ယနေ့ခေတ် မြန်မာ့ဇာတ်သဘင်လောကမှာ အောင်မြင်တဲ့ မင်းသားတစ်ဦး၊ ပရိသတ်တွေရဲ့ ချစ်ခင်အားပေးမှုများစွာကို သိမ်းပိုက်ရရှိထားသူ မင်းသားတစ်ဦးကတော့ ဘိုးဘွားမိဘတွေရဲ့ ဇာတ်သဘင် အနုပညာအမွေကို ဆက်ခံခဲ့သူ တစ်ဦးဖြစ်တဲ့ မင်းသား ဟန်ဇာမိုးဝင်းပါ။

မြန်မာ့ဇာတ်သဘင်တစ်ခေတ်မှာ အောင်မြင်မှုတွေ သိမ်းပိုက်ခဲ့တဲ့ မင်းသားကြီး စိန်မာဒင်ရဲ့ မြေး၊ မင်းသားကြီး ဦးမိုးမင်းရဲ့ တူဖြစ်ပြီး ဖခင်ဖြစ်သူ ဦးဝင်းရီကိုတော့ မြန်မာ့ဇာသဘင် အနုပညာနယ်ပယ်နဲ့ ပရိသတ်တွေက မင်းသားကြီး မိုးဝင်းရယ်လို့ သိကြသူတွေရဲ့ မျိုးဆက်တစ်ဦးဖြစ်တဲ့ ဟန်ဇာမိုးဝင်းကို ၁၉၈၄ ခုနှစ် စက်တင်ဘာ ၇ ရက်မှာ အဖ ဦးဝင်းရီ၊ အမိ ဒေါ်ချိုချိုရီတို့က ရန်ကုန်မြို့ တောင်ဥက္ကလာပမှာ မွေးဖွားခဲ့တာဖြစ်ပြီး မိသားစုရဲ့ ဒုတိယမြောက် ရင်သွေးပါ။ မွေးချင်းတွေကတော့ အစ်မဖြစ်သူ တင်ဇာမိုးဝင်းနဲ့ ညီငယ်များဖြစ်တဲ့ အဂ္ဂါမိုးဝင်း၊ နေမိုးဝင်းတို့ပါ။

“ကျွန်တော်ငယ်ငယ်တုန်းက အမှတ်တရဆိုတာတွေ အများကြီးတော့ မရှိပါဘူး။ ခုချိန်ထိ ကျွန်တော့်ငယ်ဘဝနဲ့ ပတ်သက်ပြီး ပြောနေတာက ကျွန်တော်က သူများကို အရမ်းလိုက်စတတ်တဲ့ အကျင့်ရှိတယ်ဆိုတာပဲ။ ကျွန်တော့်ကို တောင်ဥက္ကလာမှာ မွေးခဲ့ပေမယ့် ကျောင်းမတက်ခင်တည်းက လက်ရှိနေနေတဲ့ ခုနစ်မိုင်ခြံကို ပြောင်းခဲ့ကြတယ်။ အဲဒီတုန်းက ခုလိုလူနေအိမ်တွေ သိပ်မရှိဘဲ သစ်ပင်ကြီးတွေနဲ့ တောကြီးလိုပဲ။ ကျွန်တော်တို့ ခြံထဲမှာလည်း ထင်းရှုးပင်ကြီးတွေရှိတယ်။ နောက်ပြီး ရေတွင်းတစ်ခုလည်း ရှိတယ်။ ငယ်တုန်းက ကျွန်တော်နဲ့ မကြီးတင်ဇာတို့ အတူတူဆော့နေရင်းနဲ့ ကျွန်တော် ရေတွင်းထဲက ရေခပ်ရင်း ရေတွင်းထဲကျသွားခဲ့တယ်။ အဲဒီတုန်းက မကြီးတင်ဇာက ကျွန်တော်ကိုဆွဲထားပြီး အပေါ်ရောက်အောင် ပြန်တင်ပေးခဲ့တာ။ ပြောရရင် မကြီးက ကျွန်တော့်အသက်ကို ကယ်ဖူးတဲ့ ကျေးဇူးရှင်တစ်ယောက်ပါပဲ” ဟု ဟန်ဇာမိုးဝင်းက သူ၏ငယ်ဘ၀ အမှတ်တရများကို ပြောပြခဲ့သည်။

