အဂတိလိုက်စားမှု တိုက်ဖျက်ရေးကော်မရှင်အသစ်တွင် ဥက္ကဋ္ဌအဖြစ် ပြန်ကြားရေးဝန်ကြီးဟောင်း ဦးအောင်ကြည် အပါအဝင် အဖွဲ့ဝင် ၁၂ ဦးဖြင့် ဖွဲ့စည်းမည်ဖြစ်ကြောင်း ပြည်ထောင်စုအစိုးရ လွှတ်တော်သို့ တင်ပြ

အဂတိလိုက်စားမှု တိုက်ဖျက်ရေးကော်မရှင်အသစ်တွင် ဥက္ကဋ္ဌအဖြစ် ပြန်ကြားရေးဝန်ကြီးဟောင်း ဦးအောင်ကြည် အပါအဝင် အဖွဲ့ဝင် ၁၂ ဦးဖြင့် ဖွဲ့စည်းမည်ဖြစ်ကြောင်း နိုင်ငံတော်သမ္မတက ပြည်ထောင်စုလွှတ်တော်သို့ သဝဏ်လွှာပေးပို့ တင်ပြထားသည်။

ပြည်ထောင်စုအစိုးရအဖွဲ့ ဒုတိယသက်တမ်း ကာလတွင် အဂတိလိုက်စားမှု တိုက်ဖျက်ရေးကော်မရှင်အသစ်ကို ဖွဲ့စည်းခန့်အပ် တာဝန်ပေးနိုင်ရေးအတွက် အဂတိလိုက်စားမှု တိုက်ဖျက်ရေးဥပဒေ ပုဒ်မ (၇) ပုဒ်မခွဲ (က) ပါ ပြဋ္ဌာန်းချက်နှင့်အညီ ပြည်ထောင်စုလွှတ်တော်၏ သဘောတူညီမှု ရရှိယူပေးနိုင်ရန်အတွက် နိုင်ငံတော်သမ္မတထံမှ ပြည်ထောင်စုလွှတ်တော် နာယကထံသို့ ပေးပို့ထားသည့် သဝဏ်လွှာကို နာယက မန်းဝင်းခိုင်သန်းက လွှတ်တော်သို့ ဖတ်ကြားတင်ပြခဲ့သည်။

အဂတိလိုက်စားမှု တိုက်ဖျက်ရေးကော်မရှင်အသစ်တွင် တာဝန်ထမ်းဆောင်ရန်အတွက် နိုင်ငံတော်သမ္မတက ပြန်ကြားရေးဝန်ကြီးဌာန၊ ဝန်ကြီး (ငြိမ်း) ဦးအောင်ကြည်၊ ပြည်ထောင်စု စာရင်းစစ်ချုပ်ရုံး၊ ညွှန်ကြားရေးမှူး (ငြိမ်း) အဂတိလိုက်စားမှု တိုက်ဖျက်ရေးကော်မရှင်အဖွဲ့ဝင် ဦးစိုးတင့်၊ အထူးစုံစမ်းစစ်ဆေးရေးဦးစီးဌာန၊ ညွှန်ကြားရေးမှူး (ငြိမ်း) ဦးအောင်လွင်၊ ပြည်ထောင်စုရှေ့နေချုပ်ရုံး၊ ဒုတိယညွှန်ကြားရေးမှူးချုပ် (ငြိမ်း)၊ Notary Public တရားလွှတ်တော်ရှေ့နေ ဦးဟန်ညွန့် တို့ကို ရွေးချယ်ခဲ့သည်။

