လွှတ်တော် အဆောက်အအုံအား ဒရုန်းဖြင့် မှတ်တမ်းယူခဲ့သည့် တူရကီ သတင်းထောက်ပါ လေးဦးအပေါ် ပို့ကုန်သွင်းကုန်ဥပဒေဖြင့် ထပ်မံ တရားစွဲထားခြင်းအား ပယ်ဖျက်ခြင်း ရှိ/မရှိ လာမည့် ရုံးချိန်းတွင် အမိန့်ချမှတ်သွားမည် ဖြစ်ကြောင်း သိရသည်။
နိုဝင်ဘာ ၂၀ ရက်က တူရကီအခြေစိုက် သတင်းထောက်ပါ လေးဦးအား နေပြည်တော် ဇမ္ဗူသီရိမြို့နယ် တရားရုံသို့ တတိယအကြိမ် ရုံးထုတ်ခဲ့ပြီး အဆိုပါ ရုံးချိန်းတွင် တရားခံဘက်မှ ရှေ့နေနှစ်ဦးက ပို့ကုန်၊ သွင်းကုန် ဥပဒေ ပုဒ်မ ၈ ဖြင့် ထပ်မံ တရားစွဲထားအပေါ် ပယ်ဖျက်ပေးရန် တရားရုံးသို့ စာဖြင့်နှုတ်ဖြင့်ပါ လျှောက်လဲချက်ပေးခဲ့ပြီး မြို့နယ်တရားသူကြီးက အဆိုပါ ပုဒ်မအား ပယ်ဖျက်ခြင်း ရှိ/မရှိ လာမည့်နိုဝင်ဘာ၂၇ ရက် ရုံးချိန်းတွင် အမိန့်ချမှတ် သွားမည်ဖြစ်ကြောင်း သိရသည်။
“ဒီအမှုကို ကျွန်တော်တို့ ပြောသလို ပယ်မလား။ အမှုကို ဆက်သွားမလား။ မပယ်ဘဲနဲ့ ၄၀၃ အရ နောက်တစ်မှုက ၄၀၃ နဲ့ အကျုံးမဝင်ဘူးလို့ သတ်မှတ်ရင်တော့ ဆက်သွားမှာပေါ့။ ဒီနေ့လျှောက်လဲချက်အပေါ် တရားသူကြီးက စဉ်းစားရမှပေါ့” ဟု တရားခံများဘက်မှ ရှေ့နေအဖြစ် လိုက်ပါဆောင်ရွက်ပေးနေသူ တရားလွှတ်တော်ရှေ့နေ ဦးခင်မောင်ဇော်က ပြောကြားသည်။
လွှတ်တော် အဆောက်အအုံအား ဒရုန်းဖြင့် မှတ်တမ်းယူခဲ့သည်ကို ဝန်ခံခဲ့သည့်အတွက် ၁၉၃၄ ခုနှစ် လေယာဉ် အက်ဥပဒေပုဒ်မ ၁၀ ဖြင့် နိုဝင်ဘာ ၁၀ ရက်က ဇမ္ဗူသီရိမြို့နယ် တရားသူကြီးက အလုပ်နှင့်ထောင်ဒဏ် နှစ်လ ချမှတ်ခဲ့ပြီး ပို့ကုန်၊ သွင်းကုန် ဥပဒေပုဒ်မ ၈ ဖြင့် ဆက်လက် တရားစွဲထားခြင်းသည် ယခင် လေယာဉ်အက်ဥပဒေပုဒ်မ ၁၀ တွင် ပါဝင်နေသည့်အတွက် ဆက်လက် တရားစွဲဆိုခြင်း မပြုရန် လျှောက်လဲချက်ပေးခြင်းဖြစ်ကြောင်း တရားလွှတ်တော်ရှေ့နေ ဦးခင်မောင်ဇော်က ပြောကြားသည်။
“ကျွန်တော်တို့ အကောင်းဆုံး မျှော်လင့်ထားပါတယ်။ ဘာလို့လဲဆိုတော့ ရှေ့နေ နှစ်ယောက်လုံးလည်း အကောင်းဆုံး ကြိုးစားထားတယ်။ တရားသူကြီးတွေလည်း ရှေ့ကအတိုင်းပဲ အကုန်လုံး တရားမျှတစွာ လုပ်ဆောင်နေတဲ့အတိုင်း ကျွန်တော်တို့ ယုံကြည်တာ ဖြစ်တဲ့အတွက်ကြောင့် အကောင်းဆုံးဖြစ်မယ်လို့ ယူဆပါတယ်” အောင်နိုင်စိုးက ပြောကြားသည်။
