နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား ဆဲဆိုဝေဖန်ပုတ်ခတ်သည့်စာများ Facebook တွင် ရေးသားသည်ဟုဆိုကာ ရာ/ ကြီးပုဒ်မ ၁၂၄ (က) ဖြင့် စွဲချက်တင်ခံထားရသည့် ငါးမင်းဆွေအမှု လာမည့်ရုံးချိန်းတွင် အပြီးသတ်လျှောက်လဲချက်ပေးရမည်

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား ဆဲဆိုဝေဖန်ပုတ်ခတ်သည့်စာများ Facebook လူမှုကွန်ရက်စာမျက်နှာတွင် ရေးသားခဲ့သည်ဟုဆိုကာ ရာဇသတ်ကြီးဥပဒေပုဒ်မ ၁၂၄(က) ဖြင့် စွဲချက် တင်ခံထားရသည့် ငါးမင်းဆွေအမှုနှင့်ပတ်သက်၍ လာမည့်ရုံးချိန်းတွင် အပြီးသတ် နှစ်ဖက်လျှောက်လဲချက် ပေးရမည်ဖြစ်ကြောင်း စက်တင်ဘာ ၄ ရက်တွင် အနောက်ပိုင်းခရိုင် တရားရုံးမှ စုံစမ်းသိရသည်။ စက်တင်ဘာ ၄ ရက်တွင် ရန်ကုန်အနောက် ပိုင်းခရိုင်တရားရုံး ရုံးခန်းအမှတ် (၃) တွဲဖက် ခရိုင်တရားသူကြီး ၂ တရားခွင်တွင် ငါးမင်းဆွေကို စစ်ဆေးခဲ့ခြင်းဖြစ်သည်။

“အခုငါးမင်းဆွေကို စစ်ပြီးသွားပြီ။ လာမည့်ရုံးချိန်းမှာ နှစ်ဖက်လျှောက်လဲချက်ပေးဖို့အတွက် စက်တင်ဘာ ၁၁ ရက်ကို ချိန်းဆိုထားပါတယ်” ဟု အနောက်ပိုင်းခရိုင်တရားရုံးမှ တာဝန်ရှိသူတစ်ဦးက ပြောကြားသည်။

