ပင်းတယ NLD ပါတီဥက္ကဋ္ဌက အတွင်းရေးမှူးအား တရားစွဲထားသော အမှုနှင့်ပတ်သက်ပြီး ထောင်ဒဏ်ခြောက်လနှင့် ငွေဒဏ်ကျပ်သုံးသိန်း တပေါင်းတည်း ကျခံစေရန် အမိန့်ချ

ရှမ်းပြည်တောင်ပိုင်း ဓနုကိုယ်ပိုင်အုပ်ချုပ်ခွင့်ရဒေသ ပင်းတယမြို့နယ် အမျိုးသား ဒီမိုကရေစီအဖွဲ့ချုပ် မြို့နယ်ဥက္ကဋ္ဌက ပါတီမြို့နယ်အတွင်းရေးမှူးအား လူပုဂ္ဂိုလ်ဆိုင်ရာ လွတ်လပ်ခွင့် ပုဒ်မ (၁၀) ဖြင့် တရားစွဲထားသော အမှုကို ထောင်ဒဏ်ခြောက်လနှင့် ငွေဒဏ် ကျပ်သုံးသိန်းတို့ကို တပေါင်းတည်း ကျခံစေရန် တောင်ကြီးမြို့နယ် တရားရုံးက အမိန့်ချမှတ်ခဲ့ကြောင်း သတင်းရရှိသည်။ 

တိုင်ကြားခံရထားရသော ပင်းတယမြို့နယ် အမျိုးသားဒီမိုကရေစီအဖွဲ့ချုပ် အတွင်းရေးမှူး ဦးတင့်ရွှေကို တောင်ကြီးမြို့နယ် တရားရုံး၊ ခုံ (၁) မှ လူပုဂ္ဂိုလ်ဆိုင်ရာ လွတ်လပ်ခွင့်နှင့် လုံခြုံရေးကို ကာကွယ်ပေးရေး ဥပဒေပုဒ်မ (၁၀) ဖြင့် ထောင်ဒဏ်ခြောက်လနှင့် ငွေဒဏ် သုံးသိန်းကို၊ အောက်တိုဘာ ၄ ရက်တွင် အမိန့်ချမှတ်ခဲ့ခြင်း ဖြစ်သည်။

“တောင်ကြီးမှာဖြစ်လို့ တောင်ကြီးမှာ စွဲထားတာ။ ဖြစ်တာကတော့ မြို့နယ်ရုံးမှာ ဖြစ်တာ။ ဦးညီလေးချမ်းကို တိုင်ထားတာ၊ ဦးတင့်ရွှေ တိုင်ထားတာလည်း မဟုတ်ဘူး။ ဦးညီလေးချမ်းက ရပ်စောက်က ရတာလို့ ပြောတယ်။ ဦးတင့်ရွှေက အခုအသက် ၇၅ နှစ်ရှိနေပြီ။ အခု တောင်ကြီးမြို့နယ် တရားရုံး ခုံ (၁) ကနေ ထောင်ဒဏ် ခြောက်လနဲ့ ဒဏ်ငွေသုံးသိန်း အမိန့်ချလိုက်ပြီ။ ဒဏ်ငွေ သုံးသိန်းကို အခု မဆောင်နိုင်ရန် ထောင်ဒဏ်တစ်နှစ်ကျမယ်။ နှစ်မျိုးလုံး ပူးတွဲကျခံရမယ်။ ပုဒ်မ (၁၀) က အဲဒါ အနိမ့်ဆုံးပဲ” ဟု တရားလွှတ်တော်ရှေ့နေ ဒေါ်ခင်မိုးမိုးက ပြောကြားသည်။

အသက် ၇၅ နှစ်အရွယ်ရှိပြီဖြစ်သော ပင်းတယမြို့နယ် ပါတီအတွင်းရေးမှူးဖြစ်သူ ဦးတင့်ရွှေသည် တောင်ကြီးမြို့နယ် တရားရုံးသို့ လာရောက်ရခြင်းဖြစ်ပြီး၊ ပင်းတယမှ တောင်ကြီးသို့ ရုံးချိန်းများစွာ လာရောက်ရသဖြင့် အလုပ်ပျက်ခြင်း၊ ငွေကုန်ခြင်း၊ ကျန်းမာရေး မကောင်းခြင်းတို့ကြောင့် မိမိအနေဖြင့် များစွာနစ်နာရကြောင်း၊ မိမိတို့အမှုကို ပါတီမှ တာဝန်ယူပြီး ဖြေရှင်းပေးခြင်း မရှိကြောင်း၊ တရားစွဲခံထားရသော ပင်းတယမြို့နယ် အလုပ်အမှုဆောင် အမျိုးသားဒီမိုကရေစီအဖွဲ့ချုပ် အတွင်းရေးမှူးဖြစ်သူ ဦးတင့်ရွှေက ပြောကြားခဲ့သည်။

အမျိုးသားဒီမိုကရေစီအဖွဲ့ချုပ်ပါတီ ပင်းတယမြို့နယ်ဥက္ကဋ္ဌဖြစ်သူ ဦးညီလေးချမ်းက ပင်းတယမြို့နယ် အလုပ်အမှုဆောင်ဖြစ်သူ ဦးတင့်ရွှေကို တောင်ကြီးမြို့မရဲစခန်းတွင် ပုဂ္ဂိုလ်ဆိုင်ရာ လွတ်လပ်မှုနှင့် ပုဂ္ဂိုလ်ဆိုင်ရာ လုံခြုံရေးကို ကာကွယ်ပေးရေးဥပဒေပုဒ်မ - ၁၀ ဖြင့် ၂၀၁၇ ခုနှစ် သြဂုတ် ၆ ရက်တွင် အမှုဖွင့်ခဲ့ပြီး ဒီဇင်ဘာ ၂၇ ရက်တွင် တရားရုံးတွင် စတင်စစ်ဆေးခဲ့ခြင်းဖြစ်သည်။

အဆိုပါ ဖြစ်စဉ်မှာ ပင်းတယမြို့နယ် တောင်ရှည်တိုက်နယ်ကျေးရွာအုပ်စု တမဲကျေးရွာမှ လူတစ်ဦးက ဦးညီလေးချမ်းကို မကျေနပ်သဖြင့် တိုင်ကြားမှုကြောင့် တောင်ကြီးမြို့ရှိ ရှမ်းပြည်နယ် အမျိုးသားဒီမိုကရေစီအဖွဲ့ချုပ်ရုံးခန်းတွင် ပါတီစည်းကမ်း ထိန်းသိမ်းရေးအဖွဲ့က ခေါ်ယူစစ်ဆေးမေးမြန်းစဉ်  ဦးတင့်ရွှေက လူလိမ်ဟု ပြောဆိုလိုက်သဖြင့် ဦးညီလေးချမ်းက အမှုဖွင့် တရားစွဲဆိုခဲ့ခြင်းဖြစ်ကြောင်း သိရသည်။