ဟန်ဇာ၏ မူလတန်းကျောင်းသားဘဝကို နေထိုင်ရာရပ်ကွက်အတွင်းမှ မူလတန်းကျောင်းတွင် လေးတန်းအထိတက်ရောက် ပညာသင်ကြားခဲ့ပြီးနောက် ငါးတန်းတွင် အ.ထ.က ၂ ကမာရွတ် (စိန့်အောဂတ်စတင်း) ကျောင်းသို့ ပြောင်းရွေ့ ပညာသင်ကြားခဲ့သူ ဖြစ်သည်။

“ကျောင်းသားဘဝမှာ အမှတ်တရတွေကတော့ အများကြီးပေါ့။ အဲဒီအထဲက မှ ကျွန်တော်မှတ်မိနေခဲ့တာက ဆရာမက ဘောလုံးသွားမကန်ဖို့ တားထားတာကို ကျွန်တော်တို့က ကျောင်းမတက်ခင် ဘောလုံးသွားကန်ရင်း ဗွက်အိုင်ထဲလဲတော့ အဖြူ အစိမ်းတွေ ရွံ့တွေပေကုန်တာကို ရေပြန်ဆေးပြီး အဲဒီရေစိုအင်္ကျီကြီးနဲ့ ကျောင်းတက်ခဲ့တာကိုပဲ။ အဲဒီတုန်းက ဆရာမက ဆေးတွေလည်း တိုက်တယ် ရိုက်လည်းရိုက်ခံခဲ့ရတာကို မှတ်မိတယ်” ဟု ဟန်ဇာက ဆိုသည်။

အထက်တန်းကျောင်းပြီးချိန်တွင် သူငယ်ချင်းဖြစ်သူနှင့်အတူ အမေရိကားကို ကျောင်းသွားတက်ရင်း အလုပ်လုပ်ရန် စီစဉ်ခဲ့သည့် ဟန်ဇာသည် မိသားစုအတွက် စဉ်းစားကာ အနုပညာလောကထဲသို့ ဝင်ရောက်လာခဲ့သူ ဖြစ်သည်။

“ကျွန်တော်က ငယ်ငယ်တည်းက အနုပညာလောကထဲမှာပဲ နေခဲ့ပေမယ့် ဆယ်တန်းအောင်ပြီးတော့ သူငယ်ချင်းနဲ့ အမေရိကားမှာ ကျောင်းဆက်တက်ရင်း အလုပ်လုပ်မယ်လို့ ပြင်ဆင်ခဲ့တယ်။ ဒါပေမဲ့ အဲဒီအချိန်မှာ အဖေက အသက်ရလာပြီဆိုတော့ သိပ်ပြီးမကနိုင်တော့သလို အားပေးမှုတွေလည်း လျော့လာပြီလေ။ ဒီတော့ ကျွန်တော်က ကိုယ်ဖြစ်ချင်တဲ့ ရည်မှန်းချက်ကို စွန့်လွှတ်ပြီး မိသားစုအတွက် သဘင်အနုပညာစင်မြင့်ထက်ကို ရောက်လာခဲ့တယ်။ အဖေနဲ့အတူစပြီး ဇာတ်ထဲလိုက်ခဲ့တုန်းက သီချင်းတွေပဲ စဆိုခဲ့ရတယ်။ ဇာတ်သဘင်ပညာတွေကို သင်ယူရင်းနဲ့ သီချင်းဆိုတာရော ပြဇာတ်ကတာရော လုပ်ခွင့်ရလာတယ် နောက်တော့မှ နှစ်ပါးသွားစထွက်ခွင့်ရပြီး ဇာတ်မင်းသား တစ်ဦးဖြစ်လာခဲ့တယ်။ မင်းသားဖြစ်လာပြီးတော့လည်း အဖေနဲ့အတူ သုံးလေးနှစ်လောက်တွဲပြီး ကခဲ့ရတယ်။ ကျွန်တော်က အဖေနာမည်ကြီးလို့ သားနာမည်ကြီးတယ်ဆိုတာမျိုး မဖြစ်ခဲ့ဘူး။ အဖေနဲ့ ဦးလေးလောက် မတော်ဘူးဆိုပြီး ဝေဖန်တာတွေခံခဲ့ရတယ်။ သူများတွေ ပွဲကြီးတွေမှာကနေချိန် ကျွန်တော်က မြို့သေးလေးတွေမှာ လိုက်ကခဲ့ရတယ်။ စင်ပေါ်တက်စက ကွမ်းတံတွေးအိတ်နဲ့ပေါက်တာလည်း ခံခဲ့ရတယ်။ ဒီလိုပဲ အနုပညာရှင်တစ်ယောက်ရဲ့ သည်းခံရမယ့်စိတ်ထားနဲ့အတူ ကိုယ့်အစွမ်းအစကို ပရိသတ်တွေ လက်ခံအောင် ကျွန်တော်အများကြီး ကြိုးစားခဲ့ရတယ်” လို့ ဟန်ဇာမိုးဝင်းက ဆိုပါတယ်။

