ယခုနှစ် မိုးရာသီ ကောက်သစ်ပေါ်သည့် အချိန်ကာလနီးကပ်နေပြီး ကောက်စောစပါးပေါ်သည့်ဒေသများမှ ရာသီစ ကောက်သစ်စပါးများကို နေ့စဉ်တင်း သောင်းနှင့်ချီကာ တရုတ်နိုင်ငံသို့ တရားမဝင် ဝယ်ယူတင်ပို့နေမှုများကို သက်ဆိုင်ရာ ဝန်ကြီးဌာနများသို့ တင်ပြထားသော်လည်း တားဆီးနိုင်ခြင်းမရှိသေးကြောင်း မြန်မာနိုင်ငံ ဆန်စက်လုပ်ငန်းရှင်များအသင်း အထွေထွေအတွင်းရေးမှူး ဦးနေလင်းဇင်က အောက်တိုဘာ ၄ ရက်က ပြောကြားသည်။
စပါးကို နယ်စပ်ဒေသများမှတစ်ဆင့် အိမ်နီးချင်းတရုတ်နိုင်ငံသို့ တင်ပို့နေမှုများ ဖြစ်ပွားခဲ့သည်မှာ သုံးနှစ်ဝန်းကျင်ခန့် ရှိပြီဖြစ်ကြောင်း သိရသည်။
“မနှစ်ကနဲ့ ဒီနှစ်မှာ တော်တော်လေး အရှိန်ရလာတယ်။ ဒီနှစ်ဆိုရင် ကောက်သစ်စပေါ်တဲ့ ပဲခူးတိုင်းအနောက်ခြမ်းမှာ စပေါ်နေပြီပေါ့။ စပြီးပေါ်လာပြီဆိုပဲ နယ်စပ်ကို တရားမဝင် စီးထွက်နေတယ်” ဟု မြန်မာနိုင်ငံ ဆန်စက်လုပ်ငန်းရှင်များအသင်း အထွေထွေအတွင်းရေးမှူး ဦးနေလင်းဇင်က ပြောကြားသည်။
ယခုအခါ ပြည်နယ်နှင့် တိုင်းဒေသကြီး အသီးသီးရှိ စပါးထွက်ရှိရာဒေသများတွင် စပါးပေါ်ချိန်၌ အိမ်နီးချင်းနိုင်ငံမှ ကုန်သည်များက ဒေသထွက်စပါးများကို ဝယ်ယူပြီး တရားမဝင် တင်ပို့ကုန်သွယ်နေသည့်ကိစ္စနှင့် ပတ်သက်၍ ပြည်နယ်နှင့် တိုင်းဒေသကြီးများ၏ ဆန်စက်လုပ်ငန်းရှင်များအသင်းမှ တင်ပြလာကြောင်း သိရသည်။
အဆိုပါ စပါးများ တရားမဝင်ကုန်သွယ် တင်ပို့မှုများနှင့် ပတ်သက်၍ ၂၀၁၇ ခုနှစ်တွင်လည်း မြန်မာနိုင်ငံ ဆန်စက်လုပ်ငန်းရှင်များအသင်း အနေဖြင့် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှတစ်ဆင့် နိုင်ငံတော်အစိုးရသို့ တင်ပြထားခဲ့ကြောင်း သိရသည်။ နိုင်ငံတော်သမ္မတရုံးမှလည်း ပြည်ပသို့ နယ်စပ်မှတစ်ဆင့် စပါးများ တရားမဝင် တင်ပို့မှုနှင့်ပတ်သက်၍ ဥပဒေအရ တားဆီး အရေးယူ ဆောင်ရွက်နိုင်ရေး ညှိနှိုင်းဆောင်ရွက်ရန် ညွှန်ကြားထားပြီးဖြစ်သည်။
ယခုနှစ်တွင် မိုးစပါးကောက်စောစပါးပေါ်သည့် ပဲခူးတိုင်းဒေသကြီး အနောက်ခြမ်းတွင် ရာသီစ ကောက်သစ်စပါးများအား နေ့စဉ်တင်းသောင်းချီမြို့နယ်အသီးသီးမှ တရားမဝင် ဝယ်ယူတင်ပို့မှုများ ဖြစ်ပေါ်နေ၍ ဒေသခံ ဆန်စက်လုပ်ငန်းရှင်များ အသင်းများမှာ အခက်အခဲ ကြုံတွေ့နေရကြောင်း ထပ်မံတင်ပြလာကြောင်း သိရသည်။
“ဆန်စပါးကို ပြည်တွင်းမှာတော့ ဥပဒေအရ လွတ်လပ်စွာ ဝယ်ယူရောင်းချ ခွင့်ပြုထားပါတယ်။ ဥပမာ မူဆယ်အထိကို ရောင်းဝယ်ခွင့်ပြုတယ်။ မူဆယ်နယ်စပ်ကနေ ဟိုဘက်အထိကျတော့ ခွင့်ပြုထားတာ မဟုတ်ဘူး။ နောက်ပြီး နယ်စပ်တစ်လျှောက်မှာ အပေါက်ပေါင်းစုံကနေ စပါးကို တရားမဝင် တင်ပို့နေကြတယ်။ ဒါကို ဘယ်လိုတားဆီးမလဲ။ တကယ်လို့ ဥပဒေအရ စပါးတင်ပို့ခွင့်ကို ပြုမယ်ဆိုရင်လည်း သင့်လျော်တဲ့ စည်းမျဉ်းစည်းကမ်းပေါ့၊ သတ်မှတ်ပြီး တင်ပို့ခွင့်ပြုမယ်ဆိုရင်လည်း ခွင့်ပြုပေါ့။ အခုက တရားဝင်လည်းမဟုတ်ဘဲ တရားမဝင်ကို နယ်စပ် အပေါက်တွေက တင်ပို့နေကြတာ” ဟု ဆန်စက်လုပ်ငန်းရှင်တစ်ဦးက ဆိုသည်။
ယင်းကဲ့သို့ စပါးများ တရားမဝင် ထွက်ရှိနေမှုအား ထိရောက်စွာ အရေးယူ ကိုင်တွယ်နိုင်ခြင်းမရှိပါက စျေးနှုန်းဖျက်၍ လိုအပ်သလောက်သာ ဝယ်ယူခြင်းကြောင့် ပြည်တွင်းဆန်စပါးစျေးကွက်အပေါ် ထိခိုက်ခြင်း၊ စပါးစျေးနှုန်း၊ ဆန်စျေးနှုန်း ကြီးမြင့်လာစေခြင်း၊ ပြည်တွင်းဆန်စက်အချို့ လုံးဝရပ်နားရမည့် အခြေအနေဖြစ်လာခြင်း၊ ဆန်ထွက် ကုန်ကြမ်းများနှင့်ပတ်သက်၍ ဆက်နွှယ်လုပ်ကိုင်နေသည့် ကြက်မွေးမြူရေး၊ ငါး၊ နွား မွေးမြူရေးလုပ်ငန်းများ လျော့ကျစေခြင်းစသည့် နောက်ဆက်တွဲဆိုးကျိုးများ ဖြစ်ပေါ်စေနိုင်ကြောင်းနှင့် ယင်းအခြေအနေများကြောင့် အောက်တိုဘာ ၆ ရက်တွင် ကျင်းပမည့် ဒုတိယသမ္မတနှင့် လုပ်ငန်းရှင်များ တွေ့ဆုံပွဲတွင် အထက်ပါ အခြေအနေများကို တင်ပြသွားမည်ဖြစ်သည်။
