လှည်းကူးမြို့နယ်တွင် သိမ်းဆည်းရမိခဲ့သည့် ၅ ဒသမ ၅၆ မီလီမီတာ ကျည်ဆန်အတောင့် ၉၅၀၀ ကျော်အား မူဆယ်မြို့ရှိ ပြည်သူ့စစ်အဖွဲ့ နှစ်ဖွဲ့ထံသို့ ရောင်းစားရန် တပ်မတော်က ဗိုလ်ကြီးဆိုသူထံမှတဆင့် ပို့ဆောင်ရန်ပြုလုပ်စဉ် ဖမ်းဆီးခံခဲ့ရခြင်း ဖြစ်သည်ဟု ကျူးလွန်သူ ဇော်ဇော်ထက်လူက ထွက်ဆိုခဲ့ကြောင်း အောက်တိုဘာ ၃ ရက်တွင် မြန်မာနိုင်ငံရဲတပ်ဖွဲ့၏ အမည်မဖော်လိုသူ အဆင့်မြင့်ရဲအရာရှိတစ်ဦးထံမှ စုံစမ်းသိရှိရသည်။
အဆိုပါဖြစ်စဉ်မှာ စက်တင်ဘာ ၃၀ ရက် မွန်းလွဲပိုင်းတွင် ရန်ကုန်တိုင်းဒေသကြီး လှည်းကူးမြို့နယ် ဇရပ်ကွင်းကျေးရွာရှိ အဝေးပြေးကားလက်မှတ် ရောင်းသည့် ဆိုင်တစ်ဆိုင်သို့ အမျိုးသားတစ်ဦး သုံးဘီးဆိုင်ကယ်ဖြင့် ရောက်ရှိလာပြီး သံသေတ္တာ နှစ်လုံးအား မူဆယ်မြို့သို့ ပို့ဆောင်ရန်အတွက် အပ်နှံခဲ့ကြောင်း၊ ထို့နောက် ဖုန်းနံပါတ်တစ်ခုကိုလည်း ဆက်သွယ်ရန် ဆိုင်သို့ပေးခဲ့ကြောင်း သိရသည်။
ကားလက်မှတ် အရောင်းဆိုင်မှ ညနေပိုင်းတွင် ရောက်ရှိလာသည့် ခရီးသည်တင်ယာဉ်ဖြင့် အဆိုပါ သေတ္တာနှစ်လုံးကို တင်ဆောင်စဉ် လေးလံသဖြင့် ခရီးသည်တင်ယာဉ်က မတင်ဆောင်ဘဲ ထွက်သွားခဲ့ကြောင်း၊ ယင်းနောက် ဆိုင်မှလူများက သုံးဘီးဆိုင်ကယ်ဖြင့် အမျိုးသားပေးခဲ့သည့်ဖုန်းကို ဆက်ကြည့်ရာ ဆက်သွယ်၍ မရခဲ့ကြောင်း၊ ထို့နောက် ဆိုင်မှလူများက သေတ္တာနှစ်လုံးအား ဖွင့်ကြည့်ရာ အတွင်း၌ကျည်ဆန်များ တွေ့ရှိခဲ့ရသဖြင့် သက်ဆိုင်ရာ တာဝန်ရှိသူများကို အကြောင်းကြားခဲ့ကြောင်း သိရသည်။
တာဝန်ရှိသူများက စစ်ဆေးရာ အဆိုပါ သေတ္တာနှစ်လုံးအတွင်းမှ ၅ ဒသမ ၅၆ မီလီမီတာ ကျည် ၉၅၀၄ တောင့်အား တွေ့ရှိခဲ့ပြီး လှည်းကူးမြို့မရဲစခန်းက (ပ) ၁၀၂၇/၂၀၁၈၊ လက်နက်အက်ဥပဒေပုဒ်မ ၁၉(ဃ)/၁၉(စ) ဖြင့် အမှုဖွင့်ပြီး ကျူးလွန်သူကို ဖမ်းဆီးရမိရေး ဆောင်ရွက်ခဲ့ကြောင်း သိရသည်။