ဇာတ်သဘင်အနုပညာတွေကို အဖေဖြစ်သူနဲ့ ဦးလေးဖြစ်သူတို့ဆီကနေသာမက ဦးချမ်းသာဆီမှာလည်း ဇာတ်တော်ကြီးကပြမှုတွေကို သင်ယူခဲ့သလို အခြားသော သင်ဆရာတွေလည်း အများကြီးရှိခဲ့တယ်လို့ ဟန်ဇာကဆိုပါတယ်။ အဆိုပညာပိုင်းမှာတော့ ခုနှစ်တန်းအရွယ်တည်းက အမဖြစ်သူနဲ့အတူ ဦးစောနုဆီမှာ သင်ယူခဲ့တယ်လို့ သိရပါတယ်။ ပြဇာတ်ပြိုင်ပွဲမှာ မင်းသားဆု ရွှေတံဆိပ်ရခဲ့သလို အဖွဲ့လိုက်ပြိုင်ပွဲမှာတော့ ငွေတံဆိပ်ဆုရခဲ့တယ်လို့ သိရပါတယ်။ ဇာတ်သဘင်မှာ နာမည်ရလာစအချိန်မှာ ဗီဒီယိုဇာတ်ကားတွေ စရိုက်ခဲ့ပြီး ပရိသတ်တွေရဲ့ အားပေးမှုရခဲ့ပေမယ့် ကျန်းမာရေးအရရော သဘင်အနုပညာဘက်မှာ အချိန်ပိုပေးနိုင်ဖို့အတွက်ပါ ဇာတ်ကားရိုက်ကူးမှုတွေကို နားခဲ့သူပါ။

“ကျွန်တော်ကျန်းမာရေးတော်တော် အခြေအနေဆိုးခဲ့တုန်းက သုံးလလောက်က ဘာကိုမှမမှတ်မိသလို ကိုယ်အင်္ဂါအစိတ်အပိုင်းတွေကလည်း ကိုယ့်စိတ်တိုင်းကျ မလှုပ်ရှားနိုင်ခဲ့ဘူး။ တဖြည်းဖြည်းနဲ့ ကျန်းမာရေး ပြန်ကောင်းလာသလို အနုပညာ အလုပ်တွေမှာ ပြန်ပြီးကြိုးစား လုပ်ကိုင်ခဲ့ပေမယ့် စိတ်တိုင်းကျ မလှုပ်ရှားနိုင်တာတွေ တချို့ကိုယ်အင်္ဂါ အစိတ်အပိုင်းတွေက မလှုပ်ရှားနိုင်တာတွေ ဖြစ်ခဲ့ပေမယ့် ပရိသတ်တွေက ချစ်ခင်စိတ်နဲ့ ကျွန်တော့်ကို အားပေးနားလည်ခဲ့တာကိုလည်း အများကြီး ဝမ်းသာရပါတယ်” လို့ ဟန်ဇာက ဆိုပါတယ်။

ကျန်းမာရေးတွေ ပြန်လည်ကောင်းမွန်လာပြီးချိန်ကစလို့ သဘင်အနုပညာမှာ အရင်ကထက်ပိုတဲ့ ကြိုးစားမှုတွေ ရှိလာသလို စံပြသဘင်ဆိုတဲ့ သဘင့်အမွေကို အစ်မကြီးဖြစ်သူ တင်ဇာမိုးဝင်းနဲ့ ညီငယ်ဖြစ်သူ အဂ္ဂါ မိုးဝင်းတို့နဲ့အတူ လက်တွဲပြီး အောင်မြင်မှုတွေ ရယူခဲ့ပြီး ပရိသတ်တွေ ရင်ထဲက စံပြသဘင်ဖြစ်အောင် ကြိုးစားခဲ့တဲ့ အနုပညာဖြတ်သန်းမှုတွေနဲ့ ပတ်သက်လို့ “ကျွန်တော် သဘင်အနုပညာကို လုပ်ရင်းနဲ့ သဘင်ကိုရော ပရိသတ်တွေကိုပါ ပိုချစ်လာခဲ့တယ်။ အဲဒီချစ်တဲ့စိတ်နဲ့ ကျွန်တော် ပိုပြီးကြိုးစားခဲ့တယ်။ အဘိုး၊ အဖေနဲ့ ဦးလေးတို့ရဲ့ အနုပညာအမွေကို ဆက်လက် ခံယူခွင့်ရတာကိုလည်း ဝမ်းသာဂုဏ်ယူတယ်။ သဘင်နဲ့ပတ်သက်ရင် အနုပညာပိုင်းမှာ ချစ်တဲ့စိတ်နဲ့ ကြိုးစားသလို သဘင်သည်တွေနဲ့ ပရိသတ်တွေကိုချစ်တဲ့စိတ်နဲ့ သဘင်လူမှု ကူညီစောင့်ရှောက်ရေးမှာ ကျွန်တော်တို့တွေဝင်ပြီး လုပ်ခဲ့ကြတယ်” လို့ ဟန်ဇာမိုးဝင်းက ဆိုပါတယ်။

