(၁၃) ကြိမ်မြောက် အေဆမ်နိုင်ငံခြားရေးဝန်ကြီးများ အစည်းအဝေး၌ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့်အတူ နိုင်ငံခြားရေးဝန်ကြီးဌာန ဒုတိယဝန်ကြီး ဦးကျော်တင်နှင့် အမျိုးသားလုံခြုံရေးဆိုင်ရာအကြံပေးပုဂ္ဂိုလ် ဦးသောင်းထွန်းတို့ကို တွေ့ရစဉ်
ပြည်ထောင်စုအစိုးရအဖွဲ့ရုံးဝန်ကြီးဌာနနှင့် အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌာနတို့ကို တိုးချဲ့ဖွဲ့စည်းမည်ဖြစ်ပြီး အမျိုးသားလုံခြုံရေးဆိုင်ရာ အကြံပေးပုဂ္ဂိုလ် ဦးသောင်းထွန်းနှင့် နိုင်ငံခြားရေးဝန်ကြီးဌာန ဒုတိယဝန်ကြီး ဦးကျော်တင်တို့အား ပြည်ထောင်စုဝန်ကြီးများအဖြစ် ခန့်အပ်မည်ဖြစ်ကြောင်း နိုဝင်ဘာ ၂၀ ရက်က ပြည်ထောင်စုလွှတ်တော်သို့ တင်ပြသည်။
ပြည်ထောင်စုဝန်ကြီးဌာနနှစ်ခု တိုးချဲ့ ဖွဲ့စည်းခြင်းနှင့် ပတ်သက်၍ နိုင်ငံတော်သမ္မတကိုယ်စား တာဝန်ပေးအပ်သည့် ပြည်ထောင်စု ရှေ့နေချုပ် ဦးထွန်းထွန်းဦးက လွှတ်တော်သို့ ရှင်းလင်းတင်ပြသည်။
ပြည်ထောင်စုအစိုးရအဖွဲ့ရုံးဝန်ကြီးဌာန ဖွဲ့စည်း ဆောင်ရွက်ရာတွင် ပြည်ထောင်စုအစိုးရအဖွဲ့ရုံး၏ လက်ရှိ ဝန်ထမ်းဖွဲ့စည်းပုံ အင်အားဖြင့်ပင် ဆောင်ရွက်မည်ဖြစ်ပြီး နိုင်ငံတော်၏ ဘဏ္ဍာငွေ ပိုမိုကုန်ကျမည် မဟုတ်ပါကြောင်း ဦးထွန်းထွန်းဦးက ပြောကြားသည်။
“ဖြည့်စွက် ဖွဲ့စည်းလိုတဲ့ ဝန်ကြီးဌာနတစ်ခုမှာ ပြည်ထောင်စုအစိုးရအဖွဲ့ရုံး ဝန်ကြီးဌာန ဖြစ်ပါတယ်။ ပြည်ထောင်စု အစိုးရအဖွဲ့၏ လုပ်ငန်းတာဝန်များနှင့် စပ်လျဉ်း၍ ပြည်ထောင်စုအစိုးရအဖွဲ့ရုံး ညွှန်ကြားရေးမှူးချုပ်ဖြစ်သူ ပြည်ထောင်စုအစိုးရအဖွဲ့ အတွင်းရေးမှူးက နိုင်ငံတော်သမ္မတထံ တင်ပြ၍ ဆောင်ရွက်လျက်ရှိပါတယ်။ ပြည်ထောင်စုအစိုးရအဖွဲ့ အနေဖြင့် ပြည်ထောင်စု၏ အုပ်ချုပ်မှုဆိုင်ရာကိစ္စများ၊ စီမံကိန်းနှင့် ဘဏ္ဍာရေးဆိုင်ရာကိစ္စရပ်များ၊ စီးပွားရေးဆိုင်ရာ ကိစ္စရပ်များ၊ ဥပဒေကြမ်း တင်သွင်းခြင်းဆိုင်ရာ ကိစ္စရပ်များနှင့် တခြားကိစ္စရပ်များ အပါအဝင် များပြားသည့် လုပ်ငန်းတာဝန်များကို ဆောင်ရွက်လျက် ရှိပါတယ်။ ယင်းကဲ့သို့ ဆောင်ရွက်ရာတွင် နိုင်ငံတော်သမ္မတအား တာဝန်ခံမည့် ပြည်ထောင်စုအစိုးရအဖွဲ့ဝင် ပြည်ထောင်စုဝန်ကြီး တစ်ဦးကို ခန့်အပ်၍ တာဝန်ယူ ဆောင်ရွက်စေမည်ဆိုပါက ပိုမိုထိရောက်စွာ အကောင်အထည်ဖော် ဆောင်ရွက်နိုင်မည်ဖြစ်သဖြင့် ယင်းဝန်ကြီးဌာနကို ထပ်မံဖြည့်ဆည်း ဖွဲ့စည်းလိုပါတယ်”ဟု ပြည်ထောင်စုရှေ့နေချုပ် ဦးထွန်းထွန်းဦးက ရှင်းလင်းတင်ပြသည်။
