ရန်ကုန်တိုင်းဒေသကြီး မရမ်းကုန်းမြို့နယ်နှင့် ဗဟန်းမြို့နယ်တို့တွင် မူးယစ်ဆေးဝါးများ ဖမ်းဆီးရမိခဲ့ကြောင်း စက်တင်ဘာ ၂၃ ရက်တွင် ပြည်ထဲရေးဝန်ကြီးဌာန၏ သတင်းထုတ်ပြန်ချက်အရ သိရသည်။
မရမ်းကုန်းမြို့နယ် အမှတ် (၈) ရပ်ကွက် ဝေဇယန္တာလမ်း၊ သံဃာ့တက္ကသိုလ်ရှေ့တွင် စက်တင်ဘာ ၂၁ ရက် ည ၁၁ နာရီခန့်က ကျော်ဇင်ထွန်း (၂၆) နှစ်မောင်းနှင်လာသည့် မော်တော်ယာဉ်အား မရမ်းကုန်းမြို့မရဲစခန်းမှ တပ်ဖွဲ့ဝင်များနှင့် ပူးပေါင်းအဖွဲ့များက ရှာဖွေခဲ့ကြောင်း သိရသည်။
အဆိုပါမော်တော်ယာဉ်အား တာဝန်ရှိသူများက ရှာဖွေခဲ့ရာ စိတ်ကြွရူးသွပ်ဆေးပြား ၅၉၂ ပြား၊ အိုက်စ်မူးယစ်ဆေး ၀ ဒသမ ၉ ဂရမ်အား သိမ်းဆည်းရမိသဖြင့် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေဖြင့် အရေးယူထားကြောင်း သိရသည်။
အလားတူ ဗဟန်းမြို့နယ် ဆရာစံရပ်ကွက် ကမ္ဘာအေးဘုရားလမ်း ပုလဲကွန်ဒိုဝင်း တိုက်- D ရှေ့တွင် စက်တင်ဘာ ၂၂ ရက် ည ၁၀ နာရီခန့်တွင် ကျော်ကိုကိုထွန်း (ခ) ကျော်ကြီးမောင်းနှင်ပြီး ဟိန်းဇော်ဝင်း လိုက်ပါလာသည့် မော်တော်ယာဉ်အား မူးယစ်တပ်ဖွဲ့စု (၄၂) ရန်ကုန်(အနောက်) မှတပ်ဖွဲ့ဝင်များ ပါဝင်သောအဖွဲ့က ရှာဖွေခဲ့ကြောင်း သိရသည်။
ထိုသို့ရှာဖွေရာတွင် ဟိန်းဇော်ဝင်း၏ ထိုင်ခုံအောက်မှ စိတ်ကြွရူးသွပ်ဆေးပြား ၂၄၅၄ ပြား၊ အိုက်စ်မူးယစ်ဆေးဝါး ၇ ဂရမ်တို့ကို သိမ်းဆည်းရမိသဖြင့် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အရေးယူထားကြောင်း သိရသည်။
ရန်ကုန်မြို့တွင် မူးယစ်ဆေးဝါးများနှင့် စိတ်ကြွဆေးပြားများကို ဆက်တိုက်ဖမ်းဆီးရမိလျက်ရှိကြောင်း သိရပြီး ဖြစ်စဉ်မှ ကျူးလွန်သူများကိုလည်း ဖမ်းမိလျက်ရှိသော်လည်း အချို့အမှုများမှာ ကျူးလွန်သည့် တရားခံများကို ဖမ်းမိခြင်းမရှိကြောင်း သိရသည်။
