သခင်ဗဟိန်းကွယ်လွန်ခြင်း (၇၁) နှစ်ပြည့် အောက်မေ့ဖွယ်အခမ်းအနား ကျင်းပစဉ်

သခင်ဗဟိန်းကွယ်လွန်ခြင်း (၇၁) နှစ်ပြည့် အောက်မေ့ဖွယ်အခမ်းအနားနှင့် သခင်ဗဟိန်း ရာပြည့်အထိမ်းအမှတ် စာအုပ်မိတ်ဆက်ပွဲကို နိုဝင်ဘာ ၂၀ ရက်နံနက်ပိုင်းက မန္တလေးမြို့ ချမ်းမြသာစည်မြို့နယ် ၁၃၀၀ ပြည့် အရေးတော်ပုံကာလက ကျဆုံးသွားခဲ့သည့် အာဇာနည် ၁၇ ဦး၏ ဗိမာန်ဝင်းအတွင်းရှိ သခင်ဗဟိန်း အထိမ်းအမှတ်ကျောက်စာတိုင်ရှေ့တွင် ပြုလုပ်ခဲ့သည်။

မန္တလေးမြို့တွင် နိုဝင်ဘာ ၂၀ ရက် နံနက်ပိုင်းကပြုလုပ်ခဲ့သည့် သခင်ဗဟိန်း (ဝါ) ရဲဘော်ဘဟိန်း ကွယ်လွန်ခြင်း အောက်မေ့ဖွယ်အခမ်းအနားသို့ သခင်ဗဟိန်းနှင့် ပတ်သက်၍ စာရေးဆရာ ညီစေမင်း၊ တရားလွှတ်တော်ရှေ့နေ ဦးထွန်းအောင်ကျော်နှင့် စာရေးဆရာ နေဦးဝေတို့က အောက်မေ့ဖွယ်အမှတ်တရစကားများ ပြောကြားခြင်း၊ အလေးပြုခြင်းနှင့် ဝမ်းနည်းခြင်း အထိမ်းအမှတ်ငြိမ်သက်ခြင်း၊ သခင်ဗဟိန်း ရာပြည့်အထိမ်းအမှတ် စာအုပ်အကြောင်းမိတ်ဆက်ခြင်း အစရှိသည်တို့ဖြင့် အခမ်းအနားအား ပြုလုပ်ခဲ့ကြသည်။ အဆိုပါ အခမ်းအနားသို့ သခင်ဗဟိန်းရာပြည့်ကော်မတီဝင်များ မန္တလေးမြို့ခံနိုင်ငံရေးသမားများ တက်ရောက်ခဲ့ကြသည်။

ထို့ပြင် ပြီးခဲ့သည့် ဇွန် ၂၇ ရက်က သခင်ဗဟိန်း ရာပြည့်အထိမ်းအမှတ်အခမ်းအနားကို မန္တလေးမြို့တွင် နှစ်ရက်ကြာပြုလုပ်ခဲ့ပြီး သခင်ဗဟိန်း ရာပြည့်အထိမ်းအမှတ်ကျောက်စာတိုင်ကို အဆိုပါ ၁၃၀၀ ရာပြည့်အရေးတော်ပုံ အာဇာနည်ဝင်းအတွင်း စိုက်ထူခဲ့ကြသည်။ အဆိုပါအခမ်းအနားတွင် သမိုင်းဖျောက်ဖျက်ခံထားရသည့် သခင်ဗဟိန်းအုတ်ဂူနှင့် ပတ်သက်၍ သခင်ဗဟိန်းရာပြည့်ကော်မတီဝင်များက သတင်းမီဒီယာများသို့ ရှင်းလင်းမှုများ ပြုလုပ်ခဲ့ကြသည်။

သခင်ဗဟိန်းအုတ်ဂူအား ယခင် မဟာအောင်မြေမြို့နယ်အတွင်းရှိ ရွာဟိုင်းသုသာန်မှ ၂၀၀၃ ခုနှစ်ခန့်က ပုသိမ်ကြီးမြို့နယ်အတွင်းရှိ အေးရိပ်ငြိမ်သုသာန် (ယခင် ကြာနီကန်သုသာန်) သို့ တိတ်တဆိတ်ပြောင်းရွှေ့ကာ အုတ်ဂူအသစ်ဖြင့် မထင်မရှားပြောင်းရွှေ့ထားခဲ့ကြောင်း၊ အဆိုပါ အုတ်ဂူပြောင်းရွှေ့စဉ်တွင် ဒေသခံတစ်ဦးက မျက်မြင်တွေ့ရှိခဲ့သည့်အပြင် သခင်ဗဟိန်းအုတ်ဂူအား တာဝန်ယူတည်ဆောက်ပေးခဲ့ရသည့် ပန်းရန်ဆရာကလည်း သိရှိခဲ့ကြောင်း၊ ထို့ပြင် အုတ်ဂူအား သေဆုံးသူ၏အမည်နာမကို တပ်ဆင်ထားခြင်းမရှိကြောင်း၊ အဆိုပါအုတ်ဂူနှင့်ပတ်သက်၍ မိသားစုဝင်များကိုလည်း အတည်ပြုမေးမြန်းခြင်းများလည်း ပြုလုပ်ခဲ့ကြောင်း အစရှိသည့် အချက်အလက်ပေါင်းများစွာဖြင့် သခင်ဗဟိန်း၏ အုတ်ဂူအား အတည်ပြုနိုင်ခဲ့ခြင်းဖြစ်ကြောင်း သခင်ဗဟိန်းရာပြည့်ကော်မတီက သတင်းထုတ်ပြန်ခဲ့သည်။

သခင်ဗဟိန်းကို ၁၉၁၇ ခုနှစ် ဇွန် ၂၇ ရက်တွင် အဖပွဲစားကြီး ဦးမှင်နှင့် အမိဒေါ်ဦးတို့က အင်းဝမြို့တွင် မွေးဖွားခဲ့သည်။ မန္တလေးမြို့သို့ ပြောင်းရွှေ့ခဲ့ပြီးနောက် ဗဟိုအမျိုးသားအထက်တန်းကျောင်းနှင့် မန္တလေးဥပစာကောလိပ်တို့တွင် ပညာဆက်လက်သင်ယူခဲ့သည်။ ရန်ကုန်တက္ကသိုလ် ဘီအေတန်းတက်ရောက်ခဲ့ပြီး ၁၉၃၈ ခုနှစ်တွင် ဗမာနိုင်ငံလုံးဆိုင်ရာ ကျောင်းသားသမဂ္ဂဥက္ကဋ္ဌတာဝန် ထမ်းဆောင်ခဲ့သည်။ ချောက်ရေနံမြေသပိတ်သို့ သွားရောက် တရားဟောခဲ့ပြီးနောက် အင်္ဂလိပ်အစိုးရက ဖမ်းဆီးခဲ့သည်။ ၁၉၃၉ ခုနှစ်တွင် ကျောင်းမှထွက်ခဲ့ကာ သခင်အောင်ဆန်း၊ သခင်စိုး၊ ရဲဘော်ဂိုလ်ရှယ်တို့နှင့်အတူ ဗမာပြည်ကွန်မြူနစ်ပါတီကို လျှို့ဝှက်တည်ထောင်ခဲ့သည်။ ယင်းနောက် နိုင်ငံရေးလောကသို့ ဝင်ရောက်ခဲ့ပြီး မြေအောက်တော်လှန်ရေးကို ဦးဆောင်ခဲ့သည်။ ၁၉၄၁ ခုနှစ်တွင် ဒို့ဗမာအစည်းအရုံးတွင် အမှုဆောင်အဖြစ်တာဝန် ထမ်းဆောင်ခဲ့သည်။