အိန္ဒိယအစိုးရက မြန်မာနိုင်ငံသားများအတွက် e-visa မှလွဲ၍ ကျန်ဗီဇာအမျိုးအစားအားလုံး ဗီဇာကြေး ကင်းလွတ်ခွင့်ပေးမည်ဖြစ်ကြောင်း အိန္ဒိယသမ္မတနိုင်ငံ ဝန်ကြီးချုပ်၏ မြန်မာနိုင်ငံ ခရီးစဉ်အတွင်း မြန်မာ-အိန္ဒိယ နှစ်နိုင်ငံထုတ်ပြန်သည့် ပူးတွဲကြေညာချက်အရ သိရသည်။
အိန္ဒိယအစိုးရသည် ယင်းကဲ့သို့ ဗီဇာအမျိုးအစားများအားလုံးကို ဗီဇာကြေးကင်း လွတ်ခွင့်ပေးမည်သာမက အိန္ဒိယနိုင်ငံတွင် ပြစ်ဒဏ်ကျခံနေရသော မြန်မာနိုင်ငံသား ၄၀ ကိုလည်း အထူးအစီအစဉ်ဖြင့် လွတ်ငြိမ်းချမ်းသာခွင့်ပေးရန် ဆုံးဖြတ်ခဲ့ကြောင်း ပူးတွဲကြေညာချက်တွင် ဖော်ပြထားသည်။
အိန္ဒိယနိုင်ငံမှ ပြည်ဝင်ခွင့်ပြုထားသည့် ဗီဇာအမျိုးအစားများမှာ e-Visa, Business Visa, Conference Visa, Diplomatic Visa, Employment Visa, Emergency Visa, Entry Visa, Journalist Visa, Medical Visa, Missionaries Visa, Permit to re-enter within 2 months, Research Visa, Student Visa, Tourist Visa, Transit Visa,Intern Visa,Film Visa တို့ဖြစ်သည်။
ယင်းကဲ့သို့ အိန္ဒိယနိုင်ငံမှ ဗီဇာကြေး ကင်းလွတ်ခွင့်ပြုမည့်အပေါ် မြန်မာနိုင်ငံဘက်မှ လှိုက်လဲှစွာ ကျေးဇူးတင်ကြောင်း မြန်မာ-အိန္ဒိယ နှစ်နိုင်ငံထုတ်ပြန်သည့် ပူးတွဲကြေညာချက်တွင် ဖော်ပြထားသည်။
ယခင်က အိန္ဒိယနိုင်ငံသည် မြန်မာနိုင်ငံမှ Diplomatic ဗီဇာနှင့် Official ဗီဇာအမျိုးအစားနှစ်ခုကိုသာ ဗီဇာကြေး ကင်းလွတ်ခွင့်ပေးထားသည်။ လက်ရှိတွင် e-visa မှလွဲ၍ ကျန်ဗီဇာအမျိုးအစားအားလုံးကို ဗီဇာကြေး ကင်းလွတ်ခွင့်ပေးမည်ဖြစ်ကြောင်း ထုတ်ပြန်ခြင်းဖြစ်သည်။ မြန်မာနိုင်ငံသည် အရှေ့တောင်အာရှ နိုင်ငံရှစ်နိုင်ငံနှင့် ဗီဇာကြေး ကင်းလွတ်ခွင့်ရရှိထားပြီး အပြန်အလှန် သွားလာခွင့်ရရှိထားသည်။
ယင်းကဲ့သို့ မြန်မာနိုင်ငံနှင့် ဗီဇာကင်းလွတ်ခွင့် ရရှိထားသည့်နိုင်ငံများမှာ ဘရူနိုင်း၊ ကမ္ဘောဒီးယား၊ အင်ဒိုနီးရှား၊ လာအို၊ ဖိလစ်ပိုင်၊ စင်ကာပူ၊ ထိုင်း၊ ဗီယက်နမ်နိုင်ငံတို့ဖြစ်သည်။
