ပန်းချီလှထွန်း၏ ဆုရ ပန်းချီကားများအား တွေ့ရစဉ်
အမေရိကန်နိုင်ငံရှိ ထိပ်တန်းပန်းချီပြခန်းများနှင့် ပြတိုက်ပေါင်း ၂၅ ခုမှ ပန်းချီဆိုင်ရာ ကျွမ်းကျင်အကဲဖြတ်သူများ ရွေးချယ်သည့် 2017 American Art Awards ၏ “Landscapes With Life” ခေါင်းစဉ်အောက်တွင် မြန်မာနိုင်ငံမှ ပန်းချီလှထွန်းက ဆုများ ရရှိခဲ့ကြောင်း သိရသည်။
2017 American Art Awards ဆု၏ အောက်တွင် အနုပညာဆိုင်ရာဆုများကို ခေါင်းစဉ်အမျိုးမျိုးခွဲခြားကာ ပေးအပ်ခြင်းဖြစ်ပြီး ပန်းချီလှထွန်းရရှိသည့်ဆုမှာ “Landscapes With Life”ခေါင်းစဉ်အောက်မှ ပထမဆု၊ စတုတ္ထဆုနှင့် ပဉ္စမဆုတို့ကို ရရှိခဲ့ ခြင်းဖြစ်ကြောင်း သိရသည်။ 2017 American Art Awards “Landscapes With Life” ခေါင်းစဉ်အောက်၌ ဆုပေါင်း ခြောက်ဆု ပေးအပ်ခဲ့ကာ မြန်မာနိုင်ငံမှ ပန်းချီလှထွန်းက Going To The Field ပန်းချီကားဖြင့် ပထမဆု၊ Custom Of The Village ပန်းချီကားဖြင့် စတုတ္ထဆုနှင့် Summer Dry Zone ပန်းချီကားဖြင့် ပဉ္စမဆုတို့ကို ရရှိခဲ့ကာ ကျန်ဆုများကို သြစတြေးလျ၊ ကနေဒါ၊ တရုတ်နှင့် အမေရိကန်နိုင်ငံတို့မှ ပန်းချီဆရာများက ရရှိခဲ့ကြောင်း သိရသည်။
“ဒီပွဲအတွက် ဝင်ပြိုင်ဖို့ ဖိတ်ကြားတာကြောင့် ပို့ဖြစ်လိုက်တာပါ။ ဒီပွဲအတွက် ပန်းချီကား စုစုပေါင်း သုံးကားပို့ဖြစ်လိုက်တယ်။ သုံးကားလုံးဆု ရရှိပါတယ်။ အဲဒီအတွက်လည်း ဝမ်းသာပါတယ်။ ကျွန်တော်က ပိုစတာတွေ၊ သရုပ်ဖော်ပန်းချီတွေလည်း ရေးပါတယ်။ ဒါပေမဲ့ အခုနောက်ပိုင်း မြန်မာ့ကျေးလက်ပုံရိပ်လေးတွေကို ပိုပြီးရေးဖြစ်လာတယ်။ ဒီပို့လိုက်တဲ့ ပန်းချီကား သုံးကားမှာဆိုရင် အဓိကပါဝင်တာက နွားလှည်းတွေပဲ။ ကျေးလက်လို့ပြောလိုက်ရင် နွားလှည်းဆိုတာ မပါမဖြစ် သင်္ကေတတစ်ခုပဲ။ ဒါပေမဲ့ အခုနောက်ပိုင်းမှာ ကျေးလက်တွေက နွားလှည်းအစား ထော်လာဂျီတွေ၊ စက်ပစ္စည်းတွေ သုံးလာကြတော့ နွားလှည်းပုံရိပ်က တဖြည်းဖြည်းပျောက်လာတယ်။ အဲဒါကို စိတ်ထဲကထိပြီး မြန်မာ့ကျေးလက်ပုံရိပ်တွေမှာ နွားလှည်းတွေကို အများဆုံးထည့်ပြီး ရေးဖြစ်တယ်။ အခုနိုင်ငံတကာ ပြိုင်ပွဲမှာ မြန်မာ့ပုံရိပ်ကို ပြခွင့်ရတဲ့အတွက် ကျေနပ်ပါတယ်။ နိုင်ငံတကာကလည်း စိတ်ဝင်စားမှုရှိကြပါတယ်” ဟု ပန်းချီလှထွန်းက ပြောကြားသည်။
American Art Awards ဆုအတွက် ရေဆေး၊ ဆီဆေး၊ အခရိုင်းလစ်၊ ပုံတူ၊ မော်ဒန်၊ သရုပ်မှန်၊ ခေတ်ပြိုင်၊ ဒီဇိုင်းစသည့် အနုပညာ ဖန်တီးမှုခေါင်းစဉ်ပေါင်း ၅၀ အောက်တွင် ပြုလုပ်ခြင်းဖြစ်ကြောင်းသိရသည်။ အဆိုပါ ပြိုင်ပွဲသို့ နိုင်ငံပေါင်း ၅၆ နိုင်ငံမှ ပန်းချီ ဒီဇိုင်းအနုပညာရှင်များစွာ၏ အနုပညာ လက်ရာများ ဝင်ရောက်ယှဉ်ပြိုင်ခဲ့ကြောင်း သိရသည်။
