မန္တလေးမြို့တွင် ကြက်ဥ၊ ကြက်သားစားသုံးမှု မြှင့်တင်ရေးဆိုင်ရာ အသိပညာပေး ဟောပြောပွဲနှင့် ဆွေးနွေးပွဲ ပြုလုပ်စဉ်
ပြည်သူများအကြား ရာသီတုပ်ကွေး H1N1 ရောဂါနှင့်ဆက်စပ်၍ ကောလဟာလများကြောင့် ကြက်ဥ၊ ကြက်သားစားသုံးမှု လျော့ကျလျက်ရှိသည့်အတွက် မန္တလေးမြို့တွင် ကြက်ဥ၊ ကြက်သားစားသုံးမှု မြှင့်တင်ရေးဆိုင်ရာ အသိပညာပေး ဟောပြောပွဲနှင့် ဆွေးနွေးပွဲအား သြဂုတ် ၇ ရက် နံနက်ပိုင်းက Oriental House ခန်းမတွင် ကျင်းပပြုလုပ်ခဲ့သည်။
“ဒီနေ့အခမ်းအနားရဲ့ အဓိကရည်ရွယ်ချက်ကတော့ H1N1 သည် ကြက်ဥ၊ ကြက်သားနဲ့ ပတ်သက်မှုမရှိဘူးဆိုတာကို ဟောပြောပွဲပြုလုပ်တာ ဖြစ်ပါတယ်။ အဓိက,ကတော့ H1N1 ဖြစ်တဲ့အချိန်မှာ တိုက်ဆိုင်မှု ဖြစ်ပြီးတော့ ထားဝယ်မှာ H5N1 ဖြစ်သွားတယ်။ ဒီနှစ်ခုက ရောထွေးစွာနဲ့ ဖြစ်သွားပြီးတော့ စားသုံးသူတွေက စိုးရိမ်စွာနဲ့ ကြက်ဥ၊ ကြက်သားစားသုံးမှု လျော့သွားတဲ့အတွက် ဒီလိုပွဲမျိုးလုပ်ရတာပါ။ ဒီလိုမျိုးစားသုံးမှု ကျဆင်းသွားတဲ့အတွက်ကြောင့် မွေးမြူရေးလုပ်ငန်းမှာ ထိခိုက်မှုတွေလည်း ရှိလာပါတယ်” ဟု မြန်မာနိုင်ငံ မွေးမြူရေးလုပ်ငန်းအဖွဲ့ချုပ် (မန္တလေးတိုင်းဒေသကြီး) ဥက္ကဋ္ဌ ဒေါက်တာကျော်ထင်က ပြောကြားသည်။
အဆိုပါ အခမ်းအနားအား မန္တလေးတိုင်းဒေသကြီး မွေးမြူရေးနှင့် ကုသရေးဦးစီးဌာန၊ မြန်မာနိုင်ငံမွေးမြူရေးလုပ်ငန်းအဖွဲ့ချုပ် (မန္တလေးတိုင်းဒေသကြီး)နှင့် တိရစ္ဆာန်ဆေးကုဆရာဝန်များ (မန္တလေး) တို့ ပူးပေါင်းကျင်းပခြင်းဖြစ်ပြီး ဆွေးနွေးပွဲတွင် လက်ရှိဖြစ်ပွားနေသော ရာသီတုပ်ကွေးရောဂါမှာ ကြက်ဥ၊ ကြက်သားစားသုံးခြင်းဖြင့် ဖြစ်ပွားနိုင်ခြင်း မရှိကြောင်း၊ ကြက်ငှက်တုပ်ကွေးရောဂါဖြစ်သော H5N1 ရောဂါမှာလည်း ထားဝယ်မြို့တွင် အနည်းငယ်သာဖြစ်ပွားခဲ့ပြီး ကျန်တိုင်းဒေသကြီးများတွင် ဖြစ်ပွားမှုမရှိသည့် အခြေအနေများနှင့်ပတ်သက်၍ ပညာရှင်များ၊ မွေးမြူရေးလုပ်ငန်းရှင်များမှ ရှင်းလင်းဟောပြော ဆွေးနွေးမှုများ ပြုလုပ်ခဲ့ကြသည်။
လက်ရှိတွင် H1N1 ရောဂါဖြစ်ပွားကာ လူသေဆုံးမှုများရှိနေပြီး ယင်းရောဂါပိုးနှင့် ဆက်စပ်၍ နားလည်မှုလွဲကာ ကြက်ဥ၊ ကြက်သားစားသုံးမှုမှာ ရာခိုင်နှုန်း ၅၀ ကျော် လျော့နည်းသွားပြီး ကြက်ဥ၊ ကြက်သားဈေးကွက်မှာလည်း ၁၀ စုနှစ်အတွင်း စံချိန်တင်ကျဆင်းမှုများ ဖြစ်ပေါ်လျက်ရှိခြင်းကြောင့် ပြည်သူများ ယုံမှားသံသယဖြစ်မှုလျော့ကျကာ ကြက်ဥ၊ ကြက်သားအား ပြန်လည်စားသုံးလာမှု မြင့်တက်စေရန်အတွက် ကျင်းပခြင်းဖြစ်ကာ သြဂုတ် ၈ ရက်တွင်လည်း ပြင်ဦးလွင်၌ ယခုကဲ့သို့ ဟောပြောဆွေးနွေးပွဲ ပြုလုပ်သွားမည်ဖြစ်ကြောင်း သိရသည်။
ဈေးကွက်အတွင်း၌ ကြက်ဥ၊ ကြက်သား ဈေးနှုန်းများမှာ စံချိန်တင် ကျဆင်းလျက်ရှိပြီး ပုံမှန်ဈေးနှုန်းများထက် ကြက်ဥတစ်ပိဿာလျှင် ၁၀၀၀ ခန့် ကျဆင်းကာ ကြက်သားတစ်ပိဿာလျှင် ကျပ် ၁၅၀၀ ခန့် ကျဆင်းသွားကြောင်း သိရပြီး လက်ရှိတွင် ကြက်ဥစားသုံးမှုမှာ ယခင်ရက်ပိုင်းများထက် အနည်းငယ်ပြန်လည် များပြားလာသော်လည်း ကြက်သားစားသုံးမှုမှာ လျော့ကျနေဆဲဖြစ်ကြောင်း သိရသည်။
Writer : လဲ့လဲ့အောင်၊ ဟေမာန်ဦး
