ပျော်ဘွယ် - နတ်မောက် ရထားလမ်း မိုင်တိုင် ၁၉၁ မိုင်အနီးတွင် ကားရထားတစ်စင်း တိမ်းမှောက်မှုဖြစ်ပွားပြီး ၁၁ ဦး ဒဏ်ရာရရှိ

အောက်တိုဘာ ၄ ရက် နံနက် ၁၀ နာရီဝန်းကျင်က ပျော်ဘွယ်-နတ်မောက် ရထားလမ်း မိုင်တိုင် (၁၉၁) မိုင် အနီး၊ ပျော်ဘွယ်မြို့နယ် ယုံကုန်းကျေးရွာ အနီးတွင် နတ်မောက်-ပျော်ဘွယ် အစုန်ကားရထား RBE တစ်စီး ရထားဘီးချော် တိမ်းမှောက်ခဲ့ရာ ရထားပေါ်လိုက်ပါလာသော ခရီးသည် ၈၄ ဦးအနက် ခရီးသည် အမျိုးသား တစ်ဦး၊ အမျိုးသမီးဆယ်ဦး ဒဏ်ရာရရှိခဲ့ပြီး ပျော်ဘွယ်ပြည်သူ့ ဆေးရုံကြီးသို့ တင်ပို့ကုသခဲ့ရကြောင်း ပျော်ဘွယ်မြို့နယ် ကြက်ခြေနီနှင့် ပျော်ဘွယ်မြို့နယ် မီးသတ်ဦးစီးဌာနတို့မှ သိရှိရသည်။

“မီးရထား တိမ်းမှောက်တယ်လို့ ဖုန်းသတင်းရတာနဲ့ ကျွန်တော်တို့မီးသတ်က ကယ်ဆယ်ရေးတပ်ဖွဲ့ဝင်တွေ မီးငြိမ်းသတ်ယာဉ် တစ်စီးနဲ့ ထွက်တာပါ၊ ကယ်ဆယ်ရေး တပ်ဖွဲ့မှာ အသက်ကယ်ကြိုးတွေ၊ အသက်ကယ် ပစ္စည်းတွေတင်ပြီး ထွက်ကူညီတာပါ၊ ဟိုရောက်တော့ ခရီးသည်တွေက အောက်မှာ ထိုင်နေကြပြီ၊ မီးရထား တိမ်းမှောက်တာမှာ လူထိခိုက်သေဆုံးတာ မရှိပါဘူး၊ မစိုးရိမ်ရ ဒဏ်ရာရတဲ့ လူတွေများပါတယ်၊ ဒဏ်ရာရတဲ့လူတွေ ခရီးသည်တွေကို ပျော်ဘွယ်မြို့နယ် ပြည်သူ့ဆေးရုံကို ပို့ပေးလိုက်ပါတယ်၊ ရထားပေါ်မှာ ဘာတင်လာတယ် ဆိုတာမျိုး အသေးစိတ်တော့ မသိပါဘူး၊ ကျွန်တော်တို့က လူအဓိက လူအသက်ကယ်ဖို့နဲ့ ဒဏ်ရာရတဲ့လူကို ဆေးရုံပို့ဖို့ပဲ လုပ်ပေးခဲ့ပါတယ်၊ အခြား ဖြည့်စွက်ပြောစရာ မရှိပါဘူး” ဟု ပျော်ဘွယ်မြို့နယ် မီးသတ်ဦးစီးဌာနမှ ဦးစီးမှုး ဦးအောင်သက်လှိုင်မှ ပြောကြားသည်။

“ကျွန်တော်တို့ဆီက ကြက်ခြေနီ တပ်ဖွဲ့ဝင် ကောင်လေးတွေ သွားကူညီတယ်၊ ဖြစ်တာက ယုံကုန်းနားမှာ ဖြစ်တာပါ၊ အသေအပျောက်မရှိပါဘူး၊ ထိခိုက်ဒဏ်ရာ ရတာပဲ ရှိပါတယ်၊ အကုန်လုံး ပျော်ဘွယ်မြို့နယ်ဆေးရုံ ပို့ခဲ့ရတယ်” ဟု ပျော်ဘွယ်မြို့နယ် ကြက်ခြေနီတပ်ဖွဲ့တာဝန်ရှိသူ ဦးသန်းဝင်းမှ ပြောကြားသည်။

အဆိုပါ လူစီးကားရထား လမ်းချော်မှုအား ပျော်ဘွယ်မြို့နယ် မီးသတ်ဦးစီးဌာနမှ ရှာဖွေကယ်ဆယ်ရေး တပ်ဖွဲ့ဝင် (၁၂)ဦး၊ ပျော်ဘွယ်မြို့နယ် ကြက်ခြေနီတပ်ဖွဲ့ဝင်များ၊ ပျော်ဘွယ်မြို့ အခြေစိုက် ပရဟိတအသင်းများမှ သွားရောက်ကူညီ ကယ်ဆယ်ရေး လုပ်ငန်းများ လုပ်ဆောင်ခဲ့ကြပြီး ဒဏ်ရာရရှိသည့် ခရီးသည်များအား ပျော်ဘွယ်မြို့နယ် ဆေးရုံသို့ တင်ပို့ပေးခဲ့ကြောင်း သိရှိရသည်။