ဆက်လက်၍ ပြည်သူ့လွှတ်တော်ဥက္ကဋ္ဌက ကော်မရှင်တွင် တာဝန်ထမ်းဆောင်ရန်အတွက် နိုင်ငံခြားစီးပွားဆက်သွယ်ရေးဦးစီးဌာန၊ ညွှန်ကြားရေးမှူးချုပ် (ငြိမ်း)၊ အဂတိလိုက်စားမှု တိုက်ဖျက်ရေးကော်မရှင်အဖွဲ့ဝင် ဒေါ်မြတ်မြတ်စိုး၊ ပြည်ထောင်စုရှေ့နေချုပ်ရုံး၊ ညွှန်ကြားရေးမှူး (ငြိမ်း)၊ တရားလွှတ်တော်ရှေ့နေ ဦးအောင်သန်းမြင့်၊ ပြည်ထောင်စုရှေ့နေချုပ်ရုံး၊ ညွှန်ကြားရေးမှူး (ငြိမ်း)၊ တရားလွှတ်တော်ရှေ့နေ၊ ဥပဒေအတိုင်ပင်ခံ ဦးစန်းဝင်း၊ တရားလွှတ်တော်ရှေ့နေ ဦးခင် မောင်မြင့်တို့ကို ရွေးချယ်ခဲ့သည်။

ထို့အတူ အမျိုးသားလွှတ်တော်ဥက္ကဋ္ဌက ကော်မရှင်၌ တာဝန်ထမ်းဆောင်ရန်အတွက် တရားလွှတ်တော်ရှေ့နေ ဦးမျိုးမြင့်၊ ပြည်ထောင်စု စာရင်းစစ်ချုပ်ရုံး၊ ဒုတိယညွှန်ကြားရေးမှူးချုပ် (ငြိမ်း) ဒေါ်အေးအေးမူ၊ ရဲချုပ် (ငြိမ်း) ဦးဇော်ဝင်း၊ ပြည်ထောင်စုစာရင်းစစ်ချုပ်ရုံး၊ ညွှန်ကြားရေးမှူး (ငြိမ်း) ဒေါ်လဲ့လဲ့သွင်တို့ကို ရွေးချယ်ခဲ့သည်။

အဂတိလိုက်စားမှု တိုက်ဖျက်ရေးကော်မရှင်အသစ်တွင် ဥက္ကဋ္ဌအဖြစ် ပြန်ကြားရေးဝန်ကြီးဟောင်း ဦးအောင်ကြည်၊ အတွင်းရေးမှူးအဖြစ် ဦးစန်းဝင်းတို့က တာဝန်ယူဆောင်ရွက်ရန် လျာထားကြောင်း လွှတ်တော်နာယက မန်းဝင်းခိုင်သန်းက ရှင်းလင်းတင်ပြသည်။

ယခုဖွဲ့စည်းမည့် အဂတိလိုက်စားမှု တိုက်ဖျက်ရေး ကော်မရှင်အသစ်နှင့် ပတ်သက်၍ သက်ဆိုင်ရာ အရည်အချင်းနှင့် မပြည့်စုံကြောင်း သက်သေအထင်အရှားပြ၍ ကန့်ကွက်လိုသည့် လွှတ်တော်ကိုယ်စားလှယ်များ ရှိပါက အမည်စာရင်း တင်သွင်းနိုင်ကြောင်း လွှတ်တော်နာယက မန်းဝင်းခိုင်သန်းက ကြေညာသည်။

ပြီးခဲ့သော သမ္မတဟောင်း ဦးသိန်းစိန် အစိုးရလက်ထက်တွင် အဂတိလိုက်စားမှု တိုက်ဖျက်ရေးဥပဒေပါ ပြဋ္ဌာန်းချက်များအရ လာဘ်ပေးလာဘ်ယူမှု ပပျောက်ရေးကော်မရှင်ကို ၂၀၁၄ ခုနှစ် ဖေဖော်ဝါရီ ၂၅ ရက်တွင် စစ်မှုထမ်း (အငြိမ်းစား) ဦးမြဝင်း ဥက္ကဋ္ဌအဖြစ် တာဝန်ယူပြီး အဖွဲ့ဝင် ၁၅ ဦးဖြင့် ဖွဲ့စည်းခဲ့သည်။

ထို့နောက် အဆိုပါ လာဘ်ပေးလာဘ်ယူမှု ပပျောက်ရေးကော်မရှင်ကို အဂတိလိုက်စားမှု တိုက်ဖျက်ရေးကော်မရှင်အဖြစ် အမည်ပြောင်းလဲ ဖွဲ့စည်းခဲ့သည်။