောက်တစ်ခုက သူ့ရဲ့သက်ဆိုင်ရာ ပညာရပ်အလိုက် ဥပမာ အတီးပညာ၊ အဆိုပညာတွေပေါ့ အဲဒါတွေနဲ့ပတ်သက်ပြီး သက်ဆိုင်ရာ ယဉ်ကျေးမှုတက္ကသိုလ်က ဆရာတွေကို ခေါ်ယူပြီးတော့ အမှတ်ပေး ရွေးချယ်မှာ ဖြစ်ပါတယ်။ နောက်တစ်ခု ဆင်အကအလှပေါ့။ ရိုးရာဆင်အကနဲ့ ပတ်သက်ပြီး ကျောက်ဆည်က စတာဖြစ်တာကြောင့် ကျောက်ဆည်က ဆင်အကပညာရှင် ဆရာကြီးသုံးဦးကို ခေါ်ယူပြီး ဒိုင်သုံးခုမှာ အမှတ်ပေးသွားမှာ ဖြစ်ပါတယ်။ ပြိုင်ပွဲကျင်းပရေး ကော်မတီကတော့ ကျွန်တော်တို့ကော်မတီကနေ သတ်မှတ်ပေးထားတဲ့ စည်းကမ်းချက်တွေနဲ့ ညီမညီဆိုတာကို အမှတ်ပေးတာ ဖြစ်ပါတယ်။ ဒီနှစ်ကတော့ ရိုးရာဆင်ပြိုင်ပွဲကို ဆင်အဖွဲ့ ၂၀ ပါဝင်ယှဉ်ပြိုင်ကြမှာ ဖြစ်ပါတယ်။ ပြိုင်ပွဲဝင်ဆင် အမျိုးအစားတွေကတော့ ကလေးဆင်၊ ရိုးရာဆင်၊ ဘော်ကြယ်ဆင်၊ သဘာဝဆင်ဆိုပြီး လေးမျိုးပါဝင်ယှဉ်ပြိုင်ကြမှာ ဖြစ်ပါတယ်။ အဲဒီလေးမျိုးထဲမှာက ရိုးရာဆင်ကတော့ ပြိုင်ပွဲရဲ့ အဓိကအသက်လို့ ပြောလို့ရပါတယ်။ သူက ယှဉ်ပြိုင်ရတဲ့ နေရာမှာလည်း ခက်ခဲပါတယ်။ အခုပြိုင်ပွဲမှာလည်း ရိုးရာဆင်က အများဆုံး ယှဉ်ပြိုင်ကြမှာ ဖြစ်ပါတယ်။ ဒီနှစ်မှာတော့ အပြောင်းအလဲတွေ အများကြီး လုပ်ဆောင်ထားပါတယ်။ ဆင်ပြိုင်ပွဲကိုတိုးဝှေ့ပြီး မကြည့်ရအောင် ကျယ်ကျယ်ဝန်းဝန်း ကြည့်ရဖို့အတွက် ဗဟိုခုံမဟုတ်တဲ့ ဒိုင်နှစ်နဲ့သုံးခုံတွေကိုလဲ ဆင်မြင့်ပေါ်မှာ ယှဉ်ပြိုင်လို့ရအောင် ပြင်ဆင်ပေးထားပါတယ်။ နောက်နှစ် ဆင်ပြိုင်ပွဲတွေမှာတော့ ဒီနှစ်တွေထက်ပိုပြီး ဆင်အဖွဲ့တွေပိုပြီး ပြိုင်ပွဲဝင်လာနိုင်စေဖို့အတွက် ပြိုင်ပွဲဝင်ခုံတိုင်းမှာ အသံချဲ့စက်တွေ ထားပေးသွားမယ်။ ခေတ်စနစ် အခြေအနေအရ ပြိုင်ပွဲဝင်တဲ့ ဆင်အဖွဲ့တွေက ကုန်ကျစရိတ်တွေ ပိုများလာပါတယ်။ ဒါကြောင့် နောင်နှစ်တွေမှာ ဆင်အဖွဲ့တွေ ကုန်ကျစရိတ် သက်သာစေဖို့အတွက် စက်တွေကို ဆင်အဖွဲ့တွေ ယှဉ်ပြိုင်မယ့် ခုံတိုင်းမှာ ထားပေးသွားဖို့ စီစဉ်ထားပါတယ်။ ဆင်ပြိုင်ပွဲဟာ တစ်ရက်ထဲ ကျင်းပတာ ဖြစ်ပါတယ်။ ဒါပေမယ့် ပြိုင်ပွဲဝင်တဲ့ ဆင်အဖွဲ့တွေများလာခဲ့မယ်ဆိုရင် ပြောင်းလဲလာတဲ့ ခေတ်စနစ် အခြေအနေအရ တစ်ရက်ထက်ပိုလာရင် ပိုလာနိုင်ပါတယ်” ဟု ကျောက်ဆည်မြို့ ရိုးရာဆင်အကအလှပြိုင်ပွဲ ကျင်းပရေးကော်မတီနှင့် ဆုပေးရွေးချယ်ရေးအဖွဲ့မှ ကိုစိုးသီဟက ပြောကြားသည်။