ရှေ့နေမခေါ်ဘဲ ကိုယ်တိုင်ထုချေနေသည့် ငါးမင်းဆွေက တရားလိုဘက်မှ ဥပဒေအရာရှိ၏ မေးခွန်းအချို့ကို ဖြေကြားရာတွင် ၎င်းအနေဖြင့် အစိုးရခေါင်းဆောင်မဟုတ်သည့် ဒေါ်အောင်ဆန်းစုကြည်ကို တရုတ်က ကော်ဇောနီခင်းပြီး ကြိုဆိုခဲ့ခြင်းမှာ ဒေါ်အောင်ဆန်းစုကြည်အနေဖြင့် အဂတိလိုက် စားထားသည်ဟု ယူဆသဖြင့် Facebook တွင် ရေးခဲ့ခြင်းဖြစ်ကြောင်း၊ အဆိုပါခရီးစဉ် ကာလအတွင်းက မရေးသားခဲ့ဘဲ နောက်ပိုင်းတွင်မှ ရေးသားခဲ့သည်မှာလည်း မှန်ကန်ကြောင်း၊ ထိုသို့ရေးသားစဉ်က နိုင်ငံတော်၏အတိုင်ပင်ခံပုဂ္ဂိုလ်မှာ ပြည်ထောင်စုသမ္မတ မြန်မာနိုင်ငံတော်၊ ပြည်ထောင်စုအစိုးရအဖွဲ့၏ နိုင်ငံခြားရေးဝန်ကြီးနှင့် အတိုင်ပင်ခံဖြစ်သည်ကိုလည်း သိရှိကြောင်း၊ ဒေါ်အောင်ဆန်းစုကြည်သည် အစိုးရအဖွဲ့ကို ဦးဆောင်ပြီး ပြည်တွင်းငြိမ်းချမ်းရေးနှင့် အမျိုးသားပြန်လည်သင့်မြတ်ရေးကို ဦးစားပေးဆောင်ရွက်နေသည်ကိုလည်းသိရှိကြောင်း၊ သို့သော် ၎င်းအနေဖြင့် ပြည်တွင်းငြိမ်းချမ်းရေးနှင့် အမျိုးသားပြန်လည်သင့်မြတ်ရေး ရရှိရန်ဆောင်ရွက်နေကြသော အစိုးရခေါင်းဆောင်များ၊ တပ်မတော်ခေါင်းဆောင်များ၊ တိုင်းရင်းသား လက်နက်ကိုင်ခေါင်းဆောင်များနှင့် ပြည်သူတို့က မိမိတို့၏အမှားများကို ဝန်ခံကြမှသာ ပြည်တွင်းငြိမ်းချမ်းရေးနှင့် အမျိုးသားပြန်လည်သင့်မြတ်ရေးရရှိလိမ့်မည်ဟု ယုံကြည်ပြီးဖြစ်ကြောင်း၊ သို့ဖြစ်၍ ရေးသားခဲ့ခြင်းဖြစ်ကာ နိုင်ငံတော်သမ္မတဦးထင်ကျော် (ဟောင်း) နှင့် သက်ဆိုင်ရာဌာနများသို့ အကြံပြုစာ တင်ပြခဲ့ကြောင်း၊ ယင်းအကြံပြုစာမှာလည်း စံတော်ချိန်သတင်းစာတွင် ဖော်ပြခဲ့ကြောင်း၊ အကြံပြုစာတွင် နိုင်ငံတော်နှင့် နိုင်ငံသားများကို ထိခိုက်နစ်နာစေရန် ပြုလုပ်ခဲ့သော လူပုဂ္ဂိုလ်တို့သည် မိမိတို့၏အပြစ်များကို လူသိရှင်ကြား ဝန်ချတောင်းပန်ရန်လိုကြောင်း၊ သို့မှသာ ပြည်တွင်းငြိမ်းချမ်းရေးနှင့် အမျိုးသားပြန်လည်သင့်မြတ်ရေးရမည်ဟု ယုံကြည်ကြောင်း၊ ၎င်းအနေဖြင့်လည်း နိုင်ငံတော်ပုန်ကန်မှု၊ လူသတ်မှုတို့ကို ကျူးလွန်ခဲ့ကြောင်း၊ မိမိအပြစ်များကို ညီလာခံတွင် တောင်းပန်သွားမည်ဟု ဖော်ပြပါရှိကြောင်း၊ နိုင်ငံတော်၏အတိုင်ပင်ခံပုဂ္ဂိုလ်အပေါ် မေတ္တာပျက်စေ လိုသောစိတ်ဖြင့် ရေးသားခဲ့ခြင်း မဟုတ်ကြောင်း၊ ၎င်းအနေဖြင့် ဆဲခဲ့ခြင်းမှာသူတို့ ဘက်မှစစ်ခွေးဟုပြော၍ အမျိုးသားပြန်လည် သင့်မြတ်ရေးမရနိုင်သည်ကို သိစေလိုသဖြင့် ဆဲခဲ့ခြင်းဖြစ်ကြောင်း ဖြေကြားခဲ့သည်။

အစိုးရကို အကြည်ညိုပျက်အောင် ပြုလုပ်ခြင်း ရာဇသတ်ကြီးဥပဒေပုဒ်မ ၁၂၄ (က) ဖြင့် ငါးမင်းဆွေတွင် အပြစ်ရှိကြောင်း သြဂုတ် ၂၇ ရက်တွင် အနောက်ပိုင်းခရိုင်တရားရုံးက စွဲချက်တင်ခဲ့ခြင်း ဖြစ်သည်။

ငါးမင်းဆွေက ၎င်းသည် အမျိုးသားရင် ကြားစေ့ရေးအတွက် ဦးတည်ကာ တိုင်းပြည်အကျိုးအတွက် ရေးသားခဲ့ခြင်းဖြစ်သဖြင့် ၎င်းတွင် အပြစ်မရှိကြောင်း စွဲချက်တင်ခံရစဉ်ကတည်းက ငြင်းဆိုထား ယခုရုံးချိန်းတွင် ၎င်းကိုယ်တိုင် ထုချေခဲ့ခြင်း ဖြစ်သည်။

