မော်လိုက်မြို့၏ အရှေ့-အရှေ့တောင်ဘက် ၂၃ မိုင်ခန့်အကွာကို ဗဟိုပြုပြီး အင်အားရစ်(ခ်)တာစကေး ၄ ဒသမ ၆ အဆင့်ရှိ ငလျင်လှုပ်ခတ်

Photo: မိုးလေဝသနှင့်ဇလဗေဒညွှန်ကြားမှုဦးစီးဌာန

မော်လိုက်မြို့၏ အရှေ့-အရှေ့တောင်ဘက် ၂၃ မိုင်ခန့်အကွာကိုဗဟိုပြုပြီး အင်အားရစ်(ခ်) တာစကေး ၄ ဒသမ ၆ အဆင့်ရှိ ငလျင်လှုပ်ခတ်ခဲ့ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနမှ ထုတ်ပြန်ထားသည်။
 
ထုတ်ပြန်ချက်တွင် နိုဝင်ဘာ ၂၀ ရက် ၃ နာရီ ၁၈ မိနစ်တွင် မန္တလေးမြေငလျင်စခန်းမှ အနောက်မြောက်ဘက် ၁၃၉ မိုင်ခန့်ကွာဝေးသော မြန်မာနိုင်ငံပြည်တွင်း၊ စစ်ကိုင်းတိုင်းဒေသကြီး၊ မော်လိုက်မြို့၏ အရှေ့-အရှေ့တောင်ဘက် ၂၃ မိုင်ခန့်အကွာကို ဗဟိုပြုပြီး အင်အားရစ်(ခ်)တာစကေး ၄ ဒသမ ၆ အဆင့်ရှိ အင်အားအနည်းရှိသော ငလျင်တစ်ခု လှုပ်ခတ်သွားခြင်းဖြစ်သည်။
 
“မြန်မာနိုင်ငံ အနောက်မြောက်ဘက်ခြမ်းကတော့ အင်အားအနည်းငယ်လေးတွေ မကြာခဏလှုပ်တဲ့နေရာဖြစ်တယ်။ အင်အားအနည်းငယ်ကနေ အင်အားအသင့်အတင့်က မကြာခဏလှုပ်နေကြဖြစ်တယ်။ နောက်ပိုင်းနှစ်တွေ ဒေတာကိုပြန်ကြည့်ရင်လည်း အဲ့နေရာမှာ မကြာခဏလှုပ်နေတဲ့နေရာဖြစ်တယ်” ဟု မိုးလေဝသနှင့် ဇလဗေဒညွှန်ကြားမှုဦးစီးဌာန မြေငလျင်ဌာနခွဲမှ ဒုတိယညွှန်ကြားရေးမှူး ဒေါက်တာယဉ်မျိုးမင်းထွေးက ပြောကြားသည်။
 
ထို့ပြင် ၂၀၁၇ ခုနှစ် နိုဝင်ဘာ ၁၉ ရက် နေ့လယ် ၁၂ နာရီ မိနစ် ၄၀၊ ၃၆ စက္ကန့်တွင် မန္တလေးမြေငလျင်စခန်းမှ အနောက်မြောက်ဘက် ၁၅၅ မိုင်ခန့်ကွာဝေးသော မြန်မာနိုင်ငံ ပြည်တွင်း (မော်လိုက်မြို့၏ အနောက်တောင်ဘက် ၁၅ မိုင်ခန့်အကွာ) ကိုဗဟိုပြု၍ အင်အားရစ်(ခ်)တာစကေး လေးအဆင့်ရှိ အင်အားအနည်းငယ်ရှိသော မြေငလျင်တစ်ခု လှုပ်ရှားခဲ့ကြောင်း သိရသည်။
 
စစ်ကိုင်းပြတ်ရွေ့ကြော အင်းဝအပိုင်းတွင် ငလျင်လှုပ်ခတ်ခဲ့သည်မှာ နှစ်ပေါင်းရာချီကြာမြင့်နေပြီဖြစ်သည့်အတွက် ထပ်မံလှုပ်ခတ်ရန် အခွင့်အလမ်းများသည့်အတွက် ယင်းနေရာတွင် ပြည်တွင်း၊ ပြည်ပပညာရှင်များ ပူးပေါင်းကာ လေ့လာမှုများ ပြုလုပ်သွားမည်ဖြစ်ကြောင်း မြန်မာနိုင်ငံ ငလျင်ကော်မတီမှ သိရသည်။
 
ငလျင်များလှုပ်ခတ်ရာတွင် ရစ်ချ်တာစကေး ၃ အဆင့်ရှိပါက အားနည်းသည့်အဆင့်ဟုလည်းကောင်း၊ ရစ်ချ်တာစကေး ၄ နှင့် ၄ အထက်ရှိပါက အားအနည်းငယ်ဟုလည်းကောင်း၊ ရစ်ချ်တာစကေး ၅ အဆင့်ရှိပါက အားအသင့်အတင့်ဟုလည်းကောင်း၊ ရစ်ချ်တာစကေး ၅ အထက်ရှိပါက အားပြင်းဟုလည်းကောင်း သတ်မှတ်ထားကြောင်း သိရသည်။