ဧရာဝတီတိုင်းဒေသကြီး ကျုံပျော်မြို့နယ် လှည်းဆိပ်ကျေးရွာတွင် တရားမဝင် ဘာသာရေးအဖွဲ့အစည်းတစ်ခုမှ ရက် ၄၀ သင်တန်းပေးခြင်း၊ သင်တန်းပြီးနောက် သင်တန်းလာရောက်သူ သင်တန်းသားများအား နေရပ်များသို့ ပြန်မလွှတ်ဘဲခေါ်ဆောင်ထားခြင်းများကို တိုင်းဒေသကြီးအစိုးရက လူစုခွဲအရေးယူစေရန် ညွှန်ကြားထားကြောင်း သိရသည်။
ကျုံပျော်မြို့နယ် လှည်းဆိပ်ကျေးရွာတွင် တရားမဝင် ခရစ်ယာန်ဘာသာရေး အဖွဲ့အစည်းတစ်ခုအား စင်ကာပူနိုင်ငံသားအဖြစ်ခံယူထားသူ စကျော်စိုး (S2744647G)၊ မန်းဖိုးကြူ (ခေါ်) ဦးဉာဏ်ထွန်းဇော်၊ နန်းနီလာထွန်း၊ မန်းဝင်းမြင့် (ခေါ်) အရှည်ကြီး၊ နန်းနင့်မူ၊ မန်းဝင့်ဝါတို့ကဦးဆောင်ကာ ဖွဲ့စည်းထားခဲ့ကြောင်း၊ ယင်းအဖွဲ့အစည်းမှာ မူးယစ်ဆေးစွဲနေသူများအား ဆေးဖြတ်ပေးသည်၊ ဘာသာရေးသင်တန်းများအား ရက် ၄၀ သင်တန်းအဖြစ် သင်တန်းပေးသည်ဟုဆိုကာ ကရင်တိုင်းရင်းသားလူငယ်များကို စုစည်းထားကြောင်း၊ ယင်းအဖွဲ့အစည်းတွင် သင်တန်းတက်ရောက်ခဲ့သည့် လူငယ်များကို မိဘနေရပ်များထံသို့ ပြန်လိုခြင်းမရှိသည်အထိ စည်းရုံးသိမ်းသွင်းထားမှုများရှိခဲ့ပြီး မိဘများက လာရောက်ပြန်လည်ခေါ်ယူရာတွင်လည်း ပြန်မလိုက်လိုခြင်းများရှိကြောင်း၊ ယင်းအဖွဲ့သို့ ဝင်ရောက်သွားသည့် လူငယ်များမှာ မိမိကိုယ်ကိုယ်ဘုရားဖြစ်သည်ဟု ယူဆခြင်းများရှိနေကြောင်း၊ အဖွဲ့အစည်းအတွင်းမှ လူငယ်များအား ဦးဆောင်သူများက အလုပ်များလုပ်ကိုင်စေပြီး ရရှိလာသည့်ငွေကြေးများအား ဘုရားပေးသည်ဟုဆိုကာ ဦးဆောင်သူများက သိမ်းယူထားကြောင်း၊ ယင်းအပြင် အဖွဲ့အစည်းတွင်း၌ ဓလေ့ထုံးစံနှင့် မကိုက်ညီသော လိင်ဆက်ဆံစေခြင်းများပါ ပြုလုပ်စေလျက်ရှိကြောင်း၊ သားသမီးများအား ပြန်လည်ခေါ်ယူ၍ မရတော့သောကြောင့် အမှုဖွင့်တိုင်ကြားထားသည့် ဖြစ်စဉ်များလည်းရှိကြောင်း သတင်းများထွက်ပေါ်ပြီးနောက် ပြည်ထောင်စု သာသနာရေးဝန်ကြီးဌာနမှ ကော်မတီဖွဲ့ကာ စစ်ဆေးဆောင်ရွက်ခဲ့ကြောင်း၊ တိုင်းဒေသကြီးအစိုးရမှလည်း ယင်းအဖွဲ့အစည်းနှင့်ပတ်သက်၍ စုံစမ်းစစ်ဆေးပြီးနောက် ခွင့်ပြုချက်မဲ့ လူစုလူဝေးဖြင့် နေထိုင်ခြင်းဖြစ်သည်ကို တွေ့ရှိရသောကြောင့် ကနဦးဆောင်ရွက်ချက်အဖြစ် လူစုခွဲရန် ညွှန်ကြားထားခဲ့ခြင်းဖြစ်ကြောင်း သိရသည်။
“ဒီဧရာဝတီတိုင်းမှာဖြစ်နေတာက တစ်နှစ်ခွဲကျော်ကျော်လောက်ရှိပြီ။ ဟင်္သာတဘက်မှာ သူတို့သင်တန်းပေးတာတွေ၊ သူတို့အယူအဆကို လူစုလူဝေးနဲ့ သင်တန်းပေးတာတွေ အဲဒါတွေလုပ်နေတာက တစ်နှစ်ခွဲလောက်ရှိတယ်။ အဲဒါယခင်ကတည်းကလည်း တိုင်ကြားချက်တွေရှိတယ်။ ရှိတဲ့အခါကျတော့ ဒီခရစ်ယာန်နဲ့ပတ်သက်တဲ့ တိုင်ကြားချက်ကလည်း ခရစ်ယာန်အများစု သဘောမတူတဲ့ တိုင်ကြားချက်ဖြစ်တယ်။ မိဘကိုဂရုစိုက်စရာမလိုဘူး၊ ခရစ်တော်ရဲ့ဝိညာဉ်က ဘာသာဝင်ခရစ်ယာန်ရဲ့ ကိုယ်ထဲမှာ ဝင်ရောက်ကိန်းအောင်းပြီးတော့ ဝိညာဉ်ကစေခိုင်းတဲ့အတိုင်းလုပ်တာတို့၊ ဝိညာဉ်ကူးတာတို့ အဲဒီလိုမျိုးသတင်းတွေပါ အများကြီးရတယ်ပေါ့နော်။ ရတဲ့အခါကျတော့ မိဘတွေကလည်း လာတိုင်ကြတယ်။ မိဘတွေလာတိုင်ကြတာက သူတို့သားသမီးတွေက သူတို့ကိုလှည့်လည်း မကြည့်တော့ဘူး၊ အရင်တုန်းက မိဘကိုလုပ်ကျွေးပြုစုတယ်ပေါ့နော်၊ သူတို့ရတဲ့လုပ်အားခလေးတွေ မိဘကိုထောက်ပံ့တယ်ပေါ့။ အခုကျတော့ မိဘကိုမထောက်ပံ့တော့ဘူး၊ ဆက်သွယ်လို့တောင်မရဘူး၊ ဘယ်ရောက်နေမှန်းတောင် မသိဘူးဆိုပြီးတော့ လာတိုင်ကြတယ်။ တိုင်ကြတော့ ဘယ်လိုအရေးယူရမလဲဆိုတော့ နှစ်လမ်းရှိတာပေါ့။ ဓမ္မအကြောင်းရှိတယ်။ နောက်တစ်ခု အဲဒီကလေးတွေကို တရားဝင်စုစည်းခွင့်မရှိဘဲ တရားဝင်စုစည်းထားတယ်၊ နေရာတစ်နေရာ အိမ်တစ်အိမ်မှာ စုစည်းထားတယ်။ စုစည်းထားပြီးတော့ ခရစ်ယာန်တရားတော်နဲ့ မကိုက်ညီတာတွေကို သင်ကြားတဲ့လိုင်းကြောင်းတစ်ခု အဲဒီအတွက်ကို ပြည်ထောင်စု သာသနာရေးဝန်ကြီးဌာနကနေပြီးတော့ ခရစ်ယာန်အဖွဲ့ချုပ်သုံးဖွဲ့ကို လွှတ်လိုက်တယ်။ အဲဒီအသင်းချုပ်တွေက လာသွားပြီးတော့ သူတို့စုံစမ်းမေးမြန်းပြီး ပြည်ထောင်စု သာသနာရေးဝန်ကြီးဌာနကို ပြန်တင်ပြထားတယ်။ အဲဒီအသင်းအဖွဲ့ဟာ တရားဝင်အသင်းအဖွဲ့လား၊ တရားမဝင်အသင်းအဖွဲ့လား၊ တကယ်လို့ တရားဝင်အသင်းအဖွဲ့မဟုတ်ဘူး ဥပဒေနဲ့ငြိစွန်းတယ်ဆိုရင် ဘယ်ဥပဒေနဲ့အရေးယူရမယ်ဆိုတာ တိုင်းကိုပြန်ပြီးတော့ ညွှန်ကြားချက်လာမယ်လို့ ယူဆတယ်ပေါ့နော်။ အဲဒီညွှန်ကြားချက်လာရင်တော့ ညွှန်ကြားချက်အတိုင်း ဆောင်ရွက်ရမယ်။ ဒါက ပြည်ထောင်စုဝန်ကြီးဌာနက ဆောင်ရွက်တဲ့အပိုင်း။ တိုင်းဒေသကြီးအစိုးရက နိုဝင်ဘာ ၁၀ ရက်မှာ အစည်းအဝေးလုပ်တယ်။ အဲဒီအစည်းအဝေးက ဆုံးဖြတ်လိုက်တာက ဧရာဝတီတိုင်း ကျုံပျော်မြို့ လှည်းဆိပ်ကျေးရွာ မန်းဖိုးကြူးရဲ့နေအိမ်မှာ အယောက် ၅၀ လောက်စုဝေးပြီးတော့ ရက် ၄၀ သင်တန်းပေးမယ်ဆိုတဲ့ သတင်းအရ သွားရောက်ပြီးတော့ စုံစမ်းမေးမြန်းတဲ့အခါမှာ သူတို့ကသင်တန်းပေးမယ့်ကိစ္စကို တိုင်းဒေသကြီးအစိုးရရဲ့ ခွင့်ပြုချက်လည်း ရယူထားခြင်းမရှိဘူး။ မရှိတဲ့အခါကျတော့ တိုင်းဒေသကြီးအစိုးရရဲ့ ခွင့်ပြုချက်မရှိဘဲနဲ့ ဒီသင်တန်းဖွင့်လှစ်တဲ့ကိစ္စရယ်၊ နောက်တစ်ခါ လူငယ်တွေကို လူငယ်ယောကျ်ားလေးတွေ မိန်းကလေးတွေကို စုစည်းထားပြီးတော့ ဒီတစ်အိမ်ထဲမှာထားပြီး ဒီသင်တန်းပို့ချတဲ့ကိစ္စ ဒါတွေဟာခွင့်ပြုချက်မရှိဘဲ လုပ်တဲ့ကိစ္စတွေဖြစ်တဲ့အတွက် ဒါတွေလုပ်မရပါဘူး၊ ခွင့်ပြုချက်ရှိမှ လုပ်လို့ရမယ်။ အဲဒီတော့ ခွင့်ပြုချက်မရှိဘဲလုပ်တဲ့အတွက် လူစုခွဲပါဆိုပြီးတော့ လူစုခွဲခိုင်းတယ်။ အဲဒီလူစုခွဲတဲ့နေရာမှာလည်း သူတို့ဆိုင်ရာအုပ်ထိန်းသူတွေက လာရောက်ပြီးတော့ ခေါ်လို့ရအောင် ကျုံပျော်မြို့နယ်အုပ်ချုပ်ရေးအဖွဲ့က အရေးယူဆောင်ရွက်ပါဆိုပြီးတော့ လမ်းညွှန်ထားတယ်” ဟု ဧရာဝတီတိုင်းအစိုးရအဖွဲ့ဝင် စည်ပင်သာယာရေးဝန်ကြီး ဦးကျော်မြင့်က ပြောကြားသည်။
အဆိုပါ တရားမဝင်ဘာသာရေးအဖွဲ့ တည်ရှိနေသည့်ကျေးရွာမှာ ဧရာဝတီတိုင်းဒေသကြီးအစိုးရအဖွဲ့ ကရင်တိုင်းရင်းသားဝန်ကြီး၏ ဇာတိကျေးရွာလည်းဖြစ်ပြီး တိုင်းဒေသကြီးဝန်ကြီးချုပ်၏ ဇာတိမြို့ မဲဆန္ဒနယ်လည်းဖြစ်ကြောင်း သိရသည်။