ထို့ပြင် အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာနနှင့် ပတ်သက်၍ “မြန်မာနိုင်ငံသည် နိုင်ငံတကာအရေး ကိစ္စများတွင် တက်ကြွစွာ ပါဝင်ဆောင်ရွက်လျက် ရှိပါတယ်။ ယင်းသို့ ဆောင်ရွက်ရာတွင် နိုင်ငံတကာ ဆက်ဆံရေးတွင် နိုင်ငံခြားရေးဝန်ကြီးဌာနနှင့်အတူ ပူးပေါင်းဆောင်ရွက်ရန်နှင့် နိုင်ငံတကာရေးရာ ကိစ္စရပ်များကို နိုင်ငံရေးရှုထောင့်အပြင် စီးပွားရေးရှုထောင့်မှလည်း ခြုံငုံသုံးသပ်ပြီး နိုင်ငံတော်သမ္မတအား တာဝန်ခံ ဆောင်ရွက်မည့် ဝန်ကြီးဌာနတစ်ခု လိုအပ်လာသည့်အတွက် ဤပြည်ထောင်စုဝန်ကြီးဌာနအသစ်ကို ဖွဲ့စည်းရခြင်း ဖြစ်ပါတယ်။ ဖော်ပြပါ ဝန်ကြီးဌာနကိုလည်း ဝန်ထမ်းများ ထပ်မံတိုးချဲ့ဖွဲ့စည်းလိုခြင်း မပြုဘဲ နိုင်ငံခြားရေးဝန်ကြီးဌာန၏ အပြည်ပြည်ဆိုင်ရာ အဖွဲ့အစည်းများနှင့် စီးပွားရေးဦးစီးဌာန၏ ဝန်ထမ်းများဖြင့် ဖွဲ့စည်းဆောင်ရွက်သွားမှာ ဖြစ်ပါတယ်။ နိုင်ငံတော်၏ အတိုင်ပင်ခံပုဂ္ဂိုလ်သည် နိုင်ငံခြားရေးဝန်ကြီးဌာန၏ လုပ်ငန်းတာဝန်များကို ထမ်းဆောင်လျက်ရှိရာ အချို့သော နိုင်ငံတကာ အစည်းအဝေးများတွင် နိုင်ငံခြားရေးဝန်ကြီးဌာန ပြည်ထောင်စုဝန်ကြီး တက်ရောက်ပြီး အချို့သောနိုင်ငံတကာ အဖွဲ့အစည်းများတွင် ယခုဖွဲ့စည်းမည့် အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးက တက်ရောက်မှာ ဖြစ်ပါတယ်။ အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာနကိုလည်း နိုင်ငံခြားရေးဝန်ကြီးဌာန အဆောက်အအုံတွင်ပင် ထားရှိမည်ဖြစ်ရာ ဝန်ကြီးဌာနနှစ်ခု နီးကပ်စွာ ပူးပေါင်း ဆောင်ရွက်နိုင်မှာ ဖြစ်ပါတယ်။ ယခုအခါတွင် နိုင်ငံခြားသံတမန်ရေးရာ ကိစ္စရပ်များကို နိုင်ငံခြားရေးဝန်ကြီးဌာနက ဆောင်ရွက်ပြီး နိုင်ငံတကာ အဖွဲ့အစည်းနှင့် ပတ်သက်သည့် ကိစ္စရပ်များကို စီမံကိန်းနှင့် ဘဏ္ဍာရေးဝန်ကြီးဌာနက ဆောင်ရွက်လျက် ရှိပါတယ်။ ယင်းနိုင်ငံတကာ အဖွဲ့အစည်းနှင့် ပတ်သက်သည့် ကိစ္စများကို ယခုဖွဲ့စည်းမည့် အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာနက ဆောင်ရွက်ခြင်းအားဖြင့် နိုင်ငံတကာဆက်ဆံရေးကို ပိုမိုအဆင်ပြေချောမွေ့စွာ ပူးပေါင်းဆောင်ရွက်သွားနိုင်မှာ ဖြစ်ပါတယ်” ဟု ဦးထွန်းထွန်းဦးက ဆက်လက်ရှင်းပြသည်။