ဒီနေ့ခေတ် မြန်မာ့သဘင်မှာ စံပြသဘင်ဆိုတာ အနုပညာမှတ်တိုင်တစ်ခုအဖြစ် ရပ်တည်နိုင်ပြီဖြစ်သလို ပရိသတ်တွေရဲ့ ချစ်ခင်အားပေးမှုတွေကို သိမ်းပိုက်ထားနိုင်တဲ့ သဘင်အနုပညာအဖွဲ့ဖြစ်နေပြီး မကြာမီ စတင်တော့မယ့် သဘင်ရာသီသစ်မှာလည်း တင်ဆက်မှုအသစ်တွေ တင်ဆက်နိုင်ဖို့ ကြိုးစားပြင်ဆင်နေတယ်လို့ သိရပါတယ်။

“လာမယ့် သဘင်ရာသီသစ်မှာ ကျွန်တော်တို့ မဟာရန်ကုန်စံပြသဘင်အနေနဲ့ ပြဇာတ်နဲ့ အော်ပရာအသစ်တွေ ပြင်ဆင်ထားသလို နောက်ပိုင်းဇာတ်တော်ကြီးမှာလည်း ဆို ငို ပြောတွေနဲ့ ကပြတင်ဆက်နိုင်ဖို့ စီစဉ်ထားတာရှိတယ်။ နှစ်ပါးသွားမှာဆိုရင် သီချင်းအသစ်တွေပါသလို သီချင်းအဟောင်းတွေကိုလည်း ကကွက်အသစ်တွေနဲ့ ပြန်ပြီး တီထွင်ထားသလို အဖွဲ့လိုက်ကဖို့တွေလည်း ပြင်ဆင်ထားတယ်။ နောက်ပြီး အဂ္ဂါက ခေတ်ပေါ်အကနဲ့ မြန်မာအကကို ပေါင်းစပ်ထားတဲ့ ကကွက် ကဟန်အသစ်တွေကို ထွင်ထားတာလေးတွေ ရှိတယ်။ ဖျော်ဖြေမှုတွေအားလုံးအတွက် ကျွန်တော်တို့ မောင်နှမသုံး ယောက်လုံးရော ဇာတ်အဖွဲ့သားတွေအား လုံးကရော သေချာကြိုးစား ပြင်ဆင်ထားပါတယ်။ ကျွန်တော်တို့က ခေတ်ပေါ်နဲ့ ရိုးရာကို အမြဲပေါင်းစပ် ဖျော်ဖြေတာဖြစ်ပြီး ဖျော်ဖြေမှုပုံစံသစ်တွေအတွက် မိသားစုတွေအားလုံး စုပေါင်း တိုင်ပင်ပြီး ပြင်ဆင်ပါတယ်။ လာမယ့်သဘင် ရာသီမှာ ရတနာ့ဂူပွဲကစပြီး ကဖို့စီစဉ်ထားပေမယ့် အခုလက်ရှိမှာ H1N1 ကြောင့် ပွဲတွေကတော့ ဘယ်လိုဖြစ်မယ် မသိသေးပါဘူး” ဟု ဟန်ဇာမိုးဝင်းက ဆိုသည်။

နောက်တစ်ပတ်တွေမှာလည်း အနုပညာရှင်တွေရဲ့ စိတ်ဝင်စားဖွယ်ငယ်စဉ် ဘဝအမှတ်တရတွေ၊ အနုပညာလောကထဲရောက်ရှိ ဖြတ်သန်းခဲ့ပုံတွေ၊ ရှေ့ဆက်လှုပ်ရှားသွားမယ့် အနုပညာလှုပ်ရှားမှုတွေကို တင်ဆက်သွားမှာ ဖြစ်ပါတယ်။

Writter: စုမှူးနိုင်