ငါးမင်းဆွေကို လှိုင်မြို့နယ် လှိုင်မြင့်မိုရ်အိမ်ရာ မာဃလမ်း (၁၀) ရပ်ကွက်ရှိ ၎င်း၏နေအိမ်သို့ ဇူလိုင် ၁၂ ရက်က လှိုင်မြို့နယ်ရဲတပ်ဖွဲ့မှ သွားရောက်ဖမ်းဆီးခဲ့သည်။

ငါးမင်းဆွေကို ဆွဲဆိုထားသည့် ပုဒ်မ ၁၂၄ (က)မှာ မည်သူမဆို နှုတ်ဖြင့်ဖြစ်စေ၊ စာဖြင့်ဖြစ်စေ၊ အမှတ်အသားဖြင့်ဖြစ်စေ၊ ထင်ရှားသောပုံသဏ္ဌာန်ဖြင့်ဖြစ်စေ၊ အခြားနည်းဖြင့်ဖြစ်စေ၊ ပြည်ထောင်စုအတွက် သို့တည်းမဟုတ် ပြည်ထောင်စုအဖွဲ့ဝင်များအတွက် ဥပဒေအရ တည်ထောင်ထားသောအစိုးရကို မုန်းထားအောင်သော်လည်းကောင်း၊ မလေးမစားအောင်သော်လည်းကောင်း ပြုလျှင် သို့တည်းမဟုတ် မေတ္တာပျက်အောင် လှုံ့ဆော်လျှင် သို့တည်းမဟုတ် ထိုသို့လှုံ့ဆော်ရန် အားထုတ်လျှင် ထိုသူကို ငွေဒဏ်နှင့်တကွ တစ်သက်တစ်ကျွန်းဒဏ်ဖြစ်စေ၊ ငွေဒဏ်နှင့်တကွ သုံးနှစ်အထိ ထောင်ဒဏ်ဖြစ်စေ၊ ငွေဒဏ်သက်သက်ဖြစ်စေ ချမှတ်နိုင်ကြောင်း ရာဇသတ်ကြီးအဓိပ္ပာယ်ဖွင့်ဆိုချက်အရ သိရသည်။ ထို့ပြင် မေတ္တာပျက်စေခြင်းဆိုသည့် စကားတွင် သစ္စာမဲ့ခြင်းနှင့် အငြိုးထားသော စိတ်လည်းပါဝင်ကြောင်း၊ မုန်းထားအောင် သော်လည်းကောင်း၊ မလေးစားအောင်သော်လည်းကောင်း၊ မေတ္တာပျက်အောင်သော်လည်းကောင်း ဖြစ်စေရန် လှုံ့ဆော်ခြင်း သို့တည်း မဟုတ်လှုံ့ဆော်ရန် အားထုတ်ခြင်းမရှိဘဲ အစိုးရ၏ ဆောင်ရွက်မှုအစီအစဉ်ကို ဥပဒေနှင့်ညီသောနည်းဖြင့် ပြောင်းလဲပြုပြင်စေရန် ရည်ရွယ်လျက် ထိုဆောင်ရွက်မှုကို သဘောမကျကြောင်း ထုတ်ဖော်ခြင်းသည် ဤပုဒ်မ အရပြစ်မှုမမြောက်၊  မုန်းထားအောင်သော်လည်းကောင်း၊ မလေးစားအောင်သော်လည်းကောင်း၊ မေတ္တာပျက်အောင်သော်လည်းကောင်း ဖြစ်စေရန် လှုံ့ဆော်ခြင်းသို့တည်းမဟုတ် လှုံ့ဆော်ရန် ကြံစည်အားထုတ်ခြင်း မရှိဘဲ အစိုးရ၏ စီရင်အုပ်ချုပ်ရေးဆိုင်ရာ ဆောင်ရွက်မှုကို သို့တည်းမဟုတ် အခြားဆောင်ရွက်မှုကို သဘောမကျကြောင်း ထုတ်ဖော်ခြင်းသည် ဤပုဒ်မအရ ပြစ်မှုမမြောက်ဟုလည်း ရေးသားဖော်ပြပါရှိသည်။