ဆောင်ရွက်ရာ ကျူးလွန်သူမှာ လှိုင်သာယာမြို့နယ်နေ ဇော်ဇော်ထက်လူ (၄၃ နှစ်) ဆိုသူဖြစ်ကြောင်း သိရသဖြင့် ၎င်းကို ဖမ်းဆီးရမိရေး ဆောင်ရွက်ခဲ့ရာ အောက်တိုဘာ ၁ ရက် မွန်းလွဲပိုင်းတွင် စမ်းချောင်းမြို့နယ် ပြည်ဂါးဒင်း အိမ်ရာဝင်ပေါက်အနီးတွင် မာစီဒီး အမျိုးအစားယာဉ်နှင့်အတူ ဖမ်းဆီးရမိခဲ့ပြီး လှိုင်သာယာမြို့နယ်ရှိ နေအိမ်အား တာဝန်ရှိသူများမှ ဆက်လက် ဝင်ရောက်ရှာဖွေရာ နေအိမ်အခန်းအတွင်းမှ S&B 7.65 Br 13 MM (.32 Auto) ကျည်အတောင့် ၁၀၀ အား ထပ်မံသိမ်းဆည်း ရမိခဲ့ကြောင်း သိရသည်။
၎င်းအား လှိုင်သာယာမြို့မရဲစခန်းက (ပ) ၃၆၉၁/၂၀၁၈၊ လက်နက် ဥပဒေပုဒ်မ ၁၉(စ)ဖြင့် ထပ်မံအမှုဖွင့်ပြီး အသေးစိတ်ကို ဆက်လက် စစ်ဆေးခဲ့ကြောင်း သိရသည်။
ဇော်ဇော်ထက်လူအား စစ်ဆေးရာ ၁၉၉၃ ခုနှစ်တွင် White Scorpion ကုမ္ပဏီ၏ ဂိုဏ်းအဖွဲ့တွင် အလုပ်လုပ်ကိုင်ခဲ့မှုကြောင့် ၂၀၀၁ ခုနှစ် သြဂုတ်လခန့်တွင် တပ်မတော်က ဖမ်းဆီးအရေးယူခဲ့ရာ အရေးပေါ်စီမံမှု အက်ဥပဒေ ၅( ဃ )/၆ဖြင်အရေးယူခံရပြီး စစ်ခုံရုံးဖြင့် စစ်ဆေး၍ ထောင်ဒဏ် ၁၂ နှစ် ကျခံခဲ့ရပြီး ၂၀၁၂ ခုနှစ် ဇွန်လခန့်တွင် လွတ်ငြိမ်းချမ်းသာခွင့်ဖြင့် အင်းစိန်ထောင်မှ ပြန်လည် လွတ်မြောက်လာခဲ့ကြောင်း သိရသည်။
ထောင်မှ လွတ်မြောက်လာပြီးနောက် ေဇာ်ဇော်ထက်လူမှာ ကားကုမ္ပဏီတစ်ခု၌ လုပ်ကိုင်ခဲ့ပြီး နိုင်ငံခြားမှ မော်တော်ယာဉ်သွင်းခြင်းနှင့် ယာဉ်ဆက်စပ် ပစ္စည်းများအား မြဝတီမှတစ်ဆင့် တင်သွင်းခြင်းများ လုပ်ကိုင်ခဲ့ကြောင်း သိရသည်။
ယင်းသို့ လုပ်ကိုင်ခဲ့ပြီး မြောက်ဒဂုံမြို့နယ်နေ အစ်မဝမ်းကွဲတော်စပ်သူ ခင်ပွန်းဖြစ်သည့် ဗိုလ်ကြီး ညီညီဇော်ဆိုသူနှင့် ရင်းနှီးခဲ့ပြီး မိမိမှာ ကားပစ္စည်း တင်သွင်းခြင်း၊ လိုင်စင်မဲ့ မော်တော်ယာဉ်များ တင်သွင်းခြင်းတို့ကို လုပ်ကိုင်နေသည်ဟု ပြောဆိုခဲ့ကြောင်း၊ နောက်ပိုင်းတွင် ဗိုလ်ကြီး ညီညီဇော်ဆိုသူက မြဝတီမှ မူဆယ်သို့ တပ်ပြောင်းရမည်ဖြစ်ကာ ငွေကြေး လိုအပ်သဖြင့် ကားပစ္စည်းများကို အခကြေးငွေယူ၍ သယ်ပေးလိုသည်ဟု ပြောဆိုခဲ့ကြောင်း သိရသည်။
ယင်းနောက် ဇော်ဇော်ထက်လူမှာ မဲဆောက်မြို့မှ လိုင်စင်မဲ့ မော်တော်ယာဉ်များ ဝယ်ယူ၍ လိုင်စင်မဲ့ယာဉ်အဖြစ်သော် လည်းကောင်း၊ ကားများအား ဖျက်၍ ကားပစ္စည်းအနေဖြင့် လည်းကောင်း ရန်ကုန်မြို့သို့ တင်သွင်းမှုများ လုပ်ကိုင်ခဲ့ပြီး ပို့ဆောင်ရာတွင် အဆင်ပြေစွာ ဆောက်ရွက်ပေးနိုင်သည့် မဲဆောက်မြို့နေ ကိုတိဆိုသူနှင့် ရင်းနှီးခဲ့ကြောင်း စစ်ဆေးချက်အရ သိရသည်။
၂၀၁၇ ခုနှစ် ဧပြီလတွင် မူဆယ်မှ လိုင်စင်မဲ့ကား ရောင်းဝယ်လုပ်သူတစ်ဦး၏ မိတ်ဆက်ပေးမှုကြောင့် ကောင်းခါး ပြည်သူ့စစ်အဖွဲ့မှ အိုက်ရန် (၂၈ နှစ်)ဆိုသူနှင့် ခင်မင်ရင်းနှီးခဲ့ကြောင်း၊ အိုက်ရန်၏ မိတ်ဆက်ပေးမှုကြောင့် လုံထန်ပြည်သူ့စစ်အဖွဲ့ စောဝေ ဆိုသူနှင့် ထပ်မံခင်မင်ခဲ့ပြီး ၎င်းတို့တွင် ကျည်ဆန်အခက်အခဲများ ရှိနေသဖြင့် ၉ မမ ကျည်ဆန်များ ဝယ်ယူလိုသည်ဟု ပြောပြခဲ့ကြောင်း သိရသည်။
ယင်းနောက် ဇော်ဇော်ထက်လူမှာ မူဆယ်မြို့မှ ပြန်လာပြီးနောက် ၉ မမ ကျည်များရရှိရန် မြဝတီမှ ကိုတိအား ဆက်သွယ်ခဲ့ရာ ကိုတိက ကျည်ဆန်များ ရမည်ဟုပြောဆိုခဲ့ပြီးနောက်၂၀၁၈ ခုနှစ် ဖေဖော်၀ါရီလတွင် ဇော်ဇော်ထက်လူမှာ ကိုတိထံမှ ၉မမ ကျည်ဆံအတောင့် ၂၀၀၀ ကို ကျပ် ၄၄၀၀၀၀၀ ဖြင့် ဝယ်ယူခဲ့ပြီး ရန်ကုန်မြို့ ၉ မိုင်ရှိ ဆိုင်တစ်ဆိုင်တွင် ကိုတိ၏ စေလွှတ်သော သူတစ်ယောက်မှတစ်ဆင့် ကျည်ဆန်များအား ရရှိခဲ့ကြောင်း သိရသည်။
ဝယ်ယူထားသော ကျည်ဆန်များအား မူဆယ်မြို့သို့ ပို့ဆောင်နိုင်ရန်အတွက် ယောက်ဖ တော်စပ်သည့် ဗိုလ်ကြီး ညီညီဇော် ဆိုသူနှင့် တိုင်ပင်ခဲ့ရာ မူဆယ်မြို့သို့ အခကြေးငွေဖြင့် သယ်ပေးမည်ဟု ပြောသဖြင့် ချိန်းဆို၍ ၎င်းထံသို့ ကျည်ဆန်များအား ယင်းဆိုင်တွင်ပင် လွှဲပြောင်းပေးခဲ့ကာ ယင်းနေ့တွင်ပင် ကားဖြင့် သွားပို့မည်ဟု ပြောဆိုခဲ့ကြောင်း စစ်ဆေးချက်အရ သိရသည်။
ယင်းနောက် ငါးရက်ခန့်အကြာတွင် ယောက်ဖ တော်စပ်သည့် ဗိုလ်ကြီး ညီညီဇော်ဆိုသူက ပစ္စည်းများပေးပို့ပြီး ဖြစ်ကြောင်း ဖုန်းဖြင့် ဆက်သွယ်ခဲ့ပြောကြားခဲ့ပြီးနောက် ဇော်ဇော်ထက်လူက ပို့ဆောင်ခအဖြစ် ကျပ် ၁၈ သိန်းအား ပေးခဲ့ပြီး ပြည်သူ့စစ်အဖွဲ့ထံမှ ကျည်ဆန်ဝယ်ယူငွေ ကျပ်သိန်း ၁၀၀ အား ရရှိခဲ့ကြောင်း သိရသည်။
“ ပထမ ၉ မမ ကျည်ဆန်တွေ ရောင်းစားတာပေါ့။ စစ်ချက်အရတော့ အဲဒါအပြင် ဇော်ဇော်ထက်လူက ဒီနှစ် သြဂုတ်လမှာ မြဝတီကို ကားဝယ်ဖို့ သွားတယ်လို့ သိရတယ်။ အဲဒီလိုသွားတော့ ကိုတိ ဆိုနဲ့သူနဲ့ တွေ့တာပေါ့။ တွေ့ရင်းနဲ့ ကိုတိဆီမှာရှိတဲ့ ၇ ဒသမ ၆၅ ကျည်ဆန် အတောင့် ၁၀၀ ကို ၂၂၀၀၀၀ နဲ့ ဝယ်ခဲ့တယ်လို့ သိရတယ်။ အဲဒီကျည်ဆန်တွေက လှိုင်သာယာက သူ့အိမ်မှာ သိမ်းဆည်းရမိတဲ့ ကျည်ဆန်တွေပေါ့” ဟု မြန်မာနိုင်ငံ ရဲတပ်ဖွဲ့က အမည်မဖော်လိုသူ အဆင့်မြင့် ရဲအရာရှိတစ်ဦးက ပြောကြားသည်။
ဆက်လက်၍ ၎င်းက “လှည်းကူးက ဖြစ်စဉ်က ကျည်ဆန်တွေပေါ့။ အဲဒီကျည်ဆန်တွေကို အရင်လ (စက်တင်ဘာလ) ပထမအပတ်က မြဝတီက ကိုတိဆီကနေ တစ်တောင့်ကို ငွေကျပ် ၁၀၁၀ နဲ့ရောင်းမယ်ဆိုပြီး ဖုန်းနဲ့ ဆက်သွယ်လာတာပေါ့။ အဲဒီလို ဆက်သွယ်တော့ ဇော်ဇော်ထက်လူက ပြည်သူ့စစ်နှစ်ဖွဲ့ဆီ ဆက်သွယ်တယ်။ ပြီးတော့ သူတို့ဆီ ကိုယ်တိုင်သွားပြီး ကြိုတင်ငွေ ၈ရသိန်း ကို ယူခဲ့တယ်။ ပြီးတော့ မူဆယ်က ပြန်လာပြီး တစ်ပတ်အကြာမှာ မြဝတီကိုသွားတယ်။ ကိုတိဆီက M ၁၆ ကျည် ၉၅၀၀ ကျော်အတွက် ငွေကျပ် ၉၆ သိန်းနီးပါး ပေးတယ်လို့ သိရတယ်။ ဒါက ဇော်ဇော်ထက်လူက ထွက်ဆိုချက် ဖြစ်တယ်။ မြဝတီ မူဆယ်က စစ်ကြောရေးလမ်းကြောင်း ကြပ်တော့ ရန်ကုန်ကို အရင်သယ်ပြီး မူဆယ်ကို သယ်တဲ့ သဘောပါ”ဟု ပြောကြားသည်။
ကျပ် ၉၆ သိန်းခန့် ပေးချေပြီးနောက် ယောက်ဖ တော်စပ်သည့် ဗိုလ်ကြီး ညီညီဇော်ဆိုသူထံ ကိုတိ ဖုန်းနံပါတ်ပေးကာ သယ်ယူပို့ဆောင်ရေးအတွက် ဗိုလ်ကြီး ညီညီဇော် ဆိုသူနှင့် ကိုတိတို့ ဆက်သွယ်ရေး အဆင်ပြေစေရန် ဆောင်ရွက်ပေးခဲ့ပြီးနောက် ဗိုလ်ကြီး ညီညိီဇော် ဆိုသူထံသို့ ပို့ဆောင်ရေး အခကြေးငွေအဖြစ် ကျပ် ၈၀၀၀၀၀ အား ပေးထားကြောင်း သိရပြီး ၂၀၁၈ ခုနှစ် အောက်တိုဘာ ၂၉ ရက်တွင် ပို့ဆောင်ရေး လမ်းစရိတ်အဖြစ် ကျပ် ၃၀၀၀၀၀ ကို ထပ်မံပေးပို့ခဲ့ကြောင်း စစ်ဆေးချက်အရ သိရသည်။
ယင်းသို့ ပေးအပ်ပြီးနောက် ဗိုလ်ကြီး ညီညီဇော်က လှည်းကူးရှိ ကားလက်မှတ် ရောင်းဝယ်ရေးဆိုင် တစ်ဆိုင်မှတစ်ဆင့် မူဆယ်သို့ ပို့ဆောင်ရန် စီစဉ်ဆောင်ရွက်စဉ် တပ်မတော်နှင့် ရဲတပ်ဖွဲ့မှ အဆိုပါ ကျည်ဆန်များအား သိမ်းဆည်းရမိကြောင်း သိရပြီး လက်ရှိတွင် ကိုတိအား ဖမ်းဆီးရမိရန် တပ်မတော်နှင့် ရဲတပ်ဖွဲ့မှ ပူးပေါင်းဆောင်ရွက်နေကြောင်း သိရသည်။