ကျောက်ဆည်မြို့ ရွှေသာလျောင်းဘုရား ဆင်အလှူပွဲတော်နှင့် (၄၁)ကြိမ်မြောက် ရိုးရာဆင်အကအလှ ပြိုင်ပွဲတွင် ဆုအမျိုးအစားလေးမျိုး ချီးမြှင့်ပေးသွားမည်ဖြစ်ကာ ပထမ၊ ဒုတိယ၊ တတိယနှင့် နှစ်သိမ့်ဆုများကို ပြိုင်ပွဲဝင် ဆင်အမျိုးအစားအလိုက် ဆုကြေးများကို အသီးသီး ချီးမြှင့်ပေးသွားမည်ဖြစ်ကြောင်း သိရသည်။ ထိုသို့ ဆုချီးမြှင့်ပေးရာတွင် ရိုးရာဆင် အမျိုးအစား ပြိုင်ပွဲတွင် ပထမဆုအတွက် ငွေကျပ် ဆယ်သိန်းနှစ်သောင်းနှင့် ဆိုင်ကယ်တစ်စီး၊ ဒုတိယဆု ငွေကျပ်ဆယ်သိန်း၊ တတိယဆု ငွေကျပ်ခုနစ်သိန်းနှင့် နှစ်သိမ့်ဆုအတွက် ငွေကျပ်ခြောက်သိန်း၊ ဘော်ကြယ်ဆင် အမျိုးအစား ပြိုင်ပွဲတွင် ပထမဆုအတွက် ငွေကျပ်ဆယ်သိန်းနှင့် ဆိုင်ကယ်တစ်စီး၊ ဒုတိယဆု ငွေကျပ် ရှစ်သိန်း၊ တတိယဆု ငွေကျပ် ငါးသိန်း၊ နှစ်သိမ့်ဆု ငွေကျပ် တစ်သိန်း၊ သဘာဝဆင် အမျိုးအစား (တီထွင်ဆန်းသစ်မှု အကောင်းဆုံး) တွင် အထူးဆုအဖြစ် ငွေကျပ်ငါးသိန်းနှင့် ဆိုင်ကယ်တစ်စီး၊ နှစ်သိမ့်ဆုအဖြစ် ငွေကျပ်နှစ်သိန်း၊ ကလေးဆင် အမျိုးအစား ပြိုင်ပွဲတွင် ပထမဆု ငွေကျပ် ရှစ်သိန်းနှင့် ဆိုင်ကယ်တစ်စီး၊ ဒုတိယဆု ငွေကျပ်ခြောက်သိန်း၊ တတိယဆု ငွေကျပ်သုံးသိန်းနှင့် နှစ်သိမ့်ဆု ငွေကျပ် နှစ်သိန်း အစရှိသဖြင့် ဆုငွေများကို အသီးသီး ချီးမြှင့်ပေးအပ်သွားမည် ဖြစ်ကြောင်း ပြိုင်ပွဲကျင်းပရေး ကော်မတီထံမှ သိရသည်။ ရိုးရာဆင် အကအလှပြိုင်ပွဲ၌ အသီးသီး ဆုရရှိခဲ့ကြသည့် ဆင်အဖွဲ့များကို ပြိုင်ပွဲအခမ်းအနား ကျင်းပပြီးချိန်တွင် ဆုချီးမြှင့် ပေးအပ်သွားမည်ဖြစ်ကြောင်း သိရသည်။
ကျောက်ဆည်မြို့ရှိ ရွှေသာလျောင်းဘုရား ဆင်လှူပွဲတော်နှင့် (၄၁) ကြိမ်မြောက် ဆင်အကအလှပြိုင်ပွဲကို အောက်တိုဘာ ၂၃ ရက်က ရွှေသာလျောင်းဘုရား တောင်ခြေရှိ ဆင်ပြိုင်ကွင်းအတွင်း စည်ကားသိုက်မြိုက်စွာ ကျင်းပပြုလုပ်ခဲ့ကြပြီး ပြိုင်ပွဲဝင်ဆင်အဖွဲ့ ၂၀ ပါဝင်ယှဉ်ပြိုင်ခဲ့ကြကြောင်း သိရသည်။ ထို့ပြင် ကျောက်ဆည်မြို့မှ မြို့ခံနာမည်ကျော် ဆင်အကအလှအဖွဲ့များ အပါအဝင် ဆင်အဖွဲ့ပေါင်း ၇၀ ကျော်တို့က မြို့အတွင်း လှည့်လည်၍ အကအလှများဖြင့် ကပြဖျော်ဖြေပေးခဲ့ကြောင်း သိရသည်။
အဆိုပါ ဆင်အကအလှပြိုင်ပွဲသို့ မြို့ခံများ အပါအဝင် အခြားဒေသများမှပါ အများအပြား လာရောက်ခဲ့ကြပြီး နိုင်ငံခြားသား ခရီးသွား ဧည့်သည် အများအပြား လာရောက်လေ့လာ ကြည့်ရှုခဲ့ကြကြောင်း သိရသည်။
