မြောက်ဥက္ကလာပမြို့နယ်တွင် လမ်းဘေးရပ်နေသူများကို ကိုယ်ပိုင်ယာဉ်က ဝင်တိုက်မိရာ တစ်ဦးသေ၊ နှစ်ဦးဒဏ်ရာရ

မြောက်ဥက္ကလာပမြို့နယ်တွင် လမ်းဘေးရပ်နေသည့် အမျိုးသားသုံးဦးကို ကိုယ်ပိုင်ယာဉ်တစ်စီးက ဝင်ရောက်တိုက်မိခဲ့သဖြင့် တစ်ဦးသေဆုံးပြီး နှစ်ဦးဒဏ်ရာရရှိမှု နိုဝင်ဘာ ၂၀ ရက် နံနက် ၁ နာရီခန့်က ဖြစ်ပွားခဲ့ကြောင်း အရှေ့ပိုင်းခရိုင်ရဲတပ်ဖွဲ့မှ သိရသည်။

ဖြစ်စဉ်မှာ မြောက်ဥက္ကလာပမြို့နယ်၊ သုဓမ္မာလမ်းမကြီးအတိုင်း မြောက်ဥက္ကလာပမြို့နယ်နေ ယာဉ်မောင်း ညီညီ (၂၄) နှစ် မောင်းနှင်လာသည့် Toyota Caldina အမျိုးအစား ကိုယ်ပိုင်ယာဉ်တစ်စီးသည် အဆိုပါလမ်းရှိ ကမ္ဘောဇဘဏ်အနီးအရောက် ယာဘက်လမ်းစပ်တွင်ရပ်နေသည့် အသက် ၄၀ ဝန်းကျင်ခန့် အမျိုးသားတစ်ဦး၊ အသက် ၃၅ နှစ်ဝန်းကျင်ခန့်ရှိ အမျိုးသားတစ်ဦးနှင့် အသက် ၂၀ နှစ်ဝန်းကျင်ခန့်ရှိ အမျိုးသားတစ်ဦးတို့အား ဝင်ရောက်တိုက်မိခဲ့ကြောင်း သိရသည်။

ယင်းသို့ အတိုက်ခံရမှုကြောင့် အသက် ၄၀ နှစ်ဝန်းကျင်ခန့်ရှိ အမျိုးသားမှာ ဝဲပေါင်ခြံ /ရင်ဘတ်ပွန်း၊ ပါးစပ်သွေးထွက်ဒဏ်ရာများရရှိကာ မြောက်ဥက္ကလာပဆေးရုံကြီးတွင် ဆေးကုသမှုခံယူနေစဉ် သေဆုံးသွားခဲ့ပြီး ကျန်အမျိုးသားနှစ်ဦးမှာလည်း ဒဏ်ရာများရရှိခဲ့ကာ ဆေးရုံသို့ တင်ပို့ကုသထားရကြောင်း သိရသည်။

အဆိုပါဖြစ်စဉ်မှ ယာဉ်မောင်း ညီညီ (၂၄) နှစ်ဆိုသူအား မြောက်ဥက္ကလာပမြို့မရဲစခန်းမှ ယာဉ် (ပ) ၄၈/၂၀၁၇၊ ရာဇသတ်ကြီးပုဒ်မ ၃၀၄-က/၃၃၈/၂၇၉ ဖြင့် အမှုဖွင့်ပြီး အရေးယူထားကြောင်း သိရသည်။