တပ်မတော် (လေ) တွင် အမျိုးသမီးအရာရှိအချို့ လေသူရဲလောင်းများအဖြစ် စတင်လေ့ကျင့်ဆောင်ရွက်နေကြောင်း တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောကြားသည်။
ရန်ကုန်မြို့ တပ်မတော် (ကြည်း) ဗိုလ်သင်တန်းကျောင်း (မှော်ဘီ) တွင် ဒီဇင်ဘာ ၂၁ ရက်ကပြုလုပ်သည့် ဘွဲ့ရအမျိုးသမီးဗိုလ်လောင်းသင်တန်း အမှတ်စဉ် (၄) သင်တန်းဆင်း ဂုဏ်ပြုစစ်ရေးပြအခမ်းအနားသို့ တက်ရောက်မိန့်ခွန်းပြောကြားစဉ် တပ်မတော်ကာကွယ်ရေးဦးစီးချုပ်၏ ထည့်သွင်းပြောကြားချက်အရ သိရသည်။
မိမိတို့နိုင်ငံတွင် အမျိုးသမီးဦးရေသည် နိုင်ငံလူဦးရေ၏ ၅၁ ရာခိုင်နှုန်းကျော်ရှိသည့်အတွက် အမျိုးသမီးအင်အားထုကို နိုင်ငံတော်ဖွံ့ဖြိုးတိုးတက်ရေးနှင့် ကာကွယ်ရေးစွမ်းအား တည်ဆောက်ရေးတို့တွင် ထိရောက်စွာအသုံးပြုရန် လိုအပ်မည်ဖြစ်ကြောင်း၊ ထို့ကြောင့် နိုင်ငံတော်၏ ကာကွယ်ရေးစွမ်းအားတည်ဆောက်ရာတွင် မြန်မာအမျိုးသမီးထုပါဝင်နိုင်ရေး၊ အမျိုးသမီးများ၏ အခန်းကဏ္ဍမြှင့်တင်ရေးနှင့် တပ်မတော်တွင် အမျိုးသမီးစစ်မှုထမ်းများ ပါဝင်ထမ်းဆောင်နိုင်ရေးတို့အတွက် ဘွဲ့ရအမျိုးသမီး ဗိုလ်လောင်းသင်တန်း၊ သူနာပြုနှင့်ဆေးဘက်ပညာသင်တန်း၊ ကွန်ပျူတာဒီပလိုမာတပ်ကြပ်ကြီး၊ စာရေးသင်တန်းများကို စဉ်ဆက်မပြတ်ဖွင့်လှစ်ပြီး အမျိုးသမီးစစ်မှုထမ်းများကို လေ့ကျင့်မွေးထုတ်ပေးလျက်ရှိကြောင်း တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောကြားသည်။
ထို့ပြင် နိုင်ငံတော် ကာကွယ်ရေးတာဝန်ထမ်းဆောင်ရာတွင် အမျိုးသမီးများ ပါဝင်ဆောင်ရွက်နိုင်စေရန်အတွက် အမျိုးသမီးစစ်မှုထမ်းအရာရှိများအား လေ့ကျင့်သင်ကြားမွေးထုတ်ပေးရန်ဆိုသည့် ရည်ရွယ်ချက်ဖြင့် ဘွဲ့ရအမျိုးသမီးဗိုလ်လောင်းသင်တန်းများကို ဖွင့်လှစ်ခဲ့ခြင်းဖြစ်ပြီး သင်တန်းဆင်းအမျိုးသမီးအရာရှိများအနေဖြင့် ကြည်း၊ ရေ၊ လေ၊ ရုံးဌာနများအပါအဝင် လက်ရုံးဝန်ထမ်းတပ်ဖွဲ့အသီးသီးတွင် တာဝန်ကျေပွန်စွာ ထမ်းဆောင်လျက်ရှိနေကြကြောင်း၊ တပ်မတော် (ကြည်း) ဗိုလ်သင်တန်းကျောင်း (မှော်ဘီ) မှဆင်းသည့် အမျိုးသမီးအရာရှိအချို့သည် အထူးတာဝန်တပ်ဖွဲ့ (အမျိုးသမီး) သင်တန်းများကို တက်ရောက်အောင်မြင်ပြီးဖြစ်သကဲ့သို့ တပ်မတော် (လေ) အမျိုးသမီးအရာရှိ အချို့သည်လည်း လေသူရဲလောင်းများအဖြစ် စတင်လေ့ကျင့်ဆောင်ရွက်နေပြီဖြစ်ကြောင်း၊ မိမိတို့အနေဖြင့်လည်း သင်တန်းကျောင်းက လေ့ကျင့်သင်ကြားပေးလိုက်သည့် ဘာသာရပ်များနှင့် လက်တွေ့လေ့ကျင့်ဆောင်ရွက်မှုများကို အခြေခံပြီး ပေးအပ်လာမည့်တာဝန်များကို ကျေပွန်စွာထမ်းဆောင်သွားကြရန် လိုအပ်ကြောင်း တပ်မတော်ကာကွယ်ရေးဦးစီးချုပ်က ပြောကြားသည်။
ထို့အတူ မိမိတို့နိုင်ငံ၏အတိတ်သမိုင်းတွင် ခေတ်မီတပ်မတော်တစ်ရပ် တည်ထောင်နိုင်ခဲ့ခြင်းမရှိသဖြင့် သူ့ကျွန်ဘဝသို့ရောက်ရှိခဲ့ရကြောင်း၊ နိုင်ငံလွတ်လပ်ရေးရရှိရန်အတွက် မိမိတို့တပ်မတော်သည် ပြည်သူများနှင့်လက်တွဲပြီး နယ်ချဲ့ဖက်ဆစ်များကို တွန်းလှန်ခဲ့ကြကြောင်း၊ ထိုသို့ သူ့ကျွန်မခံတွန်းလှန်မှုများနှင့် လွတ်လပ်ရေးကြိုးပမ်းမှုများတွင် မြန်မာအမျိုးသမီးများကလည်း အမျိုးသားများနည်းတူ ပါဝင်ဆောင်ရွက်ခဲ့ကြသည်မှာ သမိုင်းတွင် အထင်အရှားရှိကြောင်း၊ လွတ်လပ်ရေးထိန်းသိမ်းမှုနှင့် နိုင်ငံတော်တည်ငြိမ်အေးချမ်းရေး ဆောင်ရွက်မှုကာလများတွင်လည်း အမျိုးသမီးစစ်ဝန်ထမ်းတပ်များ ပါဝင်ဖွဲ့စည်းပြီး ကျရာအခန်းကဏ္ဍတွင် ထူးချွန်ပြောင်မြောက်စွာ ပါဝင်ထမ်းဆောင်ခဲ့ကြကြောင်း၊ ထို့ကြောင့် မျိုးချစ်စိတ်ထက်သန်သည့် မြန်မာအမျိုးသမီးများနှင့် အမျိုးသမီးစစ်မှုထမ်းများ၏ စွမ်းဆောင်ရည်ကို မြန်မာ့သမိုင်းနှင့် တပ်မတော်သမိုင်းတွင် အထင်အရှားမှတ်ကျောက်တင်ပြီးဖြစ်ကြောင်း ဗိုလ်ချုပ်မှူးကြီး မင်းအောင်လှိုင်က ပြောကြားသည်။