ထို့အတူ နိုင်ငံတော်သမ္မတက ပြည်ထောင်စုအစိုးရအဖွဲ့ရုံး ဝန်ကြီးဌာနတွင် လက်ရှိ၌ အမျိုးသားလုံခြုံရေးဆိုင်ရာ အကြံပေးပုဂ္ဂိုလ်အဖြစ် တာဝန်ယူ ဆောင်ရွက်နေသည့် နိုင်ငံခြားရေးဝန်ကြီးဌာန သံအမတ်ကြီး (ငြိမ်း) ဦးသောင်းထွန်းကို ပြည်ထောင်စုဝန်ကြီးအဖြစ် ခန့်အပ်မည် ဖြစ်ကြောင်းနှင့် အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာနတွင် လက်ရှိ၌ နိုင်ငံခြားရေးဝန်ကြီးဌာန ဒုတိယဝန်ကြီးအဖြစ် တာဝန်ထမ်းဆောင်နေသည့် ဦကျော်တင်ကို ပြည်ထောင်စုဝန်ကြီးအဖြစ် ခန့်အပ်မည် ဖြစ်ကြောင်း ပြည်ထောင်စု လွှတ်တော်သို့ သဝဏ်လွှာပေးပို့ခဲ့သည်။
ထို့ပြင် ပြည်ထောင်စုလွှတ်တော် နာယက မန်းဝင်းခိုင်သန်းက ပြည်ထောင်စုဝန်ကြီး နှစ်ဦး ခန့်အပ် တာဝန်ပေးခြင်းနှင့် စပ်လျဉ်း၍ ပုံမှန်အားဖြင့် လွှတ်တော်အစည်းအဝေးတွင် ဝန်ကြီးဌာနများ ဖွဲ့စည်းမှုကို အတည်ပြုပြီးမှသာ လွှတ်တော်သို့ အမည်စာရင်း တင်သွင်းခြင်း၊ သဘောတူညီချက် ရယူခြင်းများ ဆောင်ရွက်လေ့ရှိကြောင်း၊ သို့သော် လက်ရှိ လွှတ်တော်အစည်းအဝေးများ ဆက်လက် ကျင်းပမည့်ကာလ လျာထားမှုအခြေအနေ နှင့် နိုင်ငံတော်သမ္မတ၏ တင်ပြမှုတို့အရ သက်ဆိုင်ရာ ဝန်ကြီးဌာနနှစ်ခု တိုးချဲ့ဖွဲ့စည်းခြင်းကို လွှတ်တော်က အတည်ပြုကြောင်း ဆုံးဖြတ်ပါက ၎င်းကိစ္စနှင့် တစ်ဆက်တည်း ဆောင်ရွက်သွားမှာ ဖြစ်ကြောင်း ကြေညာသည်။
ပြည်ထောင်စုဝန်ကြီးဌာန နှစ်ခု တိုးချဲ့ ဖွဲ့စည်းမည့်ကိစ္စနှင့် ပြည်ထောင်စုဝန်ကြီး နှစ်ဦး ခန့်အပ်ခြင်းကိစ္စတို့နှင့် စပ်လျဉ်းပြီး ဆွေးနွေးလိုသည့် ကိုယ်စားလှယ်များအနေဖြင့် နိုဝင်ဘာ ၂၂ ရက် နောက်ဆုံးထားကာ အမည်စာရင်း တင်သွင်းနိုင်ပြီး နိုဝင်ဘာ ၂၃ ရက်တွင် လွှတ်တော်၏ အဆုံးအဖြတ် ရယူသွားမည်ဖြစ်ကြောင်း လွှတ်တော်နာယကက ကြေညာသည်။
“နိုင်ငံရဲ့အခြေအနေအရလည်း ရှင်းပြသွားသလိုပဲ ဘာကြောင့် ဖွဲ့စည်းလဲဆိုတာ အချက်အလက်တွေကတော့ လက်ခံနိုင်ဖွယ် ရှိပါတယ်။ ပြီးတော့ အခုလိုအချိန်မှာ ဒီလိုဝန်ကြီးဌာန နှစ်ခုလုံးကလည်းပဲ နိုင်ငံရဲ့အခြေအနေအရလည်းပဲ လိုအပ်နေတဲ့ ဝန်ကြီးဌာနတွေ ဖြစ်တယ်”ဟု ပြည်သူ့လွှတ်တော် ကိုယ်စားလှယ် ဒေါက်တာသက်သက်ခိုင်က ပြောကြားသည်။
လက်ရှိတွင် ပြည်ထောင်စုဝန်ကြီးဌာန ၂၂ ခုဖြင့် ဆောင်ရွက်လျက်ရှိပြီး ယခု ဝန်ကြီးဌာန နှစ်ခုတိုးချဲ့ ဖွဲ့စည်းပါက ပြည်ထောင်စုဝန်ကြီးဌာန ၂၄ ခုအထိ ရှိလာမည်ဖြစ်ပြီး ပြည်ထောင်စုဝန်ကြီး စုစုပေါင်းမှာလည်း ၂၃ ဦးအထိ ရှိလာမည် ဖြစ်သည်။
ပြီးခဲ့သည့် သမ္မတဟောင်း ဦးသိန်းစိန် အစိုးရလက်ထက်တွင် ပြည်ထောင်စုဝန်ကြီးဌာန ၃၆ ခုဖြင့် ဖွဲ့စည်းဆောင်ရွက်ခဲ့သည်။
