ရခိုင်ပြည်နယ်တွင် အကြမ်းဖက်မှုများ အမြန်ဆုံး အဆုံးသတ်ရန် လိုလားကြောင်း EU ၏ ထုတ်ပြန်မှုအပေါ် လက်ရှိအချိန်တွင် အကြမ်းဖက်မှုများ ရှိသည်ဟု မကြားကြောင်းနှင့် မဖြစ်ပေါ်လာရန် ထိန်းသိမ်းသွားမည်ဟု နိုင်ငံတော်၏ အတိုင်ပင်ခံပုဂ္ဂိုလ် ပြောကြား

ဥရောပသမဂ္ဂက ရခိုင်ပြည်နယ်တွင် အကြမ်းဖက်မှုများ အမြန်ဆုံး အဆုံးသတ်ရန် လိုလားကြောင်း သတင်းထုတ်ပြန်မှုအပေါ် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က လက်ရှိအချိန်တွင် အကြမ်းဖက်မှုများ ရှိသည်ဟု မကြားကြောင်းနှင့် မဖြစ်ပေါ်လာရန် ထိန်းသိမ်း သွားမည်ဟု ပြောကြားခဲ့သည်။

နိုဝင်ဘာ ၂၁ ရက်နေ့က ပြုလုပ်သည့် ၁၃ ကြိမ်မြောက် အေဆမ်နိုင်ငံခြားရေးဝန်ကြီးများ အစည်းအဝေး သတင်းစာရှင်းလင်းပွဲတွင် သတင်းထောက်တစ်ဦးက ဥရောပသမဂ္ဂ၏ နိုဝင်ဘာ ၂၀ ရက်စွဲဖြင့် သတင်း ထုတ်ပြန်မှုနှင့် ပတ်သက်ပြီး မေးမြန်းမှုကို ဒေါ်အောင်ဆန်းစုကြည်က ပြန်လည်ဖြေကြားခဲ့ခြင်း ဖြစ်သည်။

“မြန်မာဘက်ကတော့ အကြမ်းဖက်မှုတွေ မရှိအောင် ကျွန်မတို့အားလုံးက ထိန်းပေးထားရမှာပေ့ါ။ အခုလောလောဆယ်မှာတော့ အကြမ်းဖက်မှုတွေ ရှိတယ်လို့ မကြားပါဘူး။ ဒါပေမဲ့လည်း မဖြစ်နိုင်ဘူးလို့လည်း ပြောလို့မရပါဘူး။ မဖြစ်နိုင်အောင် ထိန်းသိမ်းဖို့ ဆိုတာကတော့ နိုင်ငံတော်အစိုးရရဲ့ တာဝန်ဖြစ်ပါတယ်” ဟု ဒေါ်အောင်ဆန်းစုကြည်က ပြောကြားခဲ့သည်။

နိင်ငံခြားရေးနှင့် လုံခြုံရေးရာ မူဝါဒဆိုင်ရာ EU အဆင့်မြင့် ကိုယ်စားလှယ်နှင့် ဥရောပကော်မရှင်၏ ဒုတိယဥက္ကဋ္ဌ ဖြစ်သူ Federica Mogherini သည် နေပြည်တော်တွင် ကျင်းပသည့် ၁၃ ကြိမ်မြောက် အာရှ-ဥရောပ နိင်ငံခြားရေးဝန်ကြီးများ အစည်းအဝေး (ASEM) ကို ဥရောပ သံကိုယ်စားလှယ်အဖွဲ့အား ဦးဆောင်၍ တက်ရောက်ခဲ့ပြီး နိုဝင်ဘာ ၂၀ ရက်တွင် သတင်းထုတ်ပြန်မှု ပြုလုပ်ခဲ့သည်။

ယင်းသတင်း ထုတ်ပြန်မှုတွင် ရခိုင်ပြည်နယ်အတွင်း လူသားချင်း စာနာထောက်ထားမှုနှင့် လူ့အခွင့်အရေး အခြေအနေများသည် စိုးရိမ်စရာ အခြေအနေ ရှိနေဆဲဖြစ်ပြီး ဥရောပသမဂ္ဂအနေဖြင့် ရခိုင်ပြည်နယ်တွင် အကြမ်းဖက်မှုများ အမြန်ဆုံး အဆုံးသတ်ရန် လိုလားကြောင်း၊ လုံခြုံရေးတပ်ဖွဲ့ဝင်များ၏ ဥပဒေပြင်ပ လုပ်ဆောင်မှုများနှင့် အရပ်သားများအပေါ် ပြစ်မှုကျူးလွန်မှုများကို ဖော်ထုတ်ပေးရန် ထည့်သွင်းတောင်းဆိုခဲ့သည်။

ထို့ပြင် UN နှင့် အခြားနိုင်ငံတကာမှ ကူညီထောက်ပံ့ရေးအဖွဲ့အစည်းများက ရခိုင်ပြည်နယ်အတွင်း ထောက်ပံ့ကူညီမှုများ ပြလုပ်နိုင်ရန်နှင့် နေရပ်စွန့်ခွာ ထွက်ပြေးလာသူများအား ၎င်းတို့၏ မူလနေရပ်များဆီသို့ ဘေးကင်းလုံခြုံစွာ ပြန်နိုင်ရေးဆောင်ရွက်ပေးရန်လည်း ယင်းထုတ်ပြန်မှုတွင် တိုက်တွန်းထားသည်။

ဥရောပသမဂ္ဂ အဆင့်မြင့်ကိုယ်စားလှယ်၊ ဥရောပကော်မရှင်၏ ဒုဥက္ကဋ္ဌဖြစ်သူ Federica Mogherini ကလည်း အေဆမ် နိုင်ငံခြားရေးဝန်ကြီးများ အစည်းအဝေးဖွင့်ပွဲ အခမ်းအနားတွင် သတင်းထောက်များနှင့် တွေ့ဆုံရာ ဥရောပသမဂ္ဂ အီးယူ အနေဖြင့် ရခိုင်ပြည်နယ်မှ ထွက်ပြေးလာသည့် ဘင်္ဂါလီဒုက္ခသည်များအရေးနှင့် ပတ်သက်၍ ုမြန်မာနှင့် ဘင်္ဂလားဒေ့ရှ် နှစ်နိုင်ငံကြား ပူးပေါင်းလုပ်ဆောင်မှုများ အောင်မြင်ရန် ကူညီပံ့ပိုးပေးသွားမည်ဖြစ်ပြီး ဒုက္ခသည်များကို ပြန်လည်လက်ခံရန် မြန်မာနှင့် ဘင်္ဂလားဒေ့ရှ်တို့ နှစ်နိုင်ငံကြား နားလည်မှုစာချွန်လွှာ လက်မှတ်ရေးထိုး နိုင်ခဲ့ရန် ဒုက္ခသည် ပြဿနာများကို ဖြေရှင်းရန် အရေးကြီးသည့် ပထမအဆင့် လုပ်ငန်းစဉ်ဖြစ်ကြောင်း ပြောကြားခဲ့သည်။