Photo: AS
ဘာစီလိုနာအသင်း၏နည်းပြ ဗယ်လ်ဗာဒီက အပြောင်းအရွှေ့ဈေးကွက်မပိတ်မီ ပိုမိုတောင့်တင်းသည့်အသင်းဖြစ်လာရန် မျှော်လင့်နေကြောင်း အလာဗတ်စ်နှင့် ပွဲအပြီးတွင် ပြောကြားခဲ့သည်။
ဘာစီလိုနာအသင်းသည် လာလီဂါအဖွင့်ပွဲစဉ်နှစ်ပွဲစလုံး အနိုင်ရရှိခဲ့သော်လည်း ယခုထက် ပြိုင်ပွဲဝင်စွမ်းအား ပိုမိုမြင့်မားသည့်အသင်း ဖြစ်လာရန် လိုအပ်နေသေးသည်ဟုလည်း ဗယ်လ်ဗာဒီက ဆိုခဲ့သည်။
ဘာစီလိုနာအသင်းသည် ယခုနွေရာသီအပြောင်းအရွှေ့တွင် ဘရာဇီးလ်တိုက်စစ်မှူး နေမာကို ဆုံးရှုံးခဲ့ရသည့်အတွက် အင်အားလျော့နည်းသွားခဲ့ပြီး ပြိုင်ဘက်ရီးယဲလ်အသင်းကို ယှဉ်နိုင်ရန် မလွယ်ကူတော့ဟု ဝေဖန်ခံနေရသည်။
လက်ရှိအချိန်တွင် ဒမ်ဘီလီ၊ ပေါ်လင်ဟို၊ ဆယ်မီဒို စသည့်ကစားသမားများကို ပြန်လည်ဖြည့်တင်းထားသော်လည်း ဗယ်လ်ဗာဒီကိုယ်တိုင်က လုံလောက်မှုမရှိသေးဟု သုံးသပ်ပြီး သြဂုတ်(၃၁)အထိ ကစားသမားသစ်များ ထပ်မံခေါ်ယူနိုင်ရန် ကြိုးစားသွားမည်ဟု ဆိုခဲ့ခြင်းဖြစ်သည်။
ဘာစီလိုနာအသင်းသည် လီဗာပူးလ်ကွင်းလယ်ကစားသမား ကော်တင်ဟိုကို နောက်တစ်ကြိမ် ကမ်းလှမ်းသွားရန် စီစဉ်နေသလို၊ စပါးအသင်းမှ အယ်လီ၊ ချယ်လ်ဆီးအသင်းမှ ဝီလီယံနှင့် PSG အသင်းမှ ဒီမာရီယာတို့ကိုလည်း ပစ်မှတ်ထားနေကြောင်း သိရှိရသည်။
သို့သော် ဗြိတိန်မီဒီယာအချို့ကမူ ဘာစီလိုနာအသင်းအနေဖြင့် အဓိကတိုက်စစ်မှူး မက်ဆီကို အသင်းတွင် ဆက်ရှိနေရန်လည်း စည်းရုံးနေရပြီး မက်ဆီကို အေးဂျင့်ဖြစ်သူ ရိုင်အိုလာက အသင်းမှ ထွက်ခွာရန် တိုက်တွန်းနေကြောင်းလည်း ဖော်ပြခဲ့ကြသည်။
