ရန်ကုန်လျှပ်စစ်ဓာတ်အားပေးကော်ပိုရေးရှင်းမှ သုံးစွဲရန်မလိုအပ်တော့သည့် လုပ်ငန်း ၁၉ ခုအတွက် ကျပ်သန်းပေါင်း ၁၄၀၀ ကျော် တင်ပြ တောင်းခံထားကြောင်း ကျောက်တံတားမြို့နယ် မဲဆန္ဒနယ်အမှတ် (၁) မှ တိုင်းဒေသကြီး လွှတ်တော်ကိုယ်စားလှယ် ဒေါ်ကြည်ပြာမှ ၂၀၁၈-၂၀၁၉ ဘဏ္ဍာရေးနှစ် ရန်ကုန်တိုင်းဒေသကြီး၏ ဘဏ္ဍာငွေ အရအသုံးဆိုင်ရာ ဥပဒေကြမ်းနှင့် ပတ်သက်ပြီး ဆွေးနွေးရာတွင် ပြောကြားခဲ့သည်။
“ရန်ကုန်လျှပ်စစ်ဓာတ်အားပေးကော်ပိုရေးရှင်းက ကိစ္စမျိုးပါ၊ သုံးစွဲရန် မလိုတော့တဲ့ လုပ်ငန်း ၁၉ ခု အတွက် သန်း ၁၄၀၀ ကျော်၊ တွက်ချက်မှု မှားယွင်းလို့ ပိုလျှံငွေ သန်း ၂၂၀၀ ကျော်ဆိုတဲ့ ကိစ္စမျိုးတွေက သေချာ စိစစ်နိုင်မယ်ဆိုရင် ဒီလိုမျိုးတွေ မဖြစ်ပဲနဲ့ ဘတ်ဂျက်လည်း ရှုပ်သွားမယ့် အနေအထားမရှိပါဘူး။ စည်ပင်မှာလည်း ဒီအတိုင်းပါပဲ။ သတ်မှတ်နှုန်းထားတွေ အများကြီး ပိုတွက်ထားတယ်ဆိုတဲ့ ဌာနတွေ ပါနေပါတယ်”ဟု ဒေါ်ကြည်ပြာက ပြောကြားသည်။
ထို့ပြင် ကမာရွတ်မြို့နယ် EO ရုံးနှင့် ကားပါကင် တည်ဆောက်ခြင်း လုပ်ငန်းအတွက် ကျပ်သန်း ၂၀၀၀ အသုံးပြုထားကြောင်း၊ စည်ပင်သာယာ အုပ်ချုပ်ရေးမှူးရုံး တစ်ရုံး တည်ဆောက်ရန် ယခုကဲ့သို့ ငွေကြေးပမာဏ အသုံးပြုသင့်ပါသလား ဟု ဒေါ်ကြည်ပြာက ပြောကြားသည်။
“ဘတ်ဂျက်တွေကို ဆွေးနွေးဝေဖန် ထောက်ပြ၊ အကြံပြုတဲ့အခါ သက်ဆိုင်ရာ ဝန်ကြီးတွေ ရှိစေချင်ပါတယ်။ ဘာကြောင့်လဲ ဆိုတော့ ကိုယ်စားလှယ်တွေက အကျိုး၊အကြောင်း ထောက်ပြဆွေးနွေးတာပဲ လုပ်နိုင်ပါတယ်။ တကယ် သက်ဆိုင်ရာ ဌာနတွေက ဘတ်ဂျက်တွေ တင်လာတဲ့အခါ တာဝန်ခံ စီစစ်ရတာ ဝန်ကြီးတွေပါ၊ ဒါကြောင့် ဝန်ကြီးတွေအနေနဲ့ လက်အောက်က ဌာနတွေ တင်သွင်းတဲ့ ဘတ်ဂျက်တွေ တကယ်ဖြစ်သင့် မဖြစ်သင့်၊ ဘတ်ဂျက်တွေ ဆွေးနွေးတဲ့အခါ သက်ဆိုင်ရာ ဝန်ကြီးတွေပါရင် ပိုပြီး အဆင်ပြေပါလိမ့်မယ်” ဟု ဒေါ်ကြည်ပြာက ပြောကြားသည်။
၂၀၁၈-၂၀၁၉ ဘဏ္ဍာရေးနှစ် ရန်ကုန်တိုင်းဒေသကြီး၏ ဘဏ္ဍာငွေ အရအသုံးဆိုင်ရာ ဥပဒေကြမ်းနှင့် ပတ်သက်ပြီး ပြည်သူ့ငွေစာရင်း အစီရင်ခံစာတွင် လျှပ်စစ်နှင့် စွမ်းအင်ဝန်ကြီးဌာန၊ ရန်ကုန် လျှပ်စစ်ဓာတ်အားပေးရေးကော်ပိုရေးရှင်းမှ ဘဏ္ဍာငွေ တောင်းခံထားချက်များအနက် ဌာနမှ ဆောင်ရွက်ပြီးသော လုပ်ငန်းလေးခုအတွက် ကျပ်ငွေ ၃၄၁ ဒသမ ၈၂၉ သန်း၊ National Electrification Program (1st Plam) မှ သုံးစွဲသည့် လုပ်ငန်း ခြောက်ခုအတွက် ကျပ် ၄၉၆ ဒသမ ၉၅၀ သန်း၊ တိုင်းဒေသကြီး အစိုးရ၏ ခြောက်လဘတ်ဂျက်မှ သုံးစွဲပြီး လုပ်ငန်း ကိုးခုအတွက် ကျပ် ၆၁၃ ဒသမ ၉၆၃ သန်း၊ စုစုပေါင်း ဘဏ္ဍာငွေသုံးစွဲရန် မလိုအပ်တော့သည့် လုပ်ငန်း ၁၉ ခုအတွက် ကျပ် စုစုပေါင်း ၁၄၅၄ ဒသမ ၄၅၄ သန်း ရှိကြောင်း ဖော်ပြထားသည်။
ထို့ပြင် ရန်ကုန်လျှပ်စစ်ဓာတ်အားပေးရေးကော်ပိုရေးရှင်းမှ စည်ပင်ပြင်ပ မြို့နယ်များတွင် ဓာတ်အားခွဲရုံများ တည်ဆောက်ခြင်း၊ ကောင်းကင်ကြိုးများ သွယ်တန်းခြင်း၊ ဓာတ်တိုင်များ လဲလှယ်ခြင်း၊ လမ်းမီးများ ထွန်းညှိခြင်း၊ ထရန်စဖော်မာများ တည်ဆောက်ခြင်း၊ ၀ိုင်ယာကြိုးများ လဲလှယ်ခြင်း၊ ရှုပ်ထွေး ဆားဗစ်ကြိုးများ လဲလှယ်ခြင်း စသည်တို့ကို ဆောင်ရွက်သော လုပ်ငန်းများကို အသေးစိတ် တွက်ချက်မှုများ တောင်းခံပြီး လျှပ်စစ်ပညာရှင် အင်ဂျင်နီယာ၏ အကူအညီဖြင့် စိစစ်ခဲ့ရာ တွက်ချက်မှု မှားယွင်းခြင်းကြောင့် စုစုပေါင်းလုပ်ငန်း ၄၇ ခု တွင် ပိုလျှံဘဏ္ဍာငွေ ၂၂၁၃ ဒသမ ၃၂၆ သန်း တွေ့ရှိခဲ့ကြောင်း အစီရင်ခံစာတွင် ဖော်ပြထားသည်။
