တပ်မတော် (လေ) မှလေ့ကျင့်ပျံသန်းရေး G-4 ဂျက်လေယာဉ်တစ်စင်း ပျံသန်းလေ့ကျင့်စဉ် ပျောက်ဆုံး

စက်တင်ဘာ ၅ ရက် နံနက်ပိုင်းက တပ်မတော် (လေ) မှလေ့ကျင့်ပျံသန်းရေး G-4 ဂျက်လေယာဉ်တစ်စင်းသည် ပျံသန်းလေ့ကျင့်စဉ် ပျောက်ဆုံးလျက်ရှိကြောင်း တပ်မတော် ကာကွယ်ရေးဦးစီးချုပ်ရုံး၏ သတင်းထုတ်ပြန်ချက်အရ သိရသည်။

တပ်မတော် (လေ) မှလေ့ကျင့်ပျံသန်းရေး G-4 ဂျက်လေယာဉ်သုံးစင်းသည် ပုသိမ်လေဆိပ်မှ စက်တင်ဘာ ၅ ရက်နံနက်ပိုင်းတွင် စတင်ပျံသန်းလေ့ကျင့်ခဲ့ကြပြီး ယင်း G-4 ဂျက်လေယာဉ်သုံးစင်းအနက် လေယာဉ်မှူး ဗိုလ်မှူးကောင်းထိုက် မောင်းနှင်သည့် G-4 ဂျက်လေယာဉ်တစ်စင်းသည် ပုသိမ်-ဟင်္သာတ-ဂွ-ပုသိမ်လမ်းကြောင်းအတိုင်း လေ့ကျင့်ပျံသန်းစဉ် နံနက် ၉ နာရီ ၁၈ မိနစ်တွင် ပုသိမ်မြို့၏ အနောက်မြောက်ဘက် ၃၅၀ ဒီဂရီ၊ အကွာအဝေးအားဖြင့် ၃၆ မိုင်ခန့်အကွာ၌ ပုသိမ်လေဆိပ်နှင့် နောက်ဆုံးအဆက်အသွယ် ရရှိပြီးနောက်ပိုင်း ပျောက်ဆုံးသွားခြင်းဖြစ်ကြောင်း တပ်မတော်ကာကွယ်ရေးဦးစီးချုပ်ရုံးမှ သတင်းထုတ်ပြန်ချက်အရ သိရသည်။

အဆိုပါ ပျောက်ဆုံးလျက်ရှိသည့် G-4 ဂျက်လေယာဉ်အား မြေပြင်တပ်များနှင့် တပ်မတော် (လေ) မှလေယာဉ်၊ ရဟတ်ယာဉ်များဖြင့် ရှာဖွေရေးလုပ်ငန်းများ ဆောင်ရွက်နေကြောင်း တပ်မတော် ကာကွယ်ရေးဦးစီးချုပ်ရုံးမှ သတင်းထုတ်ပြန်ချက်အရ သိရသည်။

လေ့ကျင့်ပျံသန်းရေး G-4 ဂျက်လေယာဉ် ပျောက်ဆုံးနေမှုနှင့် ပတ်သက်၍ ဧရာဝတီတိုင်းဒေသကြီး ရဲတပ်ဖွဲ့မှ ဒုရဲမှူးကြီး ခင်မောင်လတ်က “သာပေါင်းနဲ့ ပုသိမ်အစပ်နား မကျီးဇင်တို့ ဂျိတ်လတ်တို့ အဲဒီနားလေးတစ်ဝိုက်ဆိုတော့ သာပေါင်းမြို့နယ်မှူးနဲ့အဖွဲ့၊ ပုသိမ်ခရိုင်မှူးနဲ့အဖွဲ့က ဖြစ်နိုင်ခြေရှိတဲ့နေရာတွေမှာ လိုက်ရှာနေတယ်။ တပ်မတော်က အဖွဲ့တွေနဲ့ ပူးပေါင်းပြီး ဆောင်ရွက်နေပါတယ်။ နောက်ဆုံးရတဲ့သတင်းအရ မကျီးဇင်နားတစ်ဝိုက် ဖြစ်နိုင်တယ်ဆိုလို့ အဲဒီနားတစ်ဝိုက်ကို ကျွန်တော်တို့တောက်လျှောက် စုံစမ်းနေတယ်။ သာပေါင်းမြို့နယ်မှူးလည်း မကျီးဇင်မှာ ရဲကင်းရဲစခန်းတစ်ခုရှိတော့ အဲဒီကအဖွဲ့တွေနဲ့ ပူးပေါင်းပြီး အဲဒီနားတစ်ဝိုက်က ကျေးရွာအုပ်ချုပ်ရေးမှူးနဲ့ သတင်းလိုက်ပြီး စုံစမ်းနေတယ်။ နေ့ခင်းပိုင်းမှာတော့ အောက်ခြေကျေးရွာတွေအထိ ခရိုင်ရဲတပ်ဖွဲ့မှူးကိုသွားဖို့ တိုင်းတပ်ဖွဲ့မှူးက တာဝန်ပေးထားပါတယ်။ ဌာနချုပ်ကိုတင်ပြတော့ ဒီနေရာက ရခိုင်ဂွနဲ့အစပ်ဖြစ်နေတော့ နေပြည်တော်က ရခိုင်ပြည်နယ်ကိုလည်းဆက်ပြီး ဒါနဲ့ပတ်သက်လို့စုံစမ်းဖို့ တာဝန်ပေးထားပါတယ်” ဟုပြောကြားသည်။

အဆိုပါ လေယာဉ်ပျောက်ဆုံးမှုနှင့် ပတ်သက်၍ ခရိုင်နှင့် မြို့နယ်အသီးသီးမှ နယ်မြေခံရဲတပ်ဖွဲ့များ အနေဖြင့်လည်း ထူးခြားမှု တစ်စုံတစ်ရာတွေ့ရှိပါက တင်ပြရန် တိုင်းရဲတပ်ဖွဲ့က ညွှန်ကြားထားကြောင်း ဒုရဲမှူးကြီး ခင်မောင်လတ်၏ ပြောကြားချက်အရ သိရသည်။

ပြီးခဲ့သည့် ဇွန် ၇ ရက်က တနင်္သာရီတိုင်းဒေသကြီး၊ မြိတ်မြို့မှ ရန်ကုန်မြို့သို့ ထွက်ခွာလာသည့် Y-8 တပ်မတော် သယ်ယူပို့ဆောင်ရေး aလယာဉ်သည် ထားဝယ်ခရိုင် ကမ်းရိုးတန်းအရောက် အဆက်အသွယ် ပြတ်တောက်သွားပြီး ပျက်ကျခဲ့သည်။ Y-8 တပ်မတော်လေယာဉ်တွင် သက်သာချောင်ချိရေးပစ္စည်းများအပြင် အရာရှိနှင့်စစ်သည် ၃၅ ဦး၊ မိသားစုဝင်ကလေး ၁၅ ဦး၊ လူကြီး ၅၈ ဦး စုစုပေါင်းခရီးသည် ၁၂၂ ဦးလိုက်ပါသွားပြီး အဆိုပါ လေယာဉ်မတော်တဆမှု ဖြစ်စဉ်သည် မြန်မာနိုင်ငံ လေကြောင်းသမိုင်းတစ်လျှောက် အဆိုးရွားဆုံး လေယာဉ်မတော်တဆမှု ဖြစ်စဉ်တစ်ခုအဖြစ် မှတ်တမ်းဝင်ခဲ့သည်။ ထို့ပြင်၂၀၁၆ ခုနှစ် ဖေဖော်ဝါရီ ၁၀ ရက်က တပ်မတော် (လေ) မှ Beech 1900 D လေယာဉ်တစ်စင်းသည် နေပြည်တော်အနီး ပျက်ကျခဲ့သောကြောင့် အရာရှိနှင့် စစ်သည်ငါးဦး အသက်ဆုံးရှုံးခဲ့ကြောင်း သိရသည်။