ရန်ကုန်မြို့ရှိ အများပြည်သူ သယ်ယူပို့ဆောင်ရေး ယာဉ်လိုင်းအချို့အား တွေ့ရစဉ်
နိုင်ငံတော်အစိုးရက အလုံးစုံ အခြေခံအဆောက်အအုံ လိုအပ်ချက်များ ဖြည့်ဆည်းပေးနိုင်ရန်အတွက် ကုန်ကျငွေကို ဒေါ်လာ ဘီလျံ ၁၂၀ ခန့် ခန့်မှန်းထားပြီး ယင်းပမာဏ၏ ထက်ဝက်ခန့်ကို သယ်ယူပို့ဆောင်ရေး ကဏ္ဍတွင် အသုံးပြုရန် လိုအပ်မည်ဖြစ်ကြောင်း Oxford Business Group- OBG က သတင်းထုတ်ပြန်ထားသည်။
အဆိုပါ ဒေါ်လာဘီလျံ ၁၂၀ မှ ဘီလျံ ၄၀ ခန့်အား စွမ်းအင်နှင့် လျှပ်စစ်ထုတ်လုပ်မှု လုပ်ငန်းများအတွက် အသုံးပြုရန် လိုအပ်မည်ဖြစ်ပြီး ဘီလျံ ၂၀ ခန့်အား ဆက်သွယ်ရေး ကဏ္ဍအတွက် အသုံးပြုရန် လိုအပ်မည်ဖြစ်ကြောင်း OBG က ထုတ်ပြန်ထားသည်။
မြန်မာနိုင်ငံ၏ စီးပွားရေး ဖွံ့ဖြိုးတိုးတက်မှုအား အထောက်အကူပြုနိုင်ရန်အတွက် သယ်ယူပို့ဆောင်ရေးကဏ္ဍ တစ်ခုလုံးအနေနှင့် လာမည့်နှစ် ၂၀ အတွင်း ရင်းနှီးမြှုပ်နှံမှုပမာဏ ဒေါ်လာဘီလျံ ၆၀ လိုအပ်မည်ဟု ပို့ဆောင်ရေးနှင့် ဆက်သွယ်ရေးဝန်ကြီးဌာန၏ ခန့်မှန်းချက်များကို ကိုးကားပြီး Oxford Business Group က သတင်းထုတ်ပြန်ထားသည်။
သယ်ယူပို့ဆောင်ရေးဆိုင်ရာ အခြေခံအဆောက်အအုံ လိုအပ်ချက်များအား ဖြည့်ဆည်းပေးနိုင်ရန် ရည်ရွယ်ချက်သည် နိုင်ငံလုံးဆိုင်ရာ သယ်ယူပို့ဆောင်ရေး မဟာဗျူဟာစီမံကိန်းတွင် အဓိကအလေးထား ဆောင်ရွက်သွားမည့် ကဏ္ဍတစ်ခုဖြစ်ပြီး ကုန်းတွင်းဆိပ်ကမ်းများ တည်ဆောက်ရန်မှာလည်း ၎င်းရည်ရွယ်ချက်၏ တစ်စိတ်တစ်ပိုင်းဖြစ်သည်။
၂၀၁၄ ခုနှစ်တွင် စတင်ဆောင်ရွက်ခဲ့သည့် အဆိုပါစီမံကိန်းတွင် ရေကြောင်းသယ်ယူပို့ဆောင်မှု ကုန်ကျစရိတ် လျော့နည်းသွားစေရန်နှင့် သယ်ယူပို့ဆောင်နိုင်စွမ်း ပိုမိုမြင့်မားလာစေရန် ရင်းနှီးမြှုပ်နှံမှု လုပ်ငန်းစဉ်များ၊ အခြေခံအဆောက်အအုံ တည်ဆောက်ရေး စီမံကိန်းများနှင့် ပြုပြင်ပြောင်းလဲမှုများအား ဖော်ပြထားသည်၊
စီမံကိန်း၏ ရည်ရွယ်ချက်မှာ သယ်ယူပို့ဆောင်ရေးကဏ္ဍအတွင်း ရင်းနှီးမြှုပ်နှံမှုပမာဏအား အသားတင် ကုန်ထုတ်လုပ်မှုတန်ဖိုး GDP ၏ ၁-၁ ဒသမ ၅ ရာခိုင်နှုန်းမှ ၃-၄ ရာခိုင်နှုန်းအထိ မြင့်တက်လာစေရန်ဖြစ်သည်။ အဆိုပါ ပမာဏသည် မြန်မာနိုင်ငံတွင် ၎င်းကဏ္ဍအပေါ် ရင်းနှီးမြှုပ်နှံမှုအား ထိုင်း၊ ဗီယက်နမ်တို့နှင့် တန်းတူဖြစ်လာစေမည်ဖြစ်သည်။
ပြည်တွင်းလမ်းပန်းဆက်သွယ်မှု ပိုမိုအားကောင်းလာစေရန်အတွက် ရင်းနှီးမြှုပ်နှံမှု တိုးမြှင့်လုပ်ဆောင်ရမည်ဟု စီးပွားရေးလုပ်ငန်းရှင်များနှင့် တာဝန်ရှိသူများက သဘောတူ လက်ခံထားသည်။ ရန်ကုန်တိုင်းဒေသကြီး အစိုးရအဖွဲ့၏ ဝန်ကြီးချုပ် ဦးဖြိုးမင်းသိန်းက ကားလမ်းများနှင့် ရထားလမ်းများအား အဆင့်မြှင့်တင်သွားမည့်အပြင် မြန်မာနိုင်ငံ၏ အဓိကကုန်သွယ်မှု သွေးကြောဖြစ်လာနိုင်သည့် ကုန်းတွင်း ရေကြောင်း သယ်ယူပို့ဆောင်ရေးကဏ္ဍကိုလည်း အဆင့်မြှင့်တင်သွားမည်ဟု ပြောကြားခဲ့သည်။
သို့သော် နိုင်ငံတော် အသုံးစရိတ် အကန့်အသတ်များရှိသည့်အတွက် အစိုးရ၏ စီမံကိန်းများတွင် ပါဝင်သည့် ရေကြောင်း၊ ကားလမ်း၊ ရထားလမ်းနှင့် လေကြောင်းကဏ္ဍများတွင် အခြေခံအဆောက်အအုံ အဆင့်မြှင့်တင်မှု အများစုသည် အစိုးရနှင့် ပုဂ္ဂလိကအဖွဲ့အစည်းများ ပူးပေါင်းဆောင်ရွက်မှုအပေါ် အားထားဆောင်ရွက်သွားရန် လိုအပ်မည်ဖြစ်ကြောင်း သိရသည်။
“အသုံးစရိတ် ကန့်သတ်မှုရှိတဲ့အတွက် မဟာဗျူဟာစီမံကိန်းကို အကောင်အထည်ဖော် ဆောင်ရွက်ဖို့အတွက် ဝန်ကြီးဌာနမှာလည်း အခက်အခဲတွေ ရှိနေပါတယ်” ဟု ပို့ဆောင်ရေးနှင် ဆက်သွယ်ရေးဝန်ကြီးဌာန အမြဲတမ်းအတွင်းဝန် ဦးဝင်းခန့်က စက်တင်ဘာလနှောင်းပိုင်းတွင် ပြုလုပ်ခဲ့သည့် ရင်းနှီးမြှုပ်နှံမှုဆိုင်ရာ ဟောပြောပွဲတွင် ပြောကြားခဲ့